محتاجة مساعدتكم عفية لا تفشلوني عند الناس كل شي بويهي ماكو وقت:(

السلااااام عليكم يا عرايس

بصراحة انا عروس قديمة صارلي أكثر من سنتين هذا حال الدنيا

أبي منكم طلبات مو طلب بليييز مالي غيركم

بنت خالتي وحيدة ما عندها خوات وخالتي مريضة مافيها شدة على سوالف العرس والملجة فمنو تتوقعون راح يشيل الملجة ؟

اختكم في الاسلام

وبصراحة الملجة في بيتنا و ودي ابيضها لأن انا بملجتي ما قصروا فيني وبردلهم الجميل

المطلوب منكم عاريسنا الحلوين لا تفشلوني عفية

شلون اضبط السرداب والصالات من مداخل وكوشة وهالسوالف ترى اول مرة امسك عرس بروحي مسؤؤولية كبيرة علي

وابي الحلو وصواني الحلو من وين ؟

وابي من وين اييب خمة العصير والجاي والقهوة مع الفلبينيات

وشنو اقتراحاتكم مع العلم اني حجزت الدي جي العسعوسي وحجزت البوفيه الموفنبيك شرايكم ؟

زشنو انا ناسية بعد عفية لا تهدوني ترى مالي غيركم

اول شي بتوفيق ان شاءالله

انا اعرف ناس عندهم اذا تبين ارسلي لية رسالة خاص

انا ماعندي خبره بهالسوالف انشالله البنااااااااات يفيدونج حبيبتي

والله زين ما اخترتي الموفينبك حلو والعسعوسي بعد خوش دي جي ماعليه كلام ..

انزين الكوشه من وين بتيوبونها ؟؟

شوفي بالنسبه للمداخل والدري وهالسوالف خل اقولج شنو سويت في عروس حمواتي

حمواتي الثنتين انا اللي شلت عروسهم وكانوا في بيتهم بالسرداب … سردابهم ما شاء الله كبير ويشيل وايد ناس

المهم خل اقولج عن الافكار اللي سويها لهم

لبسنا الدري تور وليتات طبعا الليتات مخفيه تحت التور مو مبينه ولمن دخلت العروس طفينا الليتات وشب الدري

كان شكله رووعه وكل من سألنا وين سوينا بس كان شغلنا احنا بالبيت

والثريا اللي بالسرداب لبسناها ورد طبيعي كانت عجييييييييييييييييييييبه

والحمامات تكرمون اخترنا اكسسواراته نفس لون التور والكوشه يعني الصابون كان لونه فوشي وكان في شموع بنفس اللون طبعا هذا غير الكلينكس اللي مطبوع عليه اسم العايلتين..

وتقدرين تحطين جم سبريه صغار مع ماشات ومشوط .. بطريقه ذربه حق اللي يبي يستخدمهم في عندج مواعين كباااار زجاج ممكن يسون لج هالغرض..

ومع الجاي كنا حاطين مع كا بيالة شاي جيس صغييييييير خذيناه من بياع الورد وكان لونه فوشي طبعا مثل باجي شغلنا

وحطينا فيه مكسرات … بدال المعجنات او ممكن تبدلينه مع بسكوت عندج امير الامراء عنده اشكاااااااااااااال والوااااااااااااان

وعند الباب اكيد بتحطين طاولات مدوره فيها العلوج والحلاو وممكن تحطين كاكاو وطبعا دهونات العود والطيب..

والكراسي مالوت المعازيم كانوا ملبسين بس هم ربطنا عليهم تور من نفس اللي على الدري بس الحين هابين بالقفنات وهم ممكن تلفين عليهم تور او خام من نفس لون بدلة عروستكم..

ومره رحت عرس في بيت كانوا حتى سماعات الدي جي ملبسينهم تور وايد كان شكلهم راقي وذرب

وبعطبج فكره حق الحلو وايد استانسوا عليها الناس بعروسنا

طبعا الحلو يتوزع عقب دخلة العروس احنا قبل لا يدخلون الخدمه بالحلو نقول حق الدي جي يحط موسيقى هاديه عشان الكل يتقهوى وياكل حلو

يدوب 5 او 10 دقايق ويرجع يشغل الدي جي

طبعا صواني العصير ممكن تحطين عليهم ورد نفس الكوشه .. ودلال القهوه تربطين فيها شرايط هم بعد من نفس الوان شغلكم
واذا تبين فكره حق الدبل بقولج على هالفكره سويناها بعرس حماتي

كوشتها من فيها دريشه حطينا الدبل فيها ولمن يه وقت الدبله وقفت هي وريلها وراحوا ورى القفنه لان الدريشه كان وراها طبعا
ولبسوا بعض شكلهم كان حلو ما كان عليهم زحمه وكانوا واقفين فالكل شافهم

طبعا اذا بتحطين لهم كيكه لازم تزينين طاولة الكيكه نفس الدري وطاولات المدخل والبوفيه (حتى البوفيه خلينا ديكوره مثل باجي الاشياء)
وممكن حتى الخدمه اذا ماكان لبسهم نفس لون شغلكم تحطون لهم ورده على جيليهم نفس لون باجي الشغلات

ولا تنسين ان يكون عندج صندوق حق الاثواب حق السامري وجم ربطه حق الرقص الشرقي..

اي وهذي فكره للامانه مو فكرتي بس انا شفتها بملجه ..

تدرين حفلاتنا تاخذ وقت وديجي وتصوير ومعازيم ومايمدي النعاريس يطلعون يتعشون بره

بهالحفله كانوا حاطين عشاهم بالحديقه وام العروس كانت حاطه حق المعاريس طاوله بره بس داخل خيمه وفيها شموع وليتات صغار عشاهم على الطاوله

حده شكلهم ماشاء الله كان حلو ورومانسي وجنهم قاعدين بروحهم وصورتهم المصوره فوق بروحهم وبعدين نزلوا تعشوا

والحلو اكيد لازم يكون نفس لون بدلة العروس وعندج وايد محلات يلونون بالمعجنات والحلو باللون اللي تبينه

والله ما كثرهم .. وهذيل اغلب المحلات اللي تعاملنا معاهم وشغلهم وايد راقي

عندج محل لوزان كويزين حق نبيله القندي اللي يم صالون كريستال

واسماء قبازرد .. تيستي ..اوبرا ..صافي ..جوكليت اند مور … سلفارينا .. غنيمه الفريح ..بسكوته..

واذا تذكرت محلات زود قتلج

ادري قرقرقرقرقرقرقرقرقر واجد

اب اب
بعد بنات ابي افكاركم

عفية لا تطنشوني

الصراحه الموفنبيك عجيب والعسوسي حلو واذا تبين حلو عندج واو حده عجيب مكانه بشرق وبعد عندج سلفارينيا بالسالميه القديمه عند السجاد الايراني نصيحه لا تاخذين من غير هالمكانين

مشكورين كل اللي ردوا علي ما قصرتوا

الحين انا باخذ الحلو من وااو وبنوع من اوبرا ومن الدكان ومن لوروا أوكي ؟ شرايكم ؟

بقى الكوشة والورد من وين ؟ ابي مصممين حق الكوشة يكون شغلهم ذرب وناعم وبصراحة مابي خبة وغالي من وين ؟

والتصوير احنا مفكرين فوتوكينا شرايكم ؟

وابي سيرفس العصير والجاي والقهوة من وين ؟ ابي فناتق عفية

شوفي حبيبتي
عندج ماشاء الله جم مصممه من بنات الكويت شغلهم حلو وذرب ، ومنزليين لهم صور بالمنتدى ، عاد انتي اختاري اللي يعجبج ذوقهم ودقي عليهم ، واتفقي معاهم .

صح نسيت اقول لج فوتوكينا تصويرهم وايد حلو ، وخاصه المونتاج اللي يسوونه في بداية الشريط ، بس عاد انتي لما تاخذين منهم السيديات اخذي منهم اللأشرطه الأصليه .

الفلبينيات والعصير والجاي هذا تقدرين تطلبينه من الموفمبيك نفسه مكان بوفيه العشاا اهما يوفرون كل شي والحلو انا احب جنيفاا وايد