مو عارفه اسوي شي من بكاء ولدي المتواصل .

السلام عليكم
ولدي عمره شهر دايم يبكي بالذات في الليل ولا اعرف انام نهااائي وانا عندي جلسه من الصبح عشان بناتي وزوجي اسوي لهم فطور واجهز معاهم وهو يبكي والله حتى اسوي لهم فطورهم واجهزهم وانا حاملته يبكي

ارضعه طبيعي ولا يشبع من صدري مع ان فيني حليب لو بكيفه يظل بالساعات وانا جالسه ارضعه ولما ارضعه صناعي كان قبل ينام يريحني شوي الحين حتى الصناعي لما اشربه ماينام وممكن يهدأ شوي بعدين يبكي ويبي يرضع واحاول اسكته لانه يكون شرب رضعه 120 مل واتعب معاه والظهر وراي طبخ الغذا حتى لو نام شوي ماقدر انام عشان بناتي جايين من المدرسه وزوجي بعد والعصر ابتدي ادرس بناتي والليل يبتدي ولدي بكائه وسهره وش الحل تعبت والله لا نوم ولا راحه في الليل كلما ارضعه واحطه في سريره دقايق مايمديني اتمدد على السرير الا جالس يبكي ظهري انكسر من الرضاعه واذا حاولت اسكته من غير مارضعه عشان لا تتعب معدته ماايسكت جربت اعطيه ماي الحلبه ولا نفع جربت اعطيه يانسون ولا نفع انومه على بطنه يظل يكي اعطيه دوا الانتفاخ اعتقد لسمه سالينال اذا مو غلطانه الكل يمدحه الا ولدي مايستفيد منه ابد اعطيه وبعدين اسمع صوت الغازات في بطنه ولا كاني عاطيته دوا مو عارفه اقوم بشي وخايفه على مستوى بناتي مو عارفه ادرسهم ليش اليانسون الاكثريه يستفيدون منه الا اولادي حتى قبل بناتي تعبت بتربيتهم ماينامون وش الحل مع ولدي؟

حرام يمكن يوعانه تعطيه حليب والحليب ما يشبعه ترى الصناعي يشبع عطيه صناعي وقت الليل عشان يشبع وينام
وعندج ماي غريب يدوخ ويطلع الغازات
وعندج البابونج يهدي ويطلع الغازات

الله ياجرج حبيبتي هذي التربيه كلها تعب في تعب … بس انتي حاولي لاتعودينه وايد علي الشيل يعني دامه شبعان ونظيف خلاص لاتشيلينه علي طول وخلي الطبيب يعطيج دوا الغازات اللي يناسبه والله يعينج وفتره وتعدي ويكبر وتتعدل نومته

اعطيه صناعي ويشرب ١٢٠مل لين شبعته ومع ذالك ماينام يظل يحووس وبعدين يبكي ويبي يرضع اوقات احاول اني اسكته واهديه مره على اخليه على بطنه مره اهزه على خفيف ولا يفيد واوقات ارضعه مره ثانيه من صدري مع انه يكون راضع صناعي وبس اخليه يبكي ..
سنو وايت انا مابي اعوده على الشيل لكنه مايسكت اخليه في سريره ولا اشيله على طول بس يبكي اخليه فتره لكنه مااايسكت يواصل بكائه وبشده بعد حتى اوقات مو قادر يتنفس من شدة بكائه فلازم اشيله ..بالنسبه لماي غريب جربته في بناتي كأني اعطيهم ماي عادي ولا كان يفيدهم وولدي ماجربت افكر اشتري شاي للاطفال من الصيدليه ميلوبا وش رايكم فيه ؟

والله نفس بنتي جننتني وجننت الناس يقولون اول مره نشوف جذي من جبتها لحد ماصكت ست شهور وهي بجي ليل نهار والله كرهت الحمال وكل ما احمل ادعي ان ما اشوف اللي شفته صج صج تعذبت ماخليت خاص ماخليت طب شعبي كللللل شي سويته مانفع عليج بالدعاء والصبر

عاادي الطفل بالعمره دي يبكي

ليه!!!

لانها الوسيله الوحيدة الى يقدر يعبر بيها عن حاله

جعان يبكي

حران او بردان يبكي

يبي يغير الحفاظ راح يبكي

الملابس مضيقاه راح يبكي

يبي يسمع صوت امه راح يبكي

باختصار كل شي بحياه هو البكاء ليييين اربع شهور

الاول شوفي طبيب واتاكدي ان مافيه مرض لاسمح الله .. واتاكدي ان مافى مغص ولاغازات

شوفى درجه حراره الغرفه والاضاءه

خلي الدكتور ينظم لك الرضاعه بين الطبيعي والصناعي ويمكن اللخبطه بين الاتنين عامله له مغص

الله يعينج

شوفي عمره شهر وتعطينه ١٢٠ وهم مايشبع تبارك الرحمن ترا ١٢٠ جنه حق اكثر من عمر شهر فاتوقع يبجي موعشان يوعان

ولاغازات

يمكن اهوه طبيعته جذي من الله

جربتي تعطينه مصاصه ؟!؟ مع انه يفضل مانعطي عيالنا بس اذا الياهل حنان ومزعج نضطر نعطيه

وانا رايي اذا تشيلينه هم يبجي خليه بسريره احسن مومستفيده شي من شيل

وبنسبه لوقتج الضيج يبي خدامه عالاقل تشتغل للبيت وانتي اجابلين زوجج وعيالج

الله يصبرج ارقيه وشغلي القرآن يمكن يهدا

انا عيالي نفس هالطبع من اووولد لحد ما اطلع الاربعين لا طلعت الاربعين
الحمدلله يتغير طبعهم
اذكر كنت احط بنتي على رجووولي واهزهااا ومن تنااام انااام هالحجي ٦الصبح تجي امي
فديتها تاخذها والاقي رجولي متيبسه الله يعين هذي التربيه وهذا التعب مافي شي يجي بلااااش

الله يهديه لج فتره وتعدي بس انتي حاولي فيه لايناااام واجد بالنهار حاولي من المغرب يقلل نومه عشان بالليل ينام
يعني لعبيه شوي حركيه لاتمهدينه قبل النوم بساعتين ثلاااااث واذا وصلت حزة النوم مهديه تشوفينه بس
يبي ينااام*

الله يعينج البنات ماقصروا

الله يعطيكم العافيه
عندي شغاله بس تنظف وتكوي لكن ماخليها تلمس الاكل نهائي ..حاولت اعطيه لهايه ماتقبلها ابد ماركتها شيكو مادري هل لو غيرت الى نوعيه ثانيه ممكن يتقبل والا هو اصلا مايتقبل اللهايه نهائي لاني حاولت معاه وكلما يمصها ولا يطلع شي يصيح ..

الله يعينج ترى كل اليهال هذي طبيعتهم وماكو نوم بالاسهر الاولى والمحظوظه الي ولدها غير عن ولدج ماشالله
ترى الياهل بهالعمر جذيه ينام شوي بالنهار ويقعد طول الليل واذا قعد يبجي لان يبي يرضع ويبي بامبرز ويبي ينام بس

مع الوقت بتفهمين شنو يبي

انتي خلي روتين وقتي له كل ساعتين مثلا رضاعه وبامبرز والسهر لابد منه نظمي وقتج

و باليل بعد ما ترضعينه غسليه مكان الحفاظ ونقعي ريوله بماي دافي دقيقتين جذيه راح يدوخ وينعس ومهاااااد ثم مهااااد مهديه بعد الرضاعه خصوصا بالليل مهديه عدل واذا تقدرين طول الليل مهديه وبالنهار بس فجيه عشان ينام باليل اكثر من النهار
على قوله امي ايده ابجاه يعني لمن يحرك ايده يخاف ويبجي

وعطيه مصاصه ماركه avent
من مذركير او صيدليه قريبه من شكل حلمه الثدي تسكته شوي بدال البجي

انشالله مع الوقت بتتعدل الاحوال وتردين تحملين ويصير معاج نفس الموقف

الجنه تحت اقدام الامهات

اول 3 شهور اصعب مرحله واغلب الاطفال يكون سبب بجيهم متضايقين من الغازات

وديه اسعاف الطوارئ مال الاطفال شوفي شيقولج الطبيب يمكن تحتاجين تغيرين نوعية الحليب

ودوا الغازات اللي جربتيه سالينال مو شي

جربي دنتينوكس صراحه حييييل يريح استفدت عليه

عطيه لهايه ليييينه
اللي لون حلمتها اصفر

ومهديه لفيه عدل يمكن يتفزز

وياليت تغيرين حليبه احتمال نوعيه الحليب متروسه غازات ف مايرتاح

واخيرا ترى الاطفال يختلفون من واحد للثاني

فيه الهادي وفيه المزعج

موشرط تلقينه مثل بناتج

يمكن هذا يبجي علا طول طبيعه فيه

مابي احبطج

بس بنتي كانت جذي

والحين عمرها سنتين ونص

بالليل ماتعرف شي اسمه نوم كل ساعه قاعده وتتمشى فالبيت بنص الليل

الله يهديهم

اول شي عطيه دوا للغازات
ولا تعطينه اعشاب
بس حليب وماي
وعطيه مصاصه ماركه bibi
اللي علي حبه كرز راح يحبها
لان انا ولدي عطيته كل انواع المصاصات وماتقبل الا هاذي
والله يعينج

يمكن حليبه ثقيل عليه ، شنو نوع حليبه?
اذا سيميلاك ترى يسبب غازات بس انا كنت
اعطي ولدي دوا مثل ماي غريب اسمه كاز تلقينه
بالصيدليه والله كنت كل يوم احطله بالرضعه
واذا تبين ماي غريب اخذيه من المستوصف احسن

وحاولي تمهدينه بالليل عشان ينام ولاتقمتينه بالملابس حيل
ترى الولد بسرعه يحتر

ويمكن الحفاظه مضايقته شوفي اذا بجى فصخي حفاظته
اذا سكت يعني كان متضايق منها اخذيله ليبرو يمكن يرتاح عليها

وحاولي تلاعبينه عقب المغرب عشان يدوخ شوي وينام متواصل كذا ساعه

والله يعينج حاسه فيج ولدي مابدا يتعدل الا لما صار عمره ٥ شهور*