|
|
بسم الله الرحمن الرحيم
السلام عليكم ورحمة الله وبركاته
مساء الورد والياسمين
شلونكم ابلات شخباركم؟
وشلون التصحيح والمراقبة معاكم..؟
طبعا انا توني مترشحه للتربية وللحين ماخلصت المقابله والامتحان يعني ماراح اباشر عمل الا شهر 9 انشالله
دعواتكم بليـــز..!
والحححين بدش بالموضوع بصراحه طرت على بالي فكرة
كل ابله تكتب لنا المواقف اللي صارت لها داخل الصف مع الطالبات
سواء موقف خلها تضحك او تعصب او تنرفزت
ونشوف شلون كانت ردود افعالكم وشلون تتعاملون مع الطالبات خاصة المشاغبات
وعشان كلنا نستفيد..!
وانششاله الموضوع يعجبكم …خلونا نضحك ونشوف سوالف البنات …!
لكم كل الحب والتقدير والاحترام وزهور اللافندر..!
تحياتي لكم..
—
موقف ثاني. كنت قاعدة اعطي درسي واكتب على السبورة جان وحدة من البنات تييني وتقولي ابلة بروح الحمام.. جان أقولها باقي 10 دقايق تحملي جان تقولي ابلة ماقدر فيني ز__ ___ ___
تخيلي نفسج مندمج بالدرس وتيييلج بنت وتقولج جذي!! بعد الحصة قلتلها ماما حبيبتي مرة ثانية لي بتروحين الحمام وبتسوين شي
قولي بسوي بي بي مو تقولينها بالكويتي ترا يعيبون عليج…. انا امبي انصدمت على فيني ضحكة.. لووووووووووول صج صج يومها رجعت البيت ومت مت من الضحك وقلت حق اهلي وماتوا ضحك..
بقرا و لمن اذكر موقف معين بييلكم
|
المشاركة الأصلية كتبت بواسطة منال القلب
 اذكر مرة كان عندي الحصة الأولى. بالطابور البنات كانوا شياطين ويسولفون وانا كل شوي اسكت فيهم. المهم قلتلهم بس ندخل الصف انا أوريكم وكنت حدي حدي معصبة. بس دخلنا الصف قعدوا جان اقولهم انتوا تفشلوني .. بس تحبون السوالف .. بعدين أبلة منال يعاقبونها ويقولون ان صفها مزعج.. واقولهم هالكلام وانا حدي منفعلة مرة وحدة جان أتذكر موقف صارلي مع اهلي وكان يفطس من الضحك وااااااي جان اضحك ما قدرت أمسك نفسي والصف كله ضحك معاي…… برستيجي كله اخترب ههههههههه
— موقف ثاني. كنت قاعدة اعطي درسي واكتب على السبورة جان وحدة من البنات تييني وتقولي ابلة بروح الحمام.. جان أقولها باقي 10 دقايق تحملي جان تقولي ابلة ماقدر فيني ز__ ___ ___
|
هههههههههههههه
ياربي على البنات والله سولفهم تضحك
خاصو وقت العصبية مرات ماتقدرين تمسكين نفسج
حياج منورة
اشلون راح يكون التعامل معاهم
لان بمقابلتي امس قالو لي اذا نجحتي بنحطج بالثانويه لان في نقص!
والله بنات الثانوية
اذا عطيتيهم ويه من اول يوم بيلعبون
لكن اذا بديت معاهم بالجد والعين الحمرة بيتسنعون
انا اذكر عندنا ابلة بالعربي كانت ادرسني
اذكر اول يوم دشت علينا قلنا حليوة وتهبل وفعلا روحها حلوة ومتواضعه بس وقت الجد والدراسة ماعندها يمين ويسار
كانت امشيتنا سيدااااااااا
بس الله يرحمها توفت بحادث سيارة
اتقول وهيا بالحصة اول مادشت السلام عليكم
وكانت فيه بنية مشاغبة موجودة
وبعديين لفت تبي تكتب العنوان
يوم لفت ويها ولا البنية مو موجودة
اتقول حق البنات وين فلانة
البنات يطالعون بعض و يقولون ماندري خايفين لوول
المهم كتبت اسمها علشان اتبلغ الادارة
شوي ولا واهي تشرح لفت ويها تكتب مسالة
لفت ويها ولا البنية موجوودة @@@@@@@@@@@@@@@@@@@@@@@@@@@@@@@@
اهنيي عصبت
وينج ليش طلعتي
جان البنية اتصرخ و اتقول ابلة شفييج انا موجودة طول الوقت بنات بنات قولوولها
تخيلو طلعت الابلة مينووونة ؟؟؟؟؟؟؟؟؟؟؟؟؟؟؟؟؟؟؟؟؟؟؟
عصبت زوود وقفتها عالطوفة
بعديين يوم خلصت الحصة نادت اذرب بنية بالصف و قالتلها وين كانت
جان اتقول منخشة ورا الباب تبي اتسوي فيج الحركة
@@@@@@@@@@@@@@@@@@@@@@@@@@@@@@@@@
شرايكم ببناتنا
ههه الله يكون في عوننا .,
لا والا بقولكم سالفه رفيجتي
عقبال مااقولكم سوالفي
تخيلوا تقول وظفوها على لافاينل يعني للحين ماعرفت البنات عدل وشنو مااايتهم
وتقول وانا اراقب بالامتحان والا تقول وحده ابله اشدعوا خلينا نغش نشاعد بعض عادي
وتزفهم وماكو فايدة
خوش موضوع
اول ما تعينت
طالبات صفي يسالوني عن اختي بعمرهم بس بصف ثاني
يقولون لي تعرفين فلانه اللي بالصف الفلاني
او يقولون في وحده بالصف الفلاني واااااااااااايد تشابهج
و اهي اول ما داومت مو مقصرة فيهم كانت
تخيلو مثلا اخليهم يصفون طابور بنروح المختبر و تلاقون جم وحده ورا يسولفون
واهي واقفه بره صفها مو ياية ابلتها ليلحين
تخزهم تقول لهم اوريكم تسولفون هااا
اختي بدعت معاي
اول ما تعينت كان وقت امتحانات الفترة الثالثه
و حطوني مراقبه على صف اختي
و البنات حسبالهم اني من النوع اللي يساعد الاوادم
جان من البداية قلتلهم كل وحده و مجهودها ماكو واسطات
و انا افتر بالمراقبة طبعا لازم اضطر حتى افتر صوب اختي معاهم
فمن اوصل صوبها الاحظ عيون البنات تتجه صوبي
حسبالهم بعلمها شي
و من اخلص جولتي و اوقف جدام
يطالعوني و يبتسمون يعني ما غششتيها
تنرفزني هالحركة وايد
ايام الميداني
بيوم من الايام الصف السادس سووا هالحركة و بعدهم بجم اسبوع الصف السابع
عاد شسويت معاهم
قلت سولفو على راحتكم درسكم مشروح و ماني عايدته
عاد المشكله ان دمهم بااااااااااارد الا الشطار
لا ابلة تكفين كملي شرح
و الا اللي نص و نص و الا الكسالى ما همهم شي
اقعد عالكرسي و يكملون سوالف يبطون الجبد
بس اضطريت بالمرتين اكسر كلمتي و اعيده لان اول درس بالفصل و مبني عليه دروس ثانية
و الصف مو صفي
اول ما طقيت الباب و سلمت و استأذنت الابلة
و علما تيي البنت
الا اسمع البنات يقولون حق الابلة
ابلة شوفي الابلة جنها طالبة معانا
جان اطالعهم باستغراب
مرة من المرات توني في بداية الايام اللي ادرس فيها
وحده من الطالبات من بداية الحصة لي تقريبا نصها و مو راضية توقف شطانه
اخير شي سبت رفيجتها بصوت عالي
يعني من مساع لا فايد معاها خز
و لا تنقيص درجات و لا كلام
نرفزتني عدل
جان اقول لها يا فلانة نزلي عند الوكيلة
جان تقول
ماني نازلة
على اي اساس انزل؟
جان اقول لها لو سمحتي نزلي عند الوكيلة
ترد تعيد
قلتلها عيل طلعي مع رائدة الصف و روحي عند رئيسة القسم و خل تقول لها شقاعده تسوين
قالت و ليش اطلع مع رائدة الفصل انا ادل بروحي اروح
قلتلها توكلي
و قاعده اكمل شرح
يايتلي بكل استهزاء تضحك
و تقول مو موجوده بالقسم
:
قلتلها قعدي و ورا الحصة تعالي معاي
قعدت شوي و قاعده اكمل شرح
شوي الا تيي رئيسة القسم قالتلي شفيج شصاير قايلين لها الابلات ان تبيني
جان اتبلعم و اقول ما في احترام بالصف و عيني كانت حزتها مغرقه بالدموع
بس ليلحين مو نازله
جان تقول لي روحي القسم
و اقعد ابجي ——> عاد انا شنو يسكتني
و اهي ظلت عندهم باقي الحصة تقريبا 10 دقايق
كلمتهم
و من يومها البنت ماشيه سيده معاي
ماني عارفه شلون اتغلب على الاحساس المرهف مشكله