بسم الله الرحمن الرحيم
والسلام عليكم ورحمة الله وبركاته
اولا انا عارفه ومتأكده ان موضوعي راح يلقى اعتراض من طرف مثل ما انا متوقعه انه يلقى موافقه وتأييد من الطرف الاخر
المهم ادخل بالموضوع وما اطول عليكم بس الاهم اني حييييل ودي اعرف راي كل وحده منكم بالموضوع
امهاتي وخواتي وحبيباتي عضوات المنتدى
طبعا الكل لاحظ في الفترة الاخيرة المبالغة في تكاليف الاعراس والمناسبات لكن هذا مو موضوعنا
موضوعنا هو المبالغه الشديده جدا في سالفة الاستقبال اللي ادعي لكل وحده ان ربي يكفيها الشر
في وقتنا هذا يدوب الوحده تتفرغ حق بيتها او دوامها وزين تلحق حق جهاز البيبي وتقريبا حده حده تسوي جنطة المستشفى
واذا ولدت الله يعينها خياط وعوار وتعب واكتئاب ورضاعة وكله بأجره بإذن الله
اصلا والله مرات الوحده حتى مالها خلق احد يجي يزورها تحاول تصيد الدقيقه اللي تنام فيها والا انتو شرايكم بتكابرون وتقولون الولاده سهله والبيبي مايبيله شي بقول ما شاء الله عليكم بس كل وحده غير الثانيه
طبعا هذا من باب التعب والارهاق والوقت
ثانيا من باب الحرص
قبل لما الوحده تولد حتى لو فيها شوية عافيه وجاها زوار ما تبالغ بقومتها وقعدتها عشان تخاف على نفسها من العين طبعا الحين الصالون واللبس والمكياج والكشخه اللي تنقلب على راعيتها
ثالثا من باب الاسراف
الاستقبال صار يبيله ميزانيه كبيرة جدا يدوب الكفر والمفرش والقميص وطقم البيبي هذا غير الاستاند والتوزيعات والفطاير والحلو وال…..الخ الخ
ويا ريت الناس عاجبها تطلع وتقول لو في جذي كان صار احسن
لو انه مو حاطين …ولو كانو زايدين …ولو… ولو ومحد خالص.
وطبعا مافي وحده ما مرت عليها لو قصة من القصص اللي نقراها بالمنتدى ونسمعها من برة بس من عيون الناس اللي ما يجي من وراهاخير
الله يعين هاذي وحده من عقب استقبالها وماهي بخير من مرض لمرض والثانيه البيبي دش المستشفى وانتكس
والثالثة والرابعة والخامسة وماحنا خالصين
وما قولكم كله من عيون الناس
لا
لكن الاسراف والتبذير بحد ذاته ينخاف من سخط ربي علينا بعد هالتبذير
وانا شخصيا لما اولد اللي تبي تجي تبارك وتسلم وتهني وتتطمن وتاخذ اجر عيادة المريض حياها الله
واللي تبي تجي عشان تشوف شحطينا وشلبسنا وشسوينا لا تجي ابرك لان اكيد كل بيت يعرف الاصول والواجب وحسن الضيافة وتكريم الضيف بس الشي اذا زاد عن حده انقلب ضده
والمحلات والتجار بس يشوفون الناس يبون شي يصيرون يبالغون والله صار تبذير كفر ب500 واذا مع مفارش واستاند يزيد السعر واذا واذا وهات يا حسبه
حبة الكاكاو مادري بكم
وعلبة الكاكاو مستوردة من برى
وقميص الاستقبال شغل يدوي
وهات ياحسد وزيدي ياذنوب
الوحده توها مواجهه ربها بالولاده وكان بينها وبين الشهادة انها تموت ودعوتها مستجابة ويكفي اجر الطلق والولاده وبعد كل هذا يضيع بالاسراف والمبالغة على شي لا يعجب ولا راح يعجب حتى لو تحط اللي قدامها واللي وراها
طبعا انا مو ضد ان الوحده تحجزلها مثلا انواع الحلو والفطاير ومع جهازها تشتري قميصين ذربين حق الزوار والظيوف بس بدون هالمبالغة الزايدة اللي الكل ملاحظها
واتمنى وجهة نظري ما تكون زعلت احد لان اول وتالي الاختلاف في وجهة النظر لا يفسد للود قضيه لكن الاهم اني ودي اعرف رايكم
فهي وحده من الثنتين يا اما تقنعوني او اقنعكم
وبالنهاية ما بغيت الا مصلحتكم
وسامحوني على الاطاله
والسلام عليكم ورحمة الله وبركاته
كلااااااااااااااااااااااامج عين العقل والله
تسلمين والله كلامك كله درر
وكلامك في محله ليش الأسراف والتبذير والركض وراء المضاهر الكذابه
انا من ناحيتي بكل تواضع راح ارجع لعدات امي وجدتي في طريقة استقبال المولود الجديد والضيوف اللي يبون يزوروني
انا معاج مو حلو الاسراف الزايد وبصراحه كل شي ان زاد عن حده ينقلب ضده معروووووووووف ياااااااحلات الشي البسيط والذرب ومن غير مبالغه حتي له منظر احلا بس فيه ناس تحب الاشياء الفخمه والغاليه معني اشوف فيها مبالغه في هالايام مادري هذا راي الشخصي
صح لسانج
انا اشوف ماله داعي
يعني الزم الناس تعالوا بهاليوم المحدد يمكن ما يقدرون عندهم ظروف
في وحده من ولاداتي وحده شارت على انه اسوي استقبال قلت حق امي ماله داعي يمكن ناس مايبون ايون واحرجهم بالدعوه
اللي يبيه اهلا وسهلا واللي مايبي اييه براحته
والكفر اختي موريتني طقم بمبلغ وقدره
قتلها لو اول ياهل لو عندي مشكله بالحمل وغصب حملت جان اي اخذه بس هذي مو اول ولاده لي واشوف انه ما يسوى
واللي بقطه علىة الاستقبال اسافر فه او احجز بفندق ويا ريلي ابرك
وانا ايدج بكل كلمة قلتيها
والله عدل كلاج شي مبالغ فيه هالايام
كلامج والله العظيم صح وبارك الله فيج وان شاء الله كل وحده تتعظ من هالكلام
صح كلامج
انا معاج باللي قلتيه انا وحده قطيت شوي وشويات من كفر وطقم المفارش وكماليات والقميص تصميم ولويه والحلو من افخم محل بالديره والتوزيعات ثلاث اشكال مختلفه وكل واحد كلفني ضعف الثاني والبالونات والورد والتزين والفناتق والله يمكن خسرت 1500 دينار واخرتها تعسرت ولادتي وولدوني قيصريه عقب ماشفت الموت وياني عذاب القيصريه والخياط والقومه والقعده والناس عقب اللي سويته ماعطتني خير طول نفاس تعب بتعب والياهل كان كل شوي يتعب-والله لو قاطه الفلوس بتبرعات صدقات جان ابرك لي بس الحمدلله استفدت
صح لسانج
واااايد مبالغ فيه
كلامج
عدل
وعين العقل
حلوة فناتق الاستقبال
بس مو المبالغ فيها
يعني فناتق الشكر اوكي
بس ما يكون ملون
مااحبه ملون
والحلو يكون شي راقي
والكفر شي حلو وراقي
بس مو مبالغ فيه
هذا رايي الشخصي
صح لسانج كل كلمة كتبتيها صح مئة بالمئة …
صح كلامج وعين العقل اساسا ماله داعي استقبال خفيف بالبيت بعد اسبوع من الولاده احسن
تم التصويت شي لابد منه
بوقتنا هذا لازم استقبال بس مو المبالغ فيه طبعا
الاستقبال انها تحدد يوم او اثنين وترتاااح باجي الايام من الدوووخه وعوار الراس وكل يوووم تلبسين وتكشخين للناس
خلي الكشخه يوم او اثنين اوحتى في ناس يحطون يوم بالاسبوووع بعد حلووو وترتاح طووول الايام
بس مو الاشياء المبالغ فيها من كفر ولبس وتقديم
هذي وجهة نظري انا
غلا مطير