|
|
هلوووووووووووووووو كومن تليفو<<صباح الخير بالفرنسي على ماعتقد..
اولا محد باركلي تراني عرست ..بعد العيد بسبوع..
ايش اقول وايش اخلي ..بصراحه مالوم الناس لين خافوا من العرس .. صدق كلام ولد عمي يوم قال ان العرس معناته حياه ثانيه ..
المهم ماعلينا .. اول ماقرب وقت العرس صارلي حاله غير طبيعيه اتصدقون اني كنت اقفل موبايلي ؟؟!! ليه مدري .. مابي اكلم حد ولاحد يكلمني ..
وخجل فضيع لدرجه اني بغيت اهون .. اكثر من مره رايح السعوديه على اني راح اطلق جذي بس سبحان الله ..يصير شي ويمنعني اني اطلق ..
المهم.. جا وقت العرس.. وجا الوالد العزيز يعطي ولده البجر بعض النصائح..
ابوي..: ياحليلك ياحمدان عيل راح تتزوج ها اخبار النفسيه..؟؟
انا ومنزل راسي خجلان مدري على ايش؟؟
ابوي..:بوووك علامها العرووس استحت شفيك وانا ابوك تعبان فيك شي مب طبيعي ؟؟
انا ..: يوبى..
ابوي..: وحطبى شبلاك..
انا..: مستحي وايد ماتخيل عمري مع وحد و…
ابوي الي فهم السالفه غلط..: ليش ياولدي ترى الظلمه تستر ..
وانا مبطل عيوني من الصدمه انا في وادي وابوي في وادي ..
انا ..: يوبى وين انا وين انت..
ابوي ..: ها عيل تستحي على ايش ؟؟
انا.. ومعصب وخجلان..: لا مستحي ولاشي خلاص انا بسافر الحين وانت الحقني مع الاهل.. انا كنت خايف من طريقه المعامله .. للاني وااايد دفش وهي يادوب تقولها جب قلبتها مناحه .. والعادات والتقاليد هي سبب همي للانها هناك متعوده على شي وعندنا شي ثاني فهذا الي شايل همه ..
برغم مني اكبر مغازلجي في الدوحه واني ماستحي واني جريئ مع البنات الامدري شصار من قرب اليوم وانا ماقدر اقولها كلمتين على بعض حلوين .. خجلان من شوشتي لرجلي.. سبحان مغير الاحوال..
المهم…………………
ورحت السعوديه وسويت خيمتي هناك.. واهل الحرمه ماقصروا سولي جو واهلي وولادعمي ..وصبوع جعل ربي ايرزقه البنت الي تستاهله وقف ماعي وماخلاني بروحي خخخخخخخ .. تخيلوا كنت ارتجف جنه حد حاطني على الهزاز ..
ولا يوم تعشوا وبغو يدخلوني على الحرمه .. بغيت اسويها على ملابسي .. لاااااااااء وقت الصفر حان..
دخلت القاعه ولالنظار علي .. اتصدقون اني ماكنت اشوف جدامي ..
بمساعده طلال رفيجي الي هو اخو البنت وقفني يمها والا انا مثل ماقلت كنت عمي في ذاك الوقت…
وقفت يمها وصورت معاها ,, ولا عطيتها ولا نظره حتى يوم المصوره اترجانا ناخذ صور واحنا نناظر بعض كنت اعيي وهي بعد كانت كاشه مدري شفيها..
واخوانها .. طلال ومساعد وعواض قاعدين يقرقرون على راسها .. ويقولون لها..
مساعد اخوها العود ..:شوفي *** اذا احتجتي اي شي اتصلي علي .. اي وقت تبين .. انشاء الله الفير المهم انج ماتستحين ..
طلال..: لا تبجين خلاص .. انا اضمنلج حمدان والله انه انسان راعي اخلاق ودين ..واهله ناس طيبين وارجع واقول اضمنلك اياه راح يحطك في عيونه..
انا اول ماسمعت كلام طلال عني تشققت من قلب وشقيت الحلج بس احبطني كلام عواض اخوها الي اصغر منها..
عواض..: والو انا مب راضي ان اختي تروح برى السعوديه بس والله ليشوف شي مايعجبه لو يمس شعره منك .. ويروح يضفها و ويهدي فيها..
وتموا على هالحال..
لين مارحنا .. ووصلونا لغرفتنا .. البنت تعلقت في اخوها مساعد ومساعد المسكين عيونه حمروا ..وعواض بعد اما طلال فابتسم ابتسامه حزينه وهمس في اذني ..
طلال..: ماوصيك على اختي ياحمدان تراها غاليه ..>>قصده اخته الوحيده<<
انا..: لاتوصي حريص ..
وراحوا وخلونا بروحنا… انا دخلت ولعت الليتات وجلست على السرير التقط اانسمي وااال مابغوا يروحون ..
اما زوجتي فاقعدت يم الكرسي الي يم الباب .. وعبايتها مغطيتها ..
انا ..:مبرووك******
..زوجتي..:……………
انا واقوم ارفع العبايه عنها واشوف حوريه جدامي انا تسطلت عدل .. بس صياحها رجعني للارض الواقع..
انا..: افااا تبجين ليش خايفه مني مو انا حمدان حبيبج ؟؟؟
زوجتي..: … ممكن تزيح عني…
انا هنا انصدمت ..: شنو؟؟؟
طالعتني وعيونها تتطاير شرار..: ممكن تزيح مابي اشوف وجهك وتغطي ..وجها بيدها وتبجي ..
انا هنا الامبير ضرب حده شلت شلايلي وخذت مخده وشرشف ورحت الغرفه الثانيه للاني طالب سويت.. وبت هناك وانا منسدح .. تذكرت كلامي عن اول لليله وشلون الناس يفوشرون .. وانا هنا مرتزع بصراحه انجرحت وقلت خلني ادق على طلال..
وفعلا ماعطلت ودقيت عليه .. وطول لين مارد..
طلال ..: هلا حمدان خير شصار؟؟
انا..: لا ابد بس بغيت اعرف انتوا غاصبين اختكم علي؟؟؟
طلا ل..: وشهو لا ابد وانت اكبر شاهد يوم كنت تزورها كنت حاس انها مغصوبه؟؟
انا والي ميت ماعرف شاسوي..: لا والله كانت فرحانه فيني ..
طلال..:شفت .. عيل ليش داق؟؟؟
انا..: طلال البنت نافره مني ..
طلال ..: اييييييي اسمع حمدان ترى امس وحده كلمتنا وقالت لنا انها خطيبتك وانك راح تتزوجها .. وانـ..
قطعته منصدم..: وشهو ..شهالخرابيط الي قاعد تقولها انا اصلا متى خطبت اول وحده اخطبها هي اختك.. يااااه انت منصجك اتحجى طلال؟؟
طلال..: قول لااله الاالله ..اهدى انا ماصدقتها للاني عرفت انها وحده منلي كنت تلعب معاهم ..
وختي خلاص فولت وبغت الطلاق بس ابوي مارضى عن الفضيحه وحتى اخوي مساعد .. بغى يجيكم في قطر يجبرك انك تطلق اختي .. بس انا قلت ان الولد ترك هالاشياء من يوم ماخطب اختي وانا كنت اراقبه والحمدالله تاكدت انك تركت هالخرابيط وقلت لهم كلنا رقمنا وكلمنا بنات ..
انا.. وافتخر ان عندي رفيج مثل طلال..: واختك..
طلال..: مثل مالقيتها الحين كارهتك .. وموطايقه شوفتك..
انا ..: والحل؟؟
طلال…: انت واسلوبك مثل ماطيح بنات الناس في دباديبك .. طيح اختي بعد واعرف انك قدها وقدود..
انا وضايق خلقي ..: خلاص عيل اخليك..
طلال.: هالله هالله في اختي ياحمدان..
انا ..: لاتوصي حريص فمان الله ..
طلال..: مع السلامه..
وسكرت الخط وانا مضايق حدي بس قلت بنفسي مستحيل اخليها تاخذ فكره خايسه عني.. ورحت لها لقيتها قاعده تسبح..
ونطرتها ولين اطلعت تخيلوا اللبست شيلتها اتحجب عني ..
انا ومبقق عيوني..: شنو ذي اتحجبين عني تراني رجلج..
زوجتي..:………………
انا..: **** انا كلمت اخوج طلال وقالي عن البنت الي تدعي انها خطيبتي ..
واروح يمها وامسك يدها .. تراها نصابه وذي للاسف احد البنات الي كنت اكلمهم قبل لاخطبج..
زوجتي..: وبعد تعترف ايش شايفني جدامك جماد ماعندي مشاعر وبعد تهيني .. زيح عني … والله لا خليك تطلقني ..ولا ماكون بنت***
انا الي فورت..: والله نجوم السما اقرب اقول تمي جذي معلقه لاانتي متزوجه ولا انتي مطلقه ..
واروح غرفتي .. وانا واصل حدي..
المهم تميت احمس طول الليل والاخت تنوح في الغرفه الثانيه ..
جا الصبح شلتها ووديتها عند اهلها الصباحيه.. وانا قعدت في المجلس وحالتي حاله .. ابوي..:ها اعلومك؟؟
انا ..: اعلوم طيبه ..
ابوي..: كفوا هذا الرجال مو مثل غيرك ياجل يقول عشان نفسيت البنت..
وانا اتقطع من داخل…
المهم الكل قام يقط نغزات ويضحكون ويتساسرون عني ..
بختصار كنت نجم الحفل على قولتهم..
جاوقت سفرتنا على فرنسا .. وشلت زوجتي ورحنا المطار..تخيلوا مواصل .. وبعد بقعد في الطياره يمكن سبع ساعات او اكثر بعد..
اااخ تحسون بعذابي..
المهم وصلنا فرنسا ورحنا لفندقنا وانا كنت حاجز بس سويت بغرفه نوم وحده مع حمام واحد ..
زوجتي قامت قيامتها.. وتمت اتحمس واتحلطم المهم .. انها رضت بالواقع .. وتقبلت ان احنا ننام في سرير واحد..
مرت الايام وانا احاول اقرب منها وهي كلش نافره ..
المهم مع هواشنا اليومي .. والي في اخر مره زاد عن حده .. طنقرت وخذت اغراضي وطلعت ..
وانا رايح ادور في الشوارع الا اتذكر ..صديقي " بوعابد" الي يدرس في فرنسا ذي صديقي الروح بالروح وللاسف الظروف جبرته انه مايحظر عرسي وان احنا مانشوف بعض.. وانا اخترت فرنسا بالذات بس عشا اشوفه ..بس الي صارلي مع ام السعف والليف لخبط مخططاتي كلها..
المهم رحت له وهو استقبلني بالاحضان وبعد احراج وجهد كبير من رفيجي قلت له وهو تفهم ..
وقالي على خطه .. قال انها مضمونه..
شوفو ايش سوى..
المهم انا مارجعت الفندق وقعدت عند بوعابد تخيلوا مر يومين ولا اتصلت .. عليها قلب ذي البنت..
المهم اليوم الثالث .. اتصلت ..
وبوعابد ماعطل .. ورد عليها وهو ماشاء الله عليه يتكلم فرنسي ..
وقعد يخربط معاها بالفرنسي .. وهي مو فاهمه ..المهم قلب انجليزي وقال لها ان صاحب هالموبايل مفقود لقوا جوتي وموبايل وتيشيرت .. على السيف<< شاطئ .. ومالقوله اثر ..
ورفيجي حاط على السبيكر وانا اسمع صياحها وتلخبطها في الكلام من هول الصدمه..
المهم بوعابد سالها.: من انتي؟؟
زوجتي بانجليزي مكسره..: انا زوجته..
بوعابد..: اووو انا اسف اكيد كان له مكان بقلبج انا اسف على خسارتج؟؟
زوجتي..: لا لاتقول راح ارجوك دوره ذي اذا راح انا ماعرف شلون بعيش
بوعابد وجه ولع وانا قلت له خلا ص سكر لاتقعد تخورها اكثر وشلت شلايلي وانا متشقق..
رحت لها .. الفندق .. وبعدين..
ســـــــــــــــــــــــــــــــــــــــــر مابقول مو كل شي ينقال..
المهم انتهى كل شي على خير .. والحمدالله المدام رضت علي ..
وعشنا في سبات ونبات.. وخلفنا صبيان وبنات ..
منقول
صج ذكي رفيجه
خوش قصه اندمج فيها
يعطيج العافيه
والله عيشتينى بجووووو
زين مانجلطت تسلمين على هالقصه…….
يسلمو
موفقه
|
المشاركة الأصلية كتبت بواسطة حنين
 وبعدين شصار في تكمله ولا لاء؟
والله عيشتينى بجووووو |
لا والله مافي تكمله بس صج خوش قصه يحليله دمه خفيف
|
المشاركة الأصلية كتبت بواسطة وفاء @
وااااااااااااااااايد حلوه القصه كملي
|
عيونج الحلوه
والله مافي تكمله ولاجان حطيتها