نقص الحديد :(((((

سويت تحليل بالمستوصف وطلع فيني نقص حديد…طبعا لاحظت اعراضه واضحه عندي ومن اهمها الخمول والصداع والتعب الشديد عند بذل اي مجهود!! والحمدلله على كل حال…

بنات شنو آكل عشان ازيد نسبة الحديد؟؟؟

ومنو عندها خبرة بهالموضوع وتقدر تفيدني؟؟شلون اتابع نسبة الحديد عندي واخليها ترتفع؟؟

حبيبتي بعد ما يبيله الجبده (الكبده) اذا اتحبينها ما في شي مثلها يعطيج حديد

و الخس من الخضروات الغنيه بالحديد

و عملي تحليل دم شامل في أي مختبر أول كل شهر

بس أقول لج شي يا عمري يا أسبانيه إذا الحديد عندج وايد نازل ما يضر من أي صيدليه أخذي مكملات غذائيه حديد و أمشي على الجرعات المكتوبه على العلبه بس نصيحه أخذي معاها حمض الفوليك لان تحتاجينهم مع بعض علشان اتزيدين نسبة الحديد

و ما تشوفين شر يا عمري
و طمنينا عليج

حبيبتي انا كنت نفسج والحمدالله الحين احسن داايم كان يجيني هبوط وماأتعب بسرعه
سويت تحليل بالمستوصف قال عندها نقص بالحديد فراحت امي الصيديله وسألت الصيدلاني عن حبوب تزيد نسبة الحديد وعطاني حبوب عجييبه قال هذي تعادل حبوب المستوصف 5 مراات يعني تعطيج من الحديد لين يكتفي جسمج والحمدالله من اكلتها قمت ما اتعب حييل ولا قام يجيني هبوط واضافري صارت ورديه من بعد ماكانت بيضه وهالشي دليل نقص الحديد والحبوب بـ 5 وشوي انتي روحي الصيدليه وقوليها عندي نقص فالحديد وابي شي يعوض هالنقص

وسلااامتج واذا تذكرت اسم حبوبي بحطها لاني ناسيتها

وأتعب بسرعه **

السلام عليكم

شوفي يا قلبي

شربي عصير عنب طازج كل يوم لأن تركيبة العنب نفس تركيبة دم الإنسان

وأخذي بعد يومياً 3 مرات قفشة كبيرة عسل أسود ( عسل قصب سكر )

سبااااانخ

التمر يرفع نسبة الحديد

يا حبايبي ماقصرتوا والله عساني مانحرم منكم

انا هم اظافري بيضه مو ورديه وتتكسر بسرعه !! وبالنسبه للكبده مع الاسف ماحبها بس بحاول اكلها ..وصح كلامكم العنب قريت انه زين حق الحديد

المستوصف عطوني حبوب حق الحديد بس ليلحين ما بديت فيهم..بس انا بسمع كلامج اختي نورة وباخذ من الصيدليه احسن احس المفعول بيكون
اقوى

بس اهي ماتزيد الوزن؟؟؟ مو ناقصه اصلح شي ويخترب شي ثاني!

والف شكر مرة ثانيه كفيتوا ووفيتوا والله

حبيبتي ماتشوفين شر … انا مريت بهالحالة انة عندي نقص حديد وكانت اعراضة حادة عندي صداع بااي وقت وضيق تنفس
وهبوط وخمول وكسل وتعب بس تعالجت والحمدالله احسن بواايد ونسيت اسم الادوية لانة قبل رحت مستشفى وعطوني
حمض الفوليك واقراص حديد وفيتامينات . بس تالي رحت مستشفى ثاني وعطوني كرتون حبوب مدري وش اسمة بس اغناني
عن كل الادوية السابقة ….. ومابي اخوفج انة طبعا زاد وزني وصرت متعافية هههههه ماكنت عارفة انة بسبب الفيتامينات و
هالادوية الا لما اخوي قالي انة ياخذ هالفيتامينات عشان يبني عضلات جسمة ازود هههههه حتى اخوي تعافة مشاء الله
لكن من هديناهم رجعنا لوزنا الطبيعي . الحمدالله

وبالنسبة للاكل ( انا مااحب الكبدة لكن يقولون مفيدة جدا , وعندج الطماط والسبانخ والخضروات الخضراء والبروكلي …
…….. ووايد اشياء . اهم شي تتغذين عدل ….. وابتعدي عن الاكلات الي تنقص الحديد مثل الفلافل وغيرة هههه اهم شي

وتحياتي لج وماتشوفين الا كل صحة وعافية ان شاء الله

مشكورة يابعدعمري ماقصرتي

بحاول القى حبوب ماتزيد الوزن