|
|
السلام عليكم
شخباركم وشلونكم
يقولج اسالي مجربه ولا تسالين طبيبه
عندي مجموعه من الاساله العامه عن سلوكيات الطفل واتمنى اللي عنده خبره يجاوب عليها
1- اذا كان الطفل مدلل في البيت وجا له اخو ثاني فكيف يتم التعامل مع الطفل الكبير بحيث مايغار منه او قد يحس بنقص الحنان
وخصوصا ان الطفل الجديد يحتاج عنايه اكثر من اخوه ؟
2- الطفل العنيد واللي قد يتصرف باساليب غير جيده مثلا مايرضى ياكل او يضرب امه او ابوه او مايرضى يجلس الا مقابل التلفزيون مباشره*
ولا ينفع معاه الكلام او الصراخ ؟
3- في حالة الفطام فايش افضل طريقه وخصوصا ان الطفل يكون متعود عليها ولا يقدر ينام الا فيها ؟
4- الطفل اللي مايرضى يلبس ولا يتمشط ودائما يصارخ ويصيح ؟
5- الطفل اللي متعلق في امه او ابوه واذا جاو يطلعون يتعلق فيها الى درجه ان يفزع الدنيا من الصياح ؟
6- الطفل معروف عنده طاقة و يبي يفرغها باللعب والتعفس والتخرب وشنو افضل طريقة ان نخليه يفرغها باسلوب هادي ؟
7- كيف نقدر نخلي الطفل يتعود على الاطباع اللي احنا نبيها ويترك الامور السلبيه اللي من الخارج او المجتمع وخصوصا
انه قد يحتك ويلعب مع اطفال غيره ويكتسب عادات او الفاظ الوالدين مايبونها فيه ؟
8- متى نصارخ على الطفل او حتى ضربه او في رايكم بان اسلوب الضرب والصراخ والطق ماتنفع في التربيه بتاتا ؟
9 – احيانا الطفل مايحب نوع معين من الاكل مثلا السمك بالرغم من السمك له فوائده فهل توجد طريقه معينه لكي يتم تعويد الطفل عليه ؟
10 – احيانا الطفل يعاف ولا يبي احد غير امه و ابوه وبعض الاقارب فهل هذه ظاهره طبيعيه ام انها غير طبيعيه واذا كانت طبيعيه*
هل تاثر على الطفل فيما بعد او انها تكون في عمر معين بعدين تروح وخصوصا ان الاهل يخافون ان الطفل يكون فيما بعد غير اجتماعي ؟
11- كيف نحل مشكله الغيره الغير طبيعيه بين الاخوان الصغار واللي قد احيانا تزيد عن حدها ؟
12- الطفل دائما يرغب في الالعاب الجديده ويصيح ويبكي عشان نشرتيها بس اذا شريناها بسرعه يمل منها ويرميها فشنو افضل طريقه*
كيف نخلي الطفل مايمل من اللعبة وتظل معاه دائما بنفس الحماس واللهفه عليها ؟
هذه اساله وانشاءالله اذا كان هناك اساله اخرى راح اضيفها من خلال اجوبتكم وتعليقاتكم ؟
واتمتى من الامهات بالخصوص ان يفيدون الجميع بهالاساله
هذا الي ع بالي الحين .. ولي عوده باذن الله
1- اذا كان الطفل مدلل في البيت وجا له اخو ثاني فكيف يتم التعامل مع الطفل الكبير بحيث مايغار منه او قد يحس بنقص الحنان
وخصوصا ان الطفل الجديد يحتاج عنايه اكثر من اخوه ؟
حبيبتي الطفل اليديد لايحتاج الى العطف اكثر من المولود الاول ولاتقللين من اهتمامات الطفل الاول ولازم تهيئين الاجواء النفسيه حق الطفل الاول لاستقبال المولود الجديد وهذا امر ضروري لأتقاء الغيره المنتظره
2- الطفل العنيد واللي قد يتصرف باساليب غير جيده مثلا مايرضى ياكل او يضرب امه او ابوه او مايرضى يجلس الا مقابل التلفزيون مباشره*ولا ينفع معاه الكلام او الصراخ ؟
اولا العناد وسيلة لاثبات الذات وبنائها وشد انظار الاخرين والتأثير عليهم سواء كانو من الاهل او غيره , وطبعا العناد اذا استمر راح يصير حاله مــرضيه . وفي مرحلة يطلق عليها (سن المقاومه ) اهي مرحلة العناد الاولى وتمتد من الميلاد الى ثلاث سنوات او اربع . وطبعا تقدرين تتخلصين من العناد اذا احسنت تربيته , ونفذتي طلباته , واشبعتي حاجاته , واهم شي تشبعين حاجاته الى العطف والحنان . وفي اسباب وايد حق العناد , مثل يبي يثبت ذاته , فرض قيود مشدده عليه , تحطين قيود ضد رغبات الطفل واهوا يلعب ., اهمال الطفل , الاسلوب اللي يتغير بين اللين والقسوه يعني الطفل مايعرف لج مره طيبه مره شريره .وطبعا تقدرين توخرين العناد اول شي من خلال اشباع حاجاته الاساسيه , تخففين من قسوتج حق الطفل ,لاتعرضين الطفل حق مواقف محبطة او مؤثره لان هذا يخلق عنده ردود فعل متمثلة بالعناد والتمرد , واهم شي اهم شي خلق الاجواء الاسريه السلميه الخــــاليه من الاضطراب
3- في حالة الفطام فايش افضل طريقه وخصوصا ان الطفل يكون متعود عليها ولا يقدر ينام الا فيها ؟
انا بنظري بالتدريييج يعني مو مره وحده تقطعيين وانتي براحتج :*
حبيبتي الطفل شلون تبينه يتعلم باسلوب هادي ؟ وبعدين بهالمرحله اهوا راح يتعلم من خلال لعبه وترى ورا كل تخريب وطاقه ولعب وتعفس غريزة حب استطلاع والكشف والتحليل والتركيب , والطاقه واللعب والتعفس والتخرب افضل طريقه للاكتشافات والاختراعات ياقلبي , فـ بنظري خليه على راحته ,وااذااا كان الطفل في طااااقه موطبيعيه ويبي يفرغها واستمرت معاه وايد فيه "هايبر اكتف " نشاااط زايد .
8- متى نصارخ على الطفل او حتى ضربه او في رايكم بان اسلوب الضرب والصراخ والطق ماتنفع في التربيه بتاتا ؟
ديري بالج تصارخين او تضربين , لان هذا راح يخلي الطفل يزيد في تمرده .
10 – احيانا الطفل يعاف ولا يبي احد غير امه و ابوه وبعض الاقارب فهل هذه ظاهره طبيعيه ام انها غير طبيعيه واذا كانت طبيعيه*
هل تاثر على الطفل فيما بعد او انها تكون في عمر معين بعدين تروح وخصوصا ان الاهل يخافون ان الطفل يكون فيما بعد غير اجتماعي ؟
طبعا ظاهره طبيعيه الى سن معين تقريبا لي 5 سنوات وبعدها راح يروح المدرسه مومعقوله يعني بيتعلق بابوه وامه واكيد تاثر على الطفل وماراح يكون اجتماعي بتاتا , حاولي تعودينه على اللعب الجماعي مع عيال خالته اصدقاىه من جذي يقدر يوخر عنكم ويقدر يكون علاقات .
11- كيف نحل مشكله الغيره الغير طبيعيه بين الاخوان الصغار واللي قد احيانا تزيد عن حدها ؟
شوفي حبيبتي مشكلة الغيره بين الاخوان الصغار تيي بسبب شعور الطفل ان مكانتة الشخصيه ضعفت عند ابوه وامه , وطبعا الغيره بيت الاخوان تيي ايضا بسبب الشعور بالنقص , وعدم الثقه بالنفش , والغيره تنشأ في السنوات الاولى للطفوله عندما يشعر الطفل بأن بعض امتيازاته الماديه والمعنوية بدأت تتضاءل , وتتحول الى طفل اخر ويبدأ الشعور بالقلق والكراهيه لبيئته ويمكن يكرهج انتي بعد ويحاول ينتقم منكم بعدين يحاول يلجأ الى سلوكيات معينه عشان يجذب انظاركم له مره ثانيه , فيعتمد على البكاء , او التظاهر بالمرض , وطبعا اللي يتمتعون بامتيازات كثيره هم اكثر عرضه للغيره وطبعا علماء النفس ينصحون الابوين بوجوب تنظيم المواليد , فلا تكون الفترات متقاربه , حتى ينعم الطفل بطفولته ويشبع حاجاتة الى الحب والعطف والحنان من الام والابو , ايضا قالو مايصير تكون فترات الولادة متباعدة كقيره بحيث تتكرس امتيازات معينه للطفل الاول يصعب انتزاعها منه او التقليل منها والمفضل ان تكون الفتره بين ولادة واخر هي من 3 الى 4 سنوات على كلامهم , عشان جذي قبل لاتولدين لازم تهيئين الاجواء لاستقبال اطفل , وتجاوبين على كل الاسئله اللي يسألها الطفل حول مافي بطنج , وانج تقوليله ان في طفل راح اييلك وراح تلعب معاه وراح تتعاونون مع بعض وجذي وعلاج الغيره اهم شي بنظري انج توازنين بين اعيالج بكل شي ولا تفضلين احد على ثاني وثاني شي بنظري مراعاة مبدأ الفروق الفرديه , وهدوء الاجواء الاسريه
شوفي مافي مشكله الياهل اذا شبعان راح ينام يبجي ليما يتعب ينام