مهمومه؟ متضايقه؟ مكتأبه؟ مالج الا الله ثم قيام الليل

السلام عليكم ..

كنت قبل فتره حاطه موضوع عن كيفية صلاة قيام الليل ..

و رديت قريته لقيت انه في غلطه مطبعيه بدعاء قنوت الوتر بكلمه وحده .. فماقدرت اعدلها لانه صار فتره على الموضوع .. فقلت ارد اكتب الموضوع من اول عشان لا يصير في اغلاط ..

اعذروني عالغلطه المطبعيه .. وهذا الموضوع مره ثانيه :

اليوم يايبتلكم طريقة صلاة الليل (قيام الليل) لانه دورتها في المنتدى ومالقيتها ..
وبعد ما سويت بحث وسألت اللي اكو واللي ماكو و بديت اطبقها كل يوم تقريبا عشان الله يساعدني ويفرج همي قلت ليش اصير انانيه خل احطها حق خواتي وانشالله راح يستفيدون منها و يدعونلي

بسم الله نبدي ..

كلنا نعرف انه لصلاة قيام الليل فضل كبير و عظيم للمسلمين ..

وهي شاهدة ( لجفاء الجنب عن المضجع ) حينما دعونا ربنا خوفا وطمعا ..

قال تعالى …
( تتجافى جنوبهم عن المضاجع يدعون ربهم خوفا وطمعا ) .

فما أعظم ان نقف في جوف الليل بين يدي الله متضرعين باكين … متذللين خاشعين … نناجي رينا ونستغفره من الذنوب التي اقترفناها في النهار … ندعوه ونتوسل اليه ان يرزقنا مانريد ..

فصلاة الليل من المستحبات والسنن المؤكد …

وقال صلى الله عليه وسلم : " من خَتم له بقيام الليل ..ثم مات فله الجنة "..؟!

وقت صلاة الليل:

ممكن ان تصليها بأي وقت من بعد صلاة العشاء الى قبل صلاة الفجر

ويفضل تأخيرها ..

طريقة صلاة الليل:

صلاة قيام الليل تكون اما بصلاة ركعتين او 4 او 6 او 8 او 10 او 12 ركعه و بين كل ركعتين نقول التشهد و نسلم ..

ونختم صلاة قيام الليل بركعتين الشفع و ركعة الوتر

انا راح اتكلم عن ال 10 ركعات +الشفع +الوتر لانه الرسول صلى الله عليه وسلم كان يصلي 12 ركعه اللي اهما 10 + 2 الشفع و يختم صلاته في ركعة الوتر ويصير مجموعهم 13 ركعه لكن مافي مانع لو تصلون 2 او 4 او 6 او 8 ركعات بدال 10 اللي تكلمت عنهم

المهم ..

صلاة ال10 ركعات هذي مثل ماشرحتها قبل عاديه نفس صلاة الفير .. تصلون ركعتين و بعدين التشهد و تسلمون و تردون تصلون ركعتين ليين تخلص ال 10 ركعات

بعدها تصلون ركعتين عاديين بنية انه بتصلون صلاة الشفع و اهيا ركعتين عاديه نفس صلاة الفير .. بس يسمونها صلاة الشفع ..

لكن في اضافه احب اقولها انه من الافضل في هالركعتين تقرين:

في اول ركعه : سورة الاعلى "سبح اسم ربك الاعلى …. "

وفي ثاني ركعه: سورة الكافرون "قل يا ايها الكافرون…."

بس عادي لو تبون تقرون اي سور ثانيه .. لكن هذا اللي كان رسولنا الكريم عليه الصلاة والسلام يقرأه في صلاة الشفع ..

يبقى الحين عندنا خاتمة صلاة الليل واهيا ركعه وحده و يسمونها صلاة الوتر ..

وهذي الصلاة ركعه وحده يفضل انه نقرا فيها سورة الاخلاص مثل ما كان يسوي الرسول عليه الصلاة والسلام .. لكن فيها اختلاف شوي
انه بعد ما تقرين فاتحة الكتاب و سوره صغيره (يفضل الاخلاص) وتركعين بعد ما تقومين من الركوع تقولين دعاء يسمونه دعاء قنوت الوتر وهذا اهوه:

" اللهم أهدني فيمن هديت ، وعافني فيمن عافيت ، وتولني فيمن توليت ، وبارك لي فيما أعطيت ، وقني شر ما قضيت ، فإنك تقضي ولا

يقضى عليك ، إنه لا يذل من واليت ،[ ولا يعز من عاديت ] تباركت ربنا وتعاليت "

" اللهم إني أعوذ برضاك من سخطك وأعوذ بمعافاتك من عقوبتك ، وأعوذ بك منك لا أحصي ثناء عليك ، أنت كما أثنيت على نفسك "

" اللهم إياك نعبد ، ولك نُصلي ونسجد ، وإليك نسعى ونحفدُ ، نرجُو رحمتك ، ونخشى عذابك ، إن عذابك بالكافرين ملحق ، اللهم إنا

نستعينك ، ونستغفرك ، ونثني عليك الخير ، ولا نكفرك ، ونؤمن بك ونخضع لك ، ونخلع من يكفرك "

اللي مو حافظه الدعاء تقدر تمسكه وتقرا من ورقه عادي مافي اي اشكال .. بس طبعا يكون احسن لو الواحد يحفظه

بعد ما تقرين دعاء قنوت الوتر ممكن تقرين اي دعاء بخاطرج ..

وبعدها تسجدين مرتين و تقولين الشهادتين و تسلمين

وبعد ما تسلميين تقولين هالدعاء

" سبحان الملك القدوس" ثلاث مرات وفي المره الثالثه نقول رب الملائكة والروح ونعلي صوتنا فيها

وبجذي تكونين خلصتي من صلاة قيام الليل ..

بس في شوي اضافات ودي ازيدها من عندي و انشالله بتكونون مأجورين فيها ..

حلو انه بعد ما تصلين وتخلصين قيام الليل تمسكين المصحف وتقرينلج شوي لو صفحه وحده .. وبقولكم اللي انا اسويه لازم كل يوم اقرا سورة "يس" لانه لها فضل عظيم وتريح القلب و تخلي الله يعطينا حاجتنا ويحقق اللي في بالنا..

وتمو اقرو قرأن ليما يأذن الفير (الاذان الاول) بعدها ابدو ادعو كل اللي بخاطركم ابجو و طلعو اللي في قلبكم كلهههههههه لانه بهالوقت بين الاذان الاول والاقامه وقت استجابه انشالله ..

وبعدها عشان ترتاحوووون عدل عدل عدل صلو ركعتين سنه قبل الفير و صلو الفير و نامو .. وبتشوفون الراحه

وانشالله الله بيعطي كل واحد على قد نيته ..

وبنات امانه كل وحده تقرا هالموضوع ابي منها طلب

انا طمعانه بدعاء حلو منكم

ابي تدعونلي هالاشياء: <– تتشرط بعد لول

1- يجازي اللي ظلموني ويبرد قلبي فيهم

2- يريح قلبي و يشيل الهم اللي فيني

3- يحقق كل اللي في بالي

ادري بتقولون طماعه بس انتو كرمه وانا استاهل صح

وهاكم مني دعوه .. يالله يارب يا كريم ياقادر على كل شي
تحقق اللي في بال كل وحده من خواتي وتعطيها كل اللي تبي وترزقهم الخير

اللي ماعندها عيال ترزقها الذريه الصالحه

واللي عندها عيال تباركلها في عيالها و تخليهم لها و ماتحرمها منهم ولا تحرمهم منها ..

واللي مو متزوجه ترزقها الزوج الطيب اللي مافي مثله ويرحمها و مايعذبها..

واللي متزوجه يارب يهديلها زوجها و يسخره لها دايما ومايشوف غيرها طول عمره ..

ويخليلكم امهاتكم واباءكم و كل اعزاءكم و يرحم اللي ماتو و يصبركم ويعوضكم خير عن كل شي فقدوت بالدنيا

ويوخر همومكم و يوسع في رزقكم و يبعد عنكم الناس الشريره و يسخرلكم كل العالم ..

ويجازي كل اللي ظلموكم و يبرد قلبكم فيهم

ويعطيكم على قد نيتكم يااااااااااااااااااااااااااااااااااااااااااااااااا ااارب

اي سؤال تبونه انشالله ماراح اقصر لو اعرفه واذا تبون اعيد شرح شغله مو مفهومه انا ماعندي مانع ومابي شي غير الدعاء والاجر من الله

وسامحوني عالقصور

ملاحظه: لكم الحريه في نقل الموضوع لتعم الفايده و يزيد الاجر ان شاء الله .. بس لي رجاء امانه انه اذا نقلتوه تطلبون من اللي يقرونه انه يدعونلي .. حدي محتاجه الدعاء

مشكـــورة ياقلبي ..

والله يجزاج خير و يحقق لج كل دعواتج و يعطيج على قد نيتج يا رب …

جزاج الله ألف خير على الموضوع المفيد وانشاءالله بميزان حسناتج
وكان ودي انزل موضوع اسأل فيه عن كيفية قيام الليل ولقيت موضوعج الكافي والوافي
عسى الله يوفقج وينولج اللي ببالج وينصرج على اللي ظلمج آآآآآآمييييين يارب العالمين

حبيبتي بغيت استفسر عن شغلة
لما نخلص من صلاة الوتر نقول (سبحان الملك القدوس ) ثلاث مرات وفي المرة الثالثة تكون بصوت عالي ونقول ( رب الملائكة والروح ) بس بالمرة الثالثة وإلا في كل مرة من المرات الثلاث ؟
لأن سألت اختي وقالت بس في المرة الثالثة نقول (رب الملائكة والروح ) بصوت عالي فما ادري صح وإلا لأ ؟

العفو حبيبتي ..

و تسلمين على الدعوه الحلوه ..

امييين يارب

بعد عمري مشكوره ماتقصرين عالدعوه ..

الله يتقبل يارب

اي صح .. و الدليل على كلامج هذا ..

ـ كان رسول الله صلى الله عليه وسلم يقرأ في الوتر {سبح اسم ربك الأعلى}و{قل يا أيها الكافرون}و{قل هو الله
أحد}فإذا سلم قال (سبحان الملك القدوُّس ثلاث مرات و الثالثة يجهر بها ويمد بها صوته ويقول ربَّ الملائكة و الروح) ـ ـ

وانا وضحته اكثر بالموضوع عشان الكل يفهم هالنقطه

مشكوره على النصيحه حبيبتي و الله يعطيج العافيه و كلامج كله صح

تسلمين على المرور الحلو

الله يوفقج يارب

جزاج الله خير حبوبة

والله ما كو احسن من قيام الليل

انا فعلا مطبقتها حتى لو ركعتين

واتصدقين قبل ما أنام أطلب من ربى انى اقعد حق صلاة الليل

وماشاء الله جنه أحد يوقظنى

واتيدد واصلى وانا مرتاحة

عموما عسى ربى يحقق دعائج ويغفر للمسلمين والمسلمات

ويرحمنا برحمته ويظلنا فى ظله

اااااااااااااااااااااااااااااااااااامين يارب العالمين

مشكوره على ردج ..

وانا بعد نفسج لما اكون وايد تعبانه هم اقول دام اني تعودت اصليها كل يوم عالاقل اصلي ركعتين ..

الواحد لو تعود على هالصلاة تصير وايد سهله بالنسبه له و اذا نسى .. يحس انه في شي ناقصه ..

الحمدالله .. شغله حلوه الواحد يتعود عليها ..

نصيحه بنات جربوها منتو خسرانين ..

اهيا بنظر اللي ماجربوها يمكن طويله لانه القرقه اللي انا كاتبتها يمكن تمللكم ..

بس اهيا بسييييييييطه .. لا تغركم قرقتي انا كتبت جذي عشان افصلكم كل شي ويكون سهل التطبيق

مشكـــورة ياقلبي ..

والله يجزاج خير و يحقق لج كل دعواتج يا رب يا كريم

العفو حبيبتي ..

ومشكوره عالدعاء الله يتقبل يارب ..

حياج الله

مشكوره وجزاج الله خير وانا اصليها جذي بس اقرأ سورة البقره حيل اطويله ادري بس احب اقراها ومشكوره

[جزاك الله خير وجعل الله هذا العمل في ميزان حسناتك
يوم لا ينفع مال ولا بنون إلا من أتى الله بقلب سليم

يعطيج العافيه عالموضوع الحلو ..

ومشكوره عالدعوه الحلوه

والله يفرج همج ويفك كربتج ويريحج دنيا وآخره اللهم آميييين