موقف بالدوام ضايقني بالحييل !!

السلام عليكم شلونكم بنات شخباركم عساكم بخير .. ما لي غير إني أفضفض لكم بهلمنتدى اللي أعتبره مثل البحر يشيل لي همومي .. أنا يا خواتي تضايقت اليوم بالدوام بقولكم الموقف ولكم الرأي والحكم بالنهايه .. دار بينا نقاش عن لجنة الميزانيه اللي كل سنه تنعقد بشهر 8 + 9 … السنه اللي طافت ما دخلتها وتركت فرصه حق زميلتي اللي ما ادخلتها وهالسنه وحده من زميلات القسم تبي تدخل نفسها غصب وللعلم ان عندها لجنه من شهر 4 الى 6 وفيها مكافأه ماليه …. و أنا ما دخلت هالسنه ولا لجنه واحتمال مو أكيد يدخلوني لجنه ثانيه بشهر 11 اذا ما تنازلت الموظفه لظروفها الخاصه !!
فالأحقيه لمنو !! لي أنا اللي اقدم منها بسنه ولا اللي تبي تدخل نفسها غصب وهي متعيينه بعدي بسنه ؟؟ شوروا علي خواتي مابي أحد يكرهني ولا يحقد علي ويقول عني أنانيه

طيب حبيبتي زميلتج عندها لجنه بشهر4و6
شكو تدخل الجنه الي انتي فيها
انا لوني مكانج راح ادخلها
وربي يوفقج

حبيبتي طالما ان رفيجتج بتدخل في لجنه ثانيه من 4-6
انا اشوف من حقج انتي تاخذين الميزانيه هالسنه وخصوصا ان اللجنه اللى بتصير اب شهر 11 مو اكييد راح تدخلين فيها

ما فيها شي وانتي الاولي لانج ما خذيتي والسالفه ما فيها زعل أخذي وأنتي مغمضه واذا كلمتج قوليلها انا الحين دوري انا الأحق وانتي خذيتي وهذا حق ما فيه زعل

والله نفس منطقي بالضبط ليش هالطمع عطي فرصه حق غيرج مع اني اقدم منها بالتعيين انا تعيينت سنة 2024 واهيه 2024

دوري واحد من مسؤلينك الحقاني زائد مرن وطرحي عليه هالموضوع وشوفي الرد وبعدين ابتعدي عن الحساسيه بالدوام علشان لا يضيع حقك ولا يستغلونك من اللي حواليك اذا اعرفوا نقاط ضعفك وتوكلي على الله ..موفقه

خليها على الله اخاف اتكلم ويفهموني غلط واطلع انا بالشينه بس ربج كريم يقسم الاقدار والارزاق وما ياخذ من عبده شيء الا و عوضه بالاجمل منه

والله يا اختي لو تكلمت بتنقلب علي هم الميزانيه بس ما اقول الا حسبي الله ونعم الوكيل

متردده ادخل على المراقبه واكلمها او اسكت لما الله يكتب امرا كان مفعولاا لييه الحيين الجدال بينااا ما تشكلت اللجنه واعضائها

حبيبتي استخيري اذا تدشين السنه والا لأ
اذا الله كاتب لج بتتسهل أمورج واذا لأ ربي بيصرف عنج الموضوع وبتكونين راضيه
وكثري من الاستغفار
وموفقه حبيبتي

أستخيري احسن انج تدشين هاللجنه او تتركينها
وان شاء الله ربي بيسخر لج الخيره

امبي حرييييييييييييييتيييييييييييييييييييييييييييييني !!!

حبيبتي حياتي انتي الطيبه هالايام ماتنفع !!!!

ان شاء الله كل ماايي دوورج تطوفينهم !!!

الزماله والصداقه شي والحق شي والحق ماينزعل منه !

صج الله كاتبلي والله مقسم الاقدار والارزاق بس هم الانسان مهمته انه يسعى ويدافع عن حقه واذا الله ماكتبه له خيييره

بس مو الخيره اني احط ايدي على خدي وانطر الرزق !!!

شوووفي حبيبتي ماتخسرين احد هذا حقج وعرفي اذا بتزعل يعني اهيه ماتحبج الخير ولا تعدج صديقه او زميله ولاا ماهمه مايهمني !!!

دخلي على المراقبه وكلميها بهدووء وجنج ماتدرين عن رفيجتج وقوليلهاا اناا بحاجتهاا وابيهاا ( كخبره وكاستفاده وكاحقيه ) واذا رفيجتج كلمتج قولي بضحك ( يلله عن النحاسه لجنتج بتييج وهذي من حقي وانا اتمنالج الخير بس بصراحه انا بحاجتهاا وحيل خاطري فيهاا والله يعوضج )

لاا تتنازلين عن حقج ترااا هذاا ( ضعف ) !!

واستخيري وادعي ربج وسووي اللي عليج لا تسكتين لان بياكلون حقج فيه ناس توديج البحر وتردلج نااشفه ماينفع اسلووبج والطيبه اللي تتعاملين فيهاا مع اهلج واحبابج الدوام مصالح وعند مصلحتهم بيسحبون عليج !

يارب يارب يارب اذا فلوس اللجنه فيها خير لي يالله انك تكتب لي فيها

جزاج الله خير حبوبه

أشكرج يا غلاتي على الكلام الطيب اللي أثلج صدري اقتنعت بكلامج 100% عسى ربي ينولج مرادج ويعطيج على قد نييتج جانج نفستي عني كربتي وانا باذن الله الواحد الاحد باجر الخميس بدخل على المراقبه وبقولها مثل ماقلتيلي ( اللهم ملكني قلبا من احوجت اليه )