نفسيتي تعبانه من البنات

السلام عليكم خواتي العزيزات

عندي مشكله واحس انها شوي مضايقتني نفسيا واتمنى منكم النصيحه المشكله اهيا عندي بدوامي

انا متحجبه وبس بالدوام البس عبايه علشان ما لي خلق من الصبح ادورلي بدله حتى المكياج مسكره وقلوس.
بس بالطلعه مع زوجي البس مرات بدل على حسب المكان ولبسي مومن النوع الضيق او الشفاف حتى زوجي مايتحكم في لبسي لانه واثق في اختياري وحفظي لي نفسي

الحمدالله انا وزوجي نخاف الله كثيرا مع انه زوجي شكله مو من اهل اللحا بس داخله ايمان قوي بالله ويقرا واجد من قصص الانبياء ويطبق منهم الكثير يعني ابسط مثال كنت طالعه معاه بالسياره وكانت جدامنا طابوقه كبيره واهوا شافها وتجاوزها بس صفط على جنب وراح وخرها عن الطريق علشان محد يتأذى منها ودايما يساعد المساكين وبار جدا جدا بوالديه لدرجة ان والده الله يرحمه كان مايهتم فيه كثر اهتمامه بعياله الباجي وليم تعب ابوه وطلع فيه مرض السرطان صار اهوا اللي عزكم الله يغسله ومايرضى الممرضين يمسكونه وكان ينام على الكرسي جنب والده علشان اذا يبي شيء لانه اهوى معاه في مستشفى اجنبيه خاف مايعرفون واهوى كان يترجمله اللي يبي لين الله اخذ امانته واهوى الحمدالله راضي عنه وانا وزوجي مانحب انضايق احد لو بكلمه مشكلتي مع البنات انه علشان انا مومتنقبه وزوجي مخليني على راحتي مايصير اتناقش معاهم في امور الدين كل ما اقولهم زوجي قال مثال اي حديث يتطنزون ويقلون انتو وين والدين وين قاعده اقولهم ان زوجي احسن من ازواجكم اللي ينقبونكم علشان العادات مو علشان الدين ولا ليش تقطون النقاب بالسفر ولي مزوجه مطوع وعنده بدوامه زميلات العمل ويتناقش ويضحك معاهم وليم راح ويازوجته السوق يقولها اشتري الصندل هذا علشان زميلته شاريه نفسه وين راح غض البصر قاعد يخز صندلها ومغطي مرته من فوق لي تحت والثانيه اللي زوجها مايدري عن امه ليش الناس ما طالع عيبها ومشغوله بغيرها وانا كل اقولهم يمكن انا اللي اروح الجنه مع زوجي وانتو برا يضحكون ضحكت استهزاء
ياخواتي اعضاء المنتدى انا قلتلكم نبذه قليله عن زوجي علشان تقولولي الحل مع هذه الفئه وانا اقول مو كل البنات المتنقبات مثل هذه الفئه ارجوالافاده الله يجزاكم خير

مادرى شقول بس مدام هذا أسلوبهم معاج مافى داعى تتكلمين معاهم بأمور الدين تكلمى بأمور الدنيا عشان ماتتعب نفسيتج على ناس ما تقدر ( :

الله يجزاكم خير ولاوحده ردت

يعطيج العافيه على ردج بس اللي مضايقني ان الناس مالهم إلا الضاهر

انا منقبه ومعاي بالدوام بنات نفسج مو متنقبين وماشاء الله عليهم محترمات وإذا تكلمنا في الدين نتناقش وياهم وماعمري فكرت أستهزأ فيهم او أقلل من شأنهم

الدين في القلب مو في الشكل

تجاهليهم

والله يصبرج ويعينج

هذي الفئه ماتشكل كل المنقبات في ناس فيهم جهل ومو عارفين الدين عدل

صراحه حالتج نفس حالتي
اللي معاي بالدوام ما يقبلون النصيحه ويسوون الغلط لازم ما اقولهم هذا غلط
بعد فتره ما قمت انصح ولا شي واشوف الغلط واسكت صراحه بالطقاق عندهم اهل ينصحونهم
وانتي سوي نفس الشي شوفي وسكتي عشان ما تصيرين مكروهه او منبوذه
هذي نصيحتي لج بعد تجربه

الدين مو نقاب الدين اخلاق وايد ناس مو متنقبه وشوفي اخلاقهم والهدوء واسلوب الرائعه بالحديث ويكونون محبين من الكل اما في بعض المتنقبات طبعا مو الكل اللهم لا شماته ما في اسلوب وعدم التفاهم وصراخهم يوصل يمكن لاخر الشارع حتي ضحكتهم جنا جالسين بمكان تخجلين اذا احد سمعهم والله لا يوريج المكياج يكون صارخ هذيله حبيبتي تركم افضل او بس مجرد سلام وعدم الاحتكاك فيهم يعني من بعيد لبعيد اذا شفتي شي ما اعجبج منهم لهي نفسج بشي مفيد كقراءه كتاب او قرآن كريم اوتلهين بالعمل حتي ربي يوفقج ولا بد من ان تضهرج وحده تكون انشاء الله من نفس طباعج عسي الله يحفضج انتي ويا زوجج وقولي آمين

وعليكم السلام

حبيبتي خلج ع حالج
ويا جبل لا يهزك ريح
تكلمي باللي تبين ..وانصحي ..النصيحه لله ..ويوم القيامه بتشفع لج ن شاء الله
انتي عارفه ان كلامج صح مو غلط خلاص تكلمي على راحتج ..باللي تبين
واهم الله يهديهم مع الوقت بيعرفون معدنج الطيب ان شاء الله
وانتي بصلاتج ادعي ان الله يسخر عباده لج ..ويقرب منج عيال الحلال اللي يعيونج ع فعل الخير
ويبعد عنج عيال الحرام اللي ما وراهم الا التعب والشقا
واتمنى اني فدتج و لو بشي بسيط

تحياتي لج و موفقه بإذان الله

لا تتكلمين عن زوجج جدامهم لانهم مبين عليه غيرانين منج ويبون زوج مثل زوجج

حبيبتي لا تناقشين معاهم كلش الموضوع الي تحسين كل وحده بتفلسف فيه سكتي احسلج والله انا جذي بالدوام والله مع احترامي للكل يعني مثلا في معاي مجموعه بنات او شباب من مذهب انزين او انا او جم واحد او وحده من مذهب ثاني والله انهم يتكلمون او جنهم يسمعونا واحنا والله طااااااااااااف مانحب اناقشهم عشان لا تصير بينا حساسيه ولا هوشه على موضوع تافهه او وجهات النظر ماراح تفق كلش وحنا حرام نحبهم بس شتقولين عالي جذي يناقشون بدفاشه ولازم اهم الصح انا اقوول طنشي ولا تكلمين معاهم باي موضوع بتكون نهايته طنازه

يؤؤؤؤؤؤؤ انا نفس المشكلة بس انا مو متزوجة ,, وماني مرتاحة منهم كل وحدة فيهم تبقق عيونها عالموظف الي برا حتى اشتكو منهم قالو خل ينثبرون

هذي غيرة بس لانهم موقادرين يقطون النقااب مع ان تخيلي ايي الهندي اييبب جاي ولا ماي ولا وت افر يدش وهذيل بدون نقابات

قطيعة تقطعهم قولي لمسؤولج انقلني مكتب ابروحي والله افتكي شلج بهاللاشكال

خلج بعيده عن القيل والقال والباب اللي ايي منه الريح سده واستريح خلج بحالج ومالج شغل بأحد احسن لج

وليش زعلانه ما عليج من احد دام انتي واثقه من نفسج ومسويه اللي يرضي ربج

بعدين في كلمه انتي قلتيها ما حبيتها الصراحه ((وانا كل اقولهم يمكن انا اللي اروح الجنه مع زوجي وانتو برا يضحكون ضحكت استهزاء ))

ديري بالج يا اختي تنغرين بأعمالج الحسنه اللي تسوينها ترى يمكن بكلمه تروح كلها هباءا منثورا

قولي بس الحمد الله

رايي من راي الاخت نور الدنيا

والنقاب مو مقياس لديانه اهم شي بالقلب شنوو

الله يعينج عليهم
يبا هذيل اشكالهم مو اشكال الواحد يقعد ويحترمهم ويسولف معاهم بأمور الدين
وموكل المنقباات جذي في منقبات ياحلووووووهم والله
مثل مافي السفور الزينه والشينه والمحجبه الزينه والشينه

خلج بعيده عنهم ولاتييبين طاري ريلج كلش عندهم