مطلقة او على وشك: متى و ليش اتخذتي القرار .ندمتي!!

السلام عليكم و رحمة الله و بركاته،

واضح من العنوان الموضوع.

بما اني على وشك اتخاذ اكبر قرار بحياتي و في ظل وجود اولاد و طفل بالطريج .. أحيانا اسأل نفسي هل راح اظلمهم في قراري و الا سعادتهم من سعادتي !!!!

شكلي راح أخلع و ماني عارفه نتيجة قراري.

حبيت اشوف خواتي اللى مروا بهالتجربه باختيارهم.

كم سنه صار لج متزوجه
و كم مره تطلقتي
و شنو السبب اللى اتخذتي علشانه الطلاق؟
خلع و الا طلاق و شنو تنازلتي عنه؟
في اولاد؟

و في النهايه انت سعيده الحين؟ مرتاحه منطلقه !!

انا صار لي 8 سنين ثلاث اولاد و حامل و سبب الطلاق ما عدت استحمل الوضع خصوصا لما يعصب و يبدي يغلط ، كل شي ممنوع ، احس اني مخنوقه و ماني عايشه، تطلقت مره قبل بدون سبب ، زعلت و طلعت من البيت و شرطت شي عليه و وافق و لما رجعت تراجع ، افكر بالخلع لانه يقول تبين الطلاق اخلعي، شنو بتنازل عنه ماني عارفه ……………………

ياليت تتفاعلون معاي

اختي الرحيق المختوم ..
يشرفني اكون اول شخص يرد عليج ,,
بصراحه انا مو متزوجه ولا عشت اللي انتي عايشته ,,
لكني أصادف ناس كثار بنفس حالتج .. لدرجة اني كرهت الزواج بكبره
واتمنى تسمحيلي انصحج جم نصيحه وتاخذينها بعين الاعتبار ,,
الطلاق قرار صعب , بالنسبه لج ولأولادج ,, بس اذا كانت الظروف اللي بينكم صعبه وما تقدرين تكملين فيها استخيري واخذي قرارج وتوكلي على الله ,, وبما ان اهو قالج اخلعي يعني اهو متنازل عنج ..!
متنااااازل بشرط انج تتنازلين عن الشرط اللي انتي حاطته عليه …!
اي رجل هذا …؟
اذا كان الرجل يتنازل عن العشره والانسانيه ويحط الاشياء الماديه قبل هالاشياااء ما يستحق ان تعيشين معاه دقايق ..

الله يوفقج ويسعدج … ويسرلج امورج ويهديج على قرار صاااائب يااارب

وينج يا غناتي مشكوره على المشاركه.
و ما الومج عندي اخت كرهت الرياييل و الزواج من كثر ماتشوفنا احنا المتزوجات نشكي

تقبلي رايي المتواضع
بس فكري بهذي الأشياء
اذا خلعتي منو ياخذ العيال اهو؟؟ كل التعب والتربية ويصيرون تحت جناحه وانتي بتطلعين من الدنيا بولا شي؟؟؟
واذا العيال عندج تقدرين تربينهم بروحج؟؟ اهلج لي متى بيتحملونج انتي و4 اطفال؟؟ بعدين الكل بيلهى وتحسين بالضياع
أهم شي عيااالج صدقيني راح يتغيرون ويضيعون ويكتأبون ويتشتتون ويحسون بعدم الأمان الأسري فكري فيهم وضحي عشانهم
وانا اقول صبريييييي واحتسبي جبال الأجر اللي تييج من الصبر وادعيله بالهداية وحاولي فيه شويي شويي بالمساحل والتفاهم وخلي ابوج يكلمه والله بتندمين على مستقبل عيالج صبري عشانهم

كلامج عالعين و الراس.
بس مشكلتي ان صار فيني اكتئاب مالي خلق لا بيتي و لا عيالي غير العصبيه الزايده من كثر ما امضايقني و هذا مو في مصلحة العيال

شوفي اختي اول شي بعتذر على اسلوبي حسيت اني حيييل قسيت بس والله احتريت عليج وعلى العيال وابي مصلحتكم بس
ثانيا انتي حامل وعاااادي تكتئبين وما اتحملين بيتج وعيالج وتعصبين كلنا جذي مع الحمل بس هذا مو عذر لهالتفكير
تعوذي من ابليس وذكري الله وادعي وصبري واسغفريييييي وربي يفتحها من عنده آمييييييييين

لاااااااا
حبيبتي مايقدر ياخذ اعيالج
لانهم غصب عنكم كلكم في حضانت الام والقانون مايضا تتنزلين عنهم حتى نفقتهم ممنوع تتنازلين مو بكيف احد غصب هالاشياء بقانون الكويت
بعدين الخلع يعني تتنازلين عن العده والمتعه فقط يمكن اهوا خايف ادفعينه جم الف انا جذي ابي ورقتي لانه مستحيل العيشه معاه هو واهله كلهم x ومارضا لين اتنازل ورحت اخلعه يعني تنازل عن العده والمتعه فقط
وحتى بيت الحكومه من حقج نصه غصب بعد مو بكيفه ولا يصير تتنازلين الله يخلي دولتنا المطلقه فيها ماتموت

صار لي مده طويله مكتئبه و عصبيه مو من الحمل.
تخيلي يقول لي ان شاء الله يموت اللى في بطنج علشان ما ارتبط فيج اكثر.
اروح جمعة اهلي الاسبوعيه يتضايق ، رفيجاتي ممنوع زيارات و مرات يقول حتى تلفون لا تكلمينهم. محبوسه في البيت لا طلعه و لا روحه و فوق هذا ياب لي بنته من طليقته و نكد علي عيشتي بسبتها.

انتي ما قسيتي انا مثلج لو ادخل موضوع فيه انفصال بحاول اصلح.

مشكوره حبيبتي عالتوضيح بس ما قلتيلي انتى مرتاحه الحين و عيالج مرتاحين من وضعهم

انا الحمد لله حييييييل مرتاحه وعيالي الحمد لله يروحون له وردون مره ثانيه زواره ونامون عنده يوم او يومين لانه اهوا رجال مايعرف للجهال بس والله مرتاحه مو ناقصني شي بالعكس مستعجله على النصيب الجديد وناااااااااااااسيه زوجي لانه كرهني حياتي والله بعوضني باخير منه راعي حريم وجاحد وناكر وهمه يكسر فيني انتي دام يقولج اللي في بطنج يموت عشان ما ارتبط فيج اكثر
يعني الرجال عااااااااااااااااايفج كااااااااارهج شنو تنطرين تضيعين سنين عمرج بعد فوق اللي ضاعو معاه فكري واتخذي قرار يريحج وقطي الناس وكلامه وراه ظهرج اهم شي راحتج

نقطـــة قانونيـــــه:

إذا فـــي ضــرر من الزوج علــى الزوجــه واقـــع أو فــــي إساءات بالقول أو الفغـــل يتم التطليق قضائيــا بدليـــل:
المادة (126)
لكل من الزوجين قبل الدخول أو بعده، أن يطلب التفريق، بسبب إضرار الآخر به قولاً أو فعلاً، بما لا يستطاع معه دوام العشرة بين أمثالهما.

( يتــم إثباتها عن طريق شاهديـــن سمعيين) مع الحلــف اليمين طبعا بدليـــل
المادة (134)
يكفي في إثبات الضرر الشهادة بالتسامع المبني على الشهرة في نطاق حياة الزوجين، ولا تقبل هذه الشهادة على نفي الضرر.

قد يقتنع القاضي بذلك وتطلقيـــن طلاق للضــــرر يعني طلاق مع كاااااااااامل الحقوق,,,

لذلك لاتستعجليــــن بخلع أو غيره قد يكون ورقــه رابحــــه لـــه,,,

بالمناسبـــه الشاهد السمعي يعنــــي:
سمعنا إنـــه كان إطقها أو يغلط عليــها او أو او ( القانون يأخذ بالشاهد السمعي نظــرا لخوصيصة الزواج ممايصعب أن يــراهم أحد وقت الإساءه)

لذلك خـــلي الطــلاق يكون منـــه أو إذا منـــج يـــكون طلاق للضـــرر أما غيــره لأ.

ملاحظــه إذا زعلتي ببيت أهلــــج ورفع قضيـــة دعــوى بيت طاعه فـــــي أمــور اخـــرى لصالح الزوجــه خصوصا إذا كانت الزوجــه تعانـــي عدم إنفاق زوجها عليـــها أو تتعاني من مشاركــة أهل زوجها معها بنفس المسكــن,,
يعني دعــوى بيــت الطاعه أصبحــت مغنــــى للزوجـــــه علـــى عكـــس مايتصــور الآخــرين

وإن شاء اللــه ماتوصلون للطلاق والله يهدي بينكم ولاتحتاجون محاكم ولاقضاة,,,

تحيـــــاتـــــــي
عبيــر

مشكوره اختي سوني اريكسون.
بس مسائل الطلاق ما تاخذ وقت؟

الحمدلله اهم شي انج ارتحتي لاني حاسه بالضغط النفسي و العاطفي اللى مخليني مخنوقه على طول.

سوني اركسون
اهيا تقول ان زوجها يقول تنازلي يعني راضي بالخلع
وهذا مافيه ضرر لها بالكس راح تاخذ ورقتها مثل شربت الماي لانه اهوا ماعند ماااااانع بس يخاف تطالبه بعد الطلاق بحقوقها يعني همه المال مو بيته وزوجته وعياله