|
|
السلام يا بنات
ولدت ولادة مبكرة من بتريخ 13 – 10 – 2024 وبعملية قيصرية بعد نزيف وانفجار المشيمة وبنتي للحين بالمستشفى بالحاضنة , وافكر آخذ امومة لأول مرة ولكن سمعت انه التربية مانعة الامومة فهل هذا صحيح؟ طيب وليش ؟
وتعتقدون لو أجيب تقرير طبي خاص فيني وفي البنت لأنها محتاجة لرعاية خاصة في السنة الأولى من عمرها راح يوافقون ولا سالفة تبي واسطة بعد ؟
وهل صحيح انه الناظرة بعد لازم توافق ؟
عسى الله يقوم بنتج بالسلامه
انتي مدرسه ولا اداريه ؟؟
وعليكم السلام يا قلبي
والله يقوم بنتج بالسلامه
شوفي يا قلبي
أنا زوجة أخوي أمينة مكتبه
قالتله الناظره إذا أخذتي أمومه في وحده راحي تجي مكانج
زوجة أخوي بس خلصت أجازة الوضع وداومت
حتي ألحين طلعوا قرار إذا بتسوين عملية الليزك لتصحيح النظر سويه بالصيف حتي زوجة أخوي قاعده أتحاتي سوت العملية
وخايفه يحولونه مجلس طبي
ما ادري أش هالقرارات
وألحين عموما بكل المدارس بتأخذين أمومه ينقلونج مدرسة ثانيه ومع قطع هالمده من معاشات الصيف
بس إذا قطعتيه ما ينقلونج
أول شى حمد الله علي السلامه والله يعطيج الصحه إنتى وبنيتج
أقولج أشوف أختي محولينها مجلس طبي لأنها والده وما أدري ماخذه إجازه وإلا ما أدري شنو بس محولينها .
انا مدرسة مو ادارية بس افكر احول ادارية …
وعلى طاري المجلس الطبي انا بعد محوليني مجلس طبي لاني كنت ماخذة طبيتين قبل الولادة … والله كريم
مو مشكلة ينقلوني انا ودي انتقل اصلا من هالمدرسة النحس ..
والله لولا الديون اللي علي كنت قعدت بالبيت ابيع دراريع وشيلات احسن لي ….
الحمدالله على سلامتج وماتشوفين شر
في مدرسه عندنا والده شهر 9 وكانت تبي امومه
لكن الناظره ما رضت
فالشغله صايره بيد الناظره لأن قبلها مدرسه عطتها امومه وتقول الوزاره حيل انتقدتني لان عندي نقص
والله هالمدرسه ا خلت أحد ما جابته زوجها وامها لانه كانت محتاجه الاجازه
طيب حنا ما عندنا نقص في مدرسات الاجتماعيات حنا 6 مدرسات الحين … يعني عادي لو آخذ أمومة …
على العموم انا طالعة طالعة والله اني كارهة التدريس وهالمدرسة بالذات ما ابي اداوم عندهم ..
انشالله اقدر افيدج بالدوام عندنا وحده طلبت اجازة رعاية اسره ورفضت الناظرة ولما راحت المنطقة التعليمية قالها المدير العام مو من حق الناظره ترفض الاجازة لأنه هذا النوع من الاجازات مثل الامومه و اجازة رعاية أسره ماتقدمها الوحده الا مضطره وقعلها المديرة ومشت الاجازة
واذا ماتبين تنتقلين قبل لا تنتهي الاجازة اقطعيها بفترة قبل اسبوعين
بالنسبة للي محولين للمجلس الطبي اغلبيتهم ماخذين طبيات من مستشفيات خاصة فحاولي انج ماتخذين طبيتين ورا بعض من الخاص
و بس
بالنسبة للطبيات والله اني ما كنت اقدر اقوم من السرير , وكنت حيل تعبانة وحتى ايدي ما احس فيها كأني مشلولة غير لسعات الكهربا اللي صايرة بايدي ليومكم هذا .. وما خليت طبيب حكومة او خاص ما رحت له والله كريم ولدت ولادة مبكرة من التعب وصار عندي نزيف وربكم ستر ..
طيب متى اطلب الأمومة انا الحين صار لي شهر من ولدت ؟ ومن وين اطلبها من الناظرة ولا المنطقة ؟
بعدين جارة القمر ما فهمت هالجملة ممكن تنورينا ترى الولادة واللي شفتها منها سكرت المخيخ عندي
وألحين عموما بكل المدارس بتأخذين أمومه ينقلونج مدرسة ثانيه ومع قطع هالمده من معاشات الصيف
بس إذا قطعتيه ما ينقلونج
قبل لا تنتهي اجازة الوضع بأسبوعين و تطلبينها من الناظرة لازم وهي تعلق عالطلب موافقه حلوه مو موافقة اهم شئ تعلق و جيبي واسطة وديها المنطقة و تمشي بس اهم شئ تكون الناظره كاتبه رأيها
ويكون احسن يروح زوجك يكلم الناظره لأنه فيه ناظرات لما يجى الزوج يطخون شوي و يشرح لها وضعك
و انشالله توافق
نصيحه قبل لا يدخل على الناظرة قوليله يردد ثلاث مرات اللهم ملكني قلب من احوجتني إليه
بالتوفيق انشالله
بكرة بروح المستشفى وآخذ تقرير لي ولبنتي اللي للحين بالمستشفى وهي بحاجة لرعاية خاصة وان شاء الله بيوافقون …