|
|
هذي اول مره اشارك بس متابعه لكويتيات من زمان 
اممممم عندي شي مسبب لي صداع
وبما انكم من الكويت ….اتمنى تساعدوني
…………………..
انا بنت من السعوديه وعمري الحين مكمله 19 انشاءالله
وخطبني واحد كويتي هم عمره 19 بس اكبر مني بشهرين بس
اهو يقرب لنا بس من بعيد شوي …بس اختي متزوجه من خاله
وانا اعرف امه وحبوبه وطيبه مررررررررررررره
وهو مشاءالله الحين يدرس بجامعة الكويت بالهندسه
واختي الي ماخذه خاله تمدحه لي مررررررره وتقول ماكو مثله
……………………
بس انا خايفه من شغلتين
الاولى اني بعيش بالكويت واكيد بفقد اهلي مرررره … مدري احس الحياة بالكويت غير
وثاني مشكله وصارحتني فيها اختي
ان الحين بتكون بس خطبه وانشاءالله ااذا وافقنا ملكه
بس العرس بيكون تقريبا بعد 3 سنوات ..بنات احس بعيد مررره …. على ما يخلص دراسته من الجامعه
………….
شرايكم بنات .. يستاهل انتظر معه ثلاث سنين والا يمكن يجيني غيره
ابي رايكم طلبتكم والله محتاره
وثاانكس مقدما
وانا بصراحة اشوف الكويت حلوة ووناسة ووسيعه صدر
حرية اكبر + اذا حبيتي تسوقين ممكن + وظايفهم ماشاء الله متوفرة بشكل اكبر منا الله يزيدهم
غير اهل الكويت ماشاء الله اغلبهم اللي قابلتهم فله فله و عفوووين مرة
وانت اختك بتصير معك يعني مو غربة كاملة عرفتي
انا اقولك استخيري مرة ومرتين و3
اذا قدرتي تبينون انكم شارين الولد وانه والنعم فيه بس ماعندكم نظام حجز يكون افضل ولا تنظرين له بشكل سلبي لان انت بعد تبين تخلصين دراستك احسن لك من زواج ودراسة وحوسة ونقل ومعادلة مواد
وبعد لا تتكلون على كلام اختك واهله لانهم بنات ومايعرفون سوالف الشباب وماعندهم الا الظاهر خلي ابوك ولا اخوك يسألون وكثير بعد
بعدين انتى تقولين ماودى ابعد عن اهلى يالله يت من عندة بتقعدين ثلاث سنين عندهم
ههههههههههههههههههه شفتى شلون شبابنا طيبين هههههههههههههههههه
الله يوفقج حبيبتى.
حبيبتي الحمد الله دراسته حلوه ومستقبلها حلو ماشاءالله
ثاني شي الكويت حلوه واذا تعودتي عليها ماراح تفارقينها هههههههه(:
بس السؤال اذا ملجه 3 سنين اي مو مشكله
لكن خطبه بدون ملجه 3 سنين .. احس مادري الواحد يخاف هالايام يعلقج فلانه لفلان واخر شي يغير رايه
اذا يبي يملج عليج وينطر 3 سنين مومشكله والله يوفقج يارب
وزي كلام اللي قبلي خلي ابوك واخوانك يسالون عن الولد
لاتكتفون بمدح اختك ولاتكتفون بطيبة امه واهله ..
اهم شي الولد اسألوا عنه مره ومترين وثلاث شوفوا وضعه كيف
وهل هو يدخن او يشيش وكيف وضعه بدراسته هل هو ماشي فيها ولا اسم انه بالجامعه وبس
واسألوا عن صلاته وعن كل شي
انا سعوديه وانتي سعوديه وعارفين ديرتنا وعارفينا اطباعنا هنا كيف
بالسعوديه حتى لو خاطبك ولد خالك او ولد عمك لازم تسالون عنه
انا خطيبي يصير ولد خالتي يعني المفروض عارفينه عدل ومانسال
لكن ابوي واخواني سألوا عنه بدوامه وسألوا عنه بالمسجد حق حارتهم
وسألوا عنه عند اخوياه والحمدلله طلع الولد محترم ومايدخن ولا يشيش ومايترك صلاته..
يعني اهم شي ابوك واخوانك يسألون عن الولد زززززين ..
اذا طلع مظبوط وماعليه كلام خلاص خليهم يملكون مو خطبه وتعليقه لا اطلبي انتي ملكه ..
وعادي لو تملكون وتجلسون 3 سنين بالعكس عشان انتي تدرسين وتخلصين دراسه
وهو بعد يخلص دراسه ولسى توكم صغار ياقلبي لاتقولين 3 سنين بتطول ههههه ترى تمشي الايام بسرعه
واذا على الغربه الكويت مو غربه والحمدلله اختك هناك عندك والكويت قريبه من السعوديه
كلها ساعتين وانتي عند اهلك
الله يوفقك ويسهل امورك ويكتب لك الخير بحياتك يارب
انا ماعجبني انو كلكم بنفس العمر المفروض في فارق ع الاقل سنتين
الولد لسى صغير مره على هادي المواضيع ويا خوفي لما تنضج مشاعره ويكبر شوي يحب ويفكر في وحده يختارها هو على مزاجه
مادري الموضوع مكركب شوي
انتي استخيري
والله يكتب اللي فيه الخير
واسالو عنه
ولا هو ابوي سال عنه خاله ومشاءالله هو الثاني مدحه
قال مشاءالله حتى الفجر يصليها بالمسجد
وبعيد عن التدخين ومهتم كثير كثير بدراسته واختصرها خاله وقال ما تلقى احسن منه هههههههه
وهم قالو الثلاث السنين بتكون ملكه يعني جادين
انشاءالله بستخير ومشكورات مره ثانيه فديتكم
بس بغيت رايكم بمسالة انه صغير وتوه على الزواج … لان الاخت خرعتني لما قالت انه يمكن يغير رايه 
وماتدرين احتمال نطرة ثلاث سنين تكون لج خيرة تكملين دراستج بالسعودية وتتخرجين …
بالكويت راح ترتاحين وعلى ضمانتي مافي احد عاش فيها ماعشقها …