نصيحه : بعض المشكلات ماينفع عرضها بالمنتدى !

محد ينكر شكثر فادنا المنتدى وشكثر هالقسم فاد المتزوجات والمقبلات على الزواج والمواضيع الروعه الي تنعرض منها الي يكون بس للغشمره والضحك والترويح ومنها الي يعلم بطريقة التعامل مع الحموله

وغير الي يعلم طريقة اللبس والدلع واخذ قلب الزوج بالحركات الرومانسيه وحتى بعض المواضيع الجنسيه الهادفه ومشكلات الحياة الزوجيه البسيطه

بس في بعض المشكلات ماينفع عرضها هني لانه ممكن الحلول الي تنعرض راح تزيد الطين بله

مثل هالمشكلات الخيانه الزوجيه او رغبة احد الزوجين بالانفصال او الضرب والاهانه او البرود الجنسي هالمشكلات تحتاج حق اختصاصي في هالامور مثل استشاري او دكتور وانا افضل يكون رجل لانه اقدر على فهم الرجل من المرأه

يعني مثلا وحده جكت ريلها خانها ونزلت موضوعها اهنييه

يتها الردود :

1) تطلقي وخليه يولي

2) لاتتطلقين وسوي روحج ماتدرين

3) فضحيه وخلي الدنيا تدري

4) صارحيه بهدوء

5) جابلي سيادتج وادعيله بالهدايه

يعني صاحبة المشكله بتسمع راي منو ولا بتاخذ نصيحة منو ؟؟ ومرات الي قاعدين يكتبون الردود غارقين في المشاكل والخيانات الزوجيه !!

احنا ماعنده الخبره او حتى المعرفه التامه بجوانب المشكله ؟؟ وممكن هالمسكينه تاخذ نصيحة وحده من البنات ويكون هالشي سبب بطلاقها

هالمشكلات تحتاج القعده مع استشاري فاهم له خبره يعرف كل جوانب المشكله وشخصيتج وشخصية ريلج وبعدها يعطيج حل حكيم ويتابع معاج يوميا وممكن حتى يستدعي ريلج عشان يعرف الجانب الاخر من المشكله وصارت وايد

ياريت تتقبلون نصيحتي وتفكرون فيها عدل اذا صارتلج مشكله كبيره من هالمشكلات وان شاءالله ماتصيرلكم

اولا تلجئين لله وتستعينين فيه وتتوكلين عليه

وبعدها تطلبين نصيحة اهل الراي والمشوره

حتى رفيجاتج او امج او اي احد من اهلج لا تقوليله لانه ممكن لقلة خبرتهم يعطونج راي يودرج

وفي الختام عسى الله يبعد عنكم المشاكل ويخليلكم ازواجكم ان شاءالله