منو الغلطان آنا ولا زوجي

مرحبا بنوتات والله من زمان اتابع ولا لي خلق اشارك واكتب من الروتين المتعب وخاصه اني اتصفح من تليفوني لكني اليوم قررت اكتب لاني احساسي ان حياتي بتنهدم بسبب المكابره ماادري مني ولا من زوجي

المسأله متعلقه بزوجي يقولي انتي تحبين النوم ولا تقومين مبجر لاني اسهر بالليل مافيني نوم ,,,,,,
ولانمت اقوم الظهر غصب من صيحته طبعا يقول للحين نايمه وعيالج يانايمين معاج ولا قاعدين بروحهم الخدامه تلحقهم ولا يلعبون بدون لاياكلون ثاني يوم احاول واقوم واسوي هالاحتياجات لكن الصراحه انها تكون بكسل وحب العمل ماادري شلون اربطهم والمشكله ان بناتي الان اثنينهم وحده بالمدرسه والثانيه بالروضه والمشكله ان زوجي لاكلمني بالموضوع ومن كثير مايكلمني عن نومي مليت وساعات اعصب بسبب هالشغله وارد ردود بايخه وانا عارفه انها غلط لكني اكابر ولا عارفه ليش وطبعا هالفتره انا باجازه لمدة شهرين واوقات الدوام دايم اشوفه ينتقدني ويحبطني اني كسوله وهي فعلا فيني ومو لايقه لها حل وخاصه اني مثل ماقلت داخله على حياة جديده بدراسة بناتي فهل زوجي غلطان بدقته من هالناحيه ولا انا غلطاني لاني مااسمع نصايحه واكابر ولاني اشوف اغلب الحريم مايحرصون مثلي ودايم تاركين عيالهم واشوف نفسي احسن منهم

منو ماره بنفس الظرف وتفهم اللي ابي اوصله ولا وصلته

اختكم

حبيبتي فحصي الغده عندج لانه من عوارضها النوم الوايد

2- واذا صحيا مافيج شي

الغلط راكبج من راسج الى رجولج

اجل متزوجه وعندج عيال

نظمي يومك على مستوى حياتك يعني

اذا عروس نامي واصحي على كيفك

واذا جبتي عيال مجبوره تنظمين وقتك

يعني الزوج له حق فيج والعيال لهم حق فيج واحنا بالمنتدى لنا حق فيج

بس وين المهم ؟؟؟

1- الزوج والعيال

لا تعطينه فرصة يلقى عليج زلَه

لا تكابرين

بالعكس

قولي له

معاك حق تزعل وتتضايق

انا مصختها وحقك عليي

بس يمكن نومي من حبوب منع الحمل او فيني غده وهذه احد اعراضها

واوعدك انظم نومي ووقتي لك ولعيالي

من عندي غيركم

<<<<نفس الكلام اللي قلته تروحين تقولين له سمعتي

ترى لو انتي جنتي جان قضبتج الباب

نوم نوم نوم

وبعدين

تبين الصراحة

لاا والله ريلج مو غلطاااااااان

الغلط عليج لاا تزعلين

يعني مو حلوة يقوم الريال يلقى مرته نايمة يروح ويرد يلقاها نايمة

يطلع الصاله يلقى اليهال يلعبون مع الخدامة

ماتغدوا ماكلو ماغسلو مابدلوو

اكيد بيعصب معاه حق ومليون حق

الحلوو انج حاسه انج غلطانه خلااص بادري بالخطوة الاولى

دوسي على نفسج وقووومي

الحياة مو على مانشتهي ولاا بمزاجنا

وراج بنات بيدشون مدارس منو بيسنعهم ويريقهم ويبدل لهم!!

لااتخلين لريلج مأخذ عليج

والله يعييينج

ريلج المفروض يكون جنتل اكثر ويقولج بطريقه حلوة ماتنرفز بس بصراحه حرام اليهال ينحرمون منج وبس الخدامه ادابج وراهم فانا انصحج انج تحاولين ترتبين نومج وتقضين وقت اكبر معاهم –وحاولى هلمرة تفاجاين ريلج لمن ايدش يلاقيييج موجودة مع اليهاهل عشان يغيررايه وسلامتج

انتي الي غلطانه من راسج لي ساسج وزين الريال مستحمل لي الحين شنو اهو مزوج زوجة ولا (تنبل) اسمحيلي عالكلمة بس حريتيني وشلون بيدج طيرين ريلج منج يا حبيبتي والله لو منتي تمونين وعادتج مثل اختي ما قتلج هالحجي يعني الريال شنو يبي غير المرة تقعد وتجابله وتهتم فيه وبعياله انتي لا بعياله الا الواحد يعذرج ولا فيه انا اقولج لحقي على ريلج وحياتج قبل لا تيي وحده تستلمهم بدالج ووخري عنج الكسل منو منا ما يحب النوم لا تعلمين انه حياة الزواج غير عن بيت ابوج ما سمعتي المثل الي يقول بيت الابو يدلل وبيت الريل يعلل..!! التفتي حق ريلج وحياتج بسرعة الريال عطاج اكثر من انذار وبعدين مو حلوة انه الريال يكون نايم مرتة تاركتة ونايمة واهو يقومها المفروض العكس وانتي تقومين قبله وتزينين وتعطرين وتكونين باحلى صورة جدامة مو يطالعها واهي تشاااااخر الله يعلم حزتها شيقول بقلبه عنج…!!تعلميني بالريايل
وبعدين ليش السهر وانتي عندج ريل واعيال انتي مو عزابيه قاعده …شوفي الحريم وشلون يهتمون بريايلهم
وهمن مو ملحقين راس مع رضى الريل ويطلعون العيوب وانتي تعطينه العيوب عشان يبرر لنفسه سبحان الله لي سوى شي ولا غلط وكل الناس بتصف معاه ..ضغطي على نفسج …..يالله من الحين عالرباده وغيري حياتج وايد وعوضي الاهمال والكسل طول الايام وديري بالج على بيتج لا باجر تندمين

ههههههه

ذكرتيني بروحي والله !

نايمه والخدامه اتراكض ورا اليهال وريلي بالصاله والله نقدت على روحي :/

ايني ريلي كل اشوي قومي قومي وانا نايمه واصارخ يعني انت شبعان نوم واتقعدني من عز نومي << منفسه بعد

يقعد ريلي عاد يتحلطم يعني قاعد ابروحي اجابل الطوفه قومي قعدي معاي ترى زهقان << كسر خاطري وقعدت غصب :/

السالفه مو سالفة كسر خاطري ولا شي السالفه ياقلبي انه الريال محتاجج تقعدين معاه ويمه يشوفج ويشوف دورج بالبيت

رايحه راده امجابله عيالج مو شغل ولا استهزاء بالعكس يحب جوو العايله ويحب يشوفكم كلكم حوالينه بأي وقت يكون قاعد فيه

واذا بينام ياويله الي يطلع صوت ولا يقعده من عز نومه هييه احنا الحريم مكتوب علينا الشقاا < < بيه بيه كل هاذا عشان انخمد لووووووووووووووول

انتي من النوع الي يحب يشرب قهوه وايد ويقعد عالكرسي مايتحرك ونومج مو منتظم وكله بعالم التوهان هالشي اهوا الي يسويلج قلق وخمول وملل والنوم العميييييق ,,

بطلي من شرب القهوه وايد ,, حاولي تتحركين كثر ماتقدرين ,, لهي نفسج بأي شي طلعي اغراض ورتبيهم نظفي شوفي شنو فيه مافيه ابيتج ,,

افتري بالشقه اكلي فواكه وايد عشان الخمول والملل يروح منج ترى هالاشياء زينه حق الجسم ,,

قرقت وايد موو :>

حبيبتي اصحي ترا انتي في غفله لاهية عن بيتج وزوجج وعيالج

عيل شتسوووين في ايامج ؟؟؟؟؟؟

عندج اولوياات كبيرة

خافي على زوجج لا تقلب راسه وحدة من بنات هالايام ترا حيل منتشرة هالسوالف

وخافي على عيالج هذيلا امانة برقبتج باجر ربج راح يسألج عنهم والزمن هذا يخرع

لا تخلين التلفزيون هو اللي يربيهم ترا والله تاكلينها اذا كبروا

وبعدين فكرري عدل

انتي اذا ماقضيتي وقتج مع ابو عيالج وصرتي جدامه وحدة سنعه شنو راح تخسرين ؟؟؟

واذا ما قابلتي عيالج ووكلتيهم ودرستيهم واهتميتي فيهم شنو راح يضرج ؟؟؟

اتمنى انج تتغيرين للاحسن

اختي انتي الغلطانه واعتقد البنات ماقصرو بسرد الاسباب

انتي جاوبتني على نسج بموضوعج
انج اعترفتي ان انتي فعلا كسوله ومتاذيه من هالشي
يعني لا تلومنين زوجج اذا تشكى من هالشي
العله فيج انتي ديري بالج لا يمل زوجج00هو شايفج الحين مهمله وما تقومين بواجباتج وكله نايمه وكسوله

انا مع راي وحده من الخوات عن فحص الغده يمكن فيج شي 00واتمى لج السلامه
وانا اتوقع زوجج يداوم وانتي الحين باجازه يقوم من النوم يلبس وما يتريق ويروح الدوام00كلش مو حلوه
المفروض اتي اللي تقومين تقعدينه وتسوين له قلاص القهوه وبعد ما يطلع ردي نامي وقعدي عالصلاة الظهر

ديري بالج تطوفين صلاة الظهر عشان النوم00

بعدين ليش تسهرين كل يوم00اصلن تعب لج سهري بس بالويك اند او لا تسهرين لاوقات متاخره حيل
اتوقع لو تنامين الساعه 1 بليل راح تشبعين نوم لي 7 الصبح
خمس ساعات كافيه وعوضيها وقت الظهر ريحي لج ساعيت وقعدي على صلاة العصر

حبوبه ديري بالج على زوجج وحياتج والنوم ما سر البشر

كلامج صحيح وقلت مثل هالكلام لكنه صار مايتقبل مني ودايم ساكت واي مشكله يكبرها انا حاسه اني مو مقصره وهو حاس اني مو قاعده اسوي شي يعني لمى ارجع من الدوام لازم انام وهو يبيني اقابل بنتي وماخليها تنام علشان تنام بالليل وانا مااقدر ولانمت الغرب اشوف فوق راسي المساله انه ماعاد متقبل شي اسمه نوم وبالنسبه للغدد مافيني شي بس لايكن مسحوره

ومشكوره على كلامج الطيب ياطيبه والله يكتب الي فيه الخير

مشكور على كلامج الطيب

شوفي انا شايله الغده ففيني خموول وكله احب انام

بس منظمه يومي مع عيالي ولا احاول انام اكثر من اللازم

وانتي اختي غلطانه حاولي تكونين منتظمه الريال ما يحب يشوف المره كله ناميه وعياله مجابلتهم الخدامه

وزين منه ريلج تكلم وما خشه بقلبه وسوا شي تندمين عليه بعدين

كتكوته كلامج صح بس مو بيدي هالنوم انا حاولت وصرت اقوم واسوي مثل مايبي بس حبطني بكلامه وسكوته معاي طيب الصبح دوام ارجع الظهر لازم انام وهو مايبيني انام الظهر على كلامه علشان انام بالليل واقابل بناتي ومو بيدي ماانام الظهر وهذي المشكله وبالنسبه للسهر والله ماادري شفيني وان شاء الله تتعدل الايام الجايه ومشكوره على نصيحتج وتمونين باللي تقولينه

لاوالله الا ونستيني ليتج مكمله فعلا هذا اللي حاصل بس ان شاء الله نجرب هالنصايح ونشوف بس على الله يساعدني هو

عدلي نظااام نومج …
لو انتي معااه تسهرون بروحكم .. ممكن بس الحين في بيت وخدامه وعياااال وباجر بداومين ليمتى السهر ؟
حاولي على يوم تواصلين .. وتنامين امبجر .. عشااان تقدرين تقعدين الصبح