ليش الطيب ماله حظ في هالزمن

السلام عليكم بنات
بنات بسألكم سؤال وجاوبيني عليه بس بعد ما تقرون قصتي كامله
كنت بنت احب الحياة وحدي افرفش وعايشة حياتي طول بعرض رغم ان اهلي كانو صاكين علي عدل ممنوع تلفون ممنوع سيارة وامي ماكانت تعطيني ذاك الحنان اللي كنت اشوفه عند امهات الناس وابوي لاهي عنا بزواجاته اللي ماتخلص عاد تزوجت من واحد حدي عشقته من اول ليلة العرس كان ولد حلو شباب يدلعني في كل طلعه وسفرة. ماطولنا على انصدمت فيه ولقيته على علاقة مع قريبته اللي على قولته كان يبيلها وقت على ماتنساه كثرت مشاكلنا وانا طبعي اتحمل اي شي لسانه الوصخ قلة ادبه اهله بس انه مايخونني. واول ست شهور طلقني مرتين مره عشان رفيجته الاوليه ومره عشان اهله. بعد ما ولد وجبت بنت ربي هداه وصحيح انه يوم حلو ويوم مر معاه بس كنت امشي الحال لو اعوج. طبعا اكثر من مره كنت اطيح عليه يحاجي وحده ورده ان البنت اهي اللي متحرشه فيه . عاد كان في وحده بالذات حقيره موراضيه تهده من اربع سنوات اول مره حاجيتها قالت احبه ثاني مره حاجيتها قعدت تسبني عاد ذيل الجلب عوج مايتعدل. حملت وبكل صراحه اهملته الا كرهته وكرهت البيت وكرهت بناتي الثنتين ونفسي وطحت عليه قبل فتره يتغزل فيها و و و . عاد انا ماتحملت طحت فيه سب وزف ورحت بيت اهلي جان يطرش لي مسج يقول لي انتي طالق . الحين انا الحمدالله راضيه بنصيبي صحيح انه في وحده خربت بيتي وصحيح انه كان يتسلى بس نفس كل مره. بس زوجي او طليقي فيه طبع حيل خايس شايف نفسه علي مع انه ما عنده شهاده وشايف انه احسن مني مع انه مقصر في عبادته وتعالو لا تزاعل معاي يقول بمسج واحد ستين كلمة قمة في الانحطاط والرذاله. الحين اذا ولدت انشالله احتمال كبير انه يحاول يردني ويمكن اصلا تكون اهي ثلاث طلقات مافيها رجعه. انا قاعده اقول في نفسي اهي اربع سنين شفت فيها الويل وخي ل انكسر قلبي وبجيت واندمرت نفسيتي. هل ياربي هذا بلاه ولاتكفير لذنوبي قبل الزواج. بناتي شلون يعيشون بدون ابوهم واهولولا الخيانات والكلام البايخ اجمالا زين معاي ومع بناتي. بنات ابيكم ترفعون من معنوياتي فيني هم كبير مادري شنو مستقبلي وشلون بعيش بدون زوج وشلون بتحمل نكد اهلي.

محد مرتاح

الله يعينج ويصبرج مو عااارفه شقول انا عكسج عند اهلي مدلعه ومدلله كل هذا ماافكر اتطلق زوجي معقدوفيه البلاوي بس ارحم اعيش عند اهلي وعندي عيال اقعد عندهم يومين انتي خربطتي جدولنا ازعجتينا سكتيهم و و و و و معنا يموتون فيهم بس يومين ويزهقون

مااادري شقولج استغفرالله الدنيا بلاوي

الله كريم حبيبتي انت حاولي تقوين شخصيتج شوي معاه ودايما ذكريه ببناته عسى الله يهديه وقوليله كما تدين تدان ولا تهدين بيتج انتوا بينكم عشره وعليج دااااااااااااااايما بالدعاء فهو مفتاح الفرج

يالله ياكريم يسخره لج وانت لا تزعلين نفسج انت حامل مو زين عليج عشان البيبي واحنا اهني خواتج واي شي تبينه حاضرين

ادعي الله يهديه لج يارب

حبيبتي الله يصبر قلبك والله انا مع انك ترديله اذا ردك بس بشروط طبعا اول شئ حاله ينصلح ويترك عنه الخرابيط واذا مادرك حبيبتي مني ميته من بعده الحمد لله اهلك موجودين مهما كان مارح يرموا بنيتهم بالشارع والله انا عندي تصبرين على اهلك ولا انك توتين عند زوجك واهو ولا حاس يمكن الله يرزقك بولد الحلال من بعده ويهنيك والله انا خالتي ام زوجي كان زوجها معذبها واتطلقت بعد ماجابت منه 3 عيال بعدها تقدم لها واحد عزاااااااااااااااااااابي ماكان متزوج وتزوجته وسحبت عيالها واحد ورى الثاني من عند ابوهم واهو واقف معاها حتى بالمحكمه كان يبي عيالها مع انه زوج امهم بس سبحان الله واللحين صار لها متزوجه يمكن 14 سنه وماشالله عليهم مجمعها هي وعيالها اللي من زوجها الاول واللي جابتهم منه وانتي تقدرين تشغلين نفسك باي شئ اولا الشغل والله راح يخلي عندك شخصيه والكل راح يحترمك وبتشغلين عمرك اذا ماقدرت تطلعين برى البيت تقدرين تشتغلين من بيتك باي شئ والله يهدي بينكم ويوفقك ياااارب

الله يعينج ياقلبي بس سألي عن سالفه الطلقه الاخيره هذي؟

كلمتي احد من اهلج ولا اهله عن هالشي؟؟

انتي عرفي موقفه شنو اتجاهج يحبج ولا يكرهج وليش يسوي جذي؟؟

حاولي تحطين حد حقه ردي بيتج بس رديله وحده ثانيه غيري اسلوبج معاه وعيشي حياتج عادي وخليه لمن الله يهديه حسسيه انج الحين غير مو مهتمه يكلم ولا لاا بس لا تقصرين بيتج وعيالج عرفتي ياقلبي

ان كان في له هداية ادعيله وانشالله ينهدى ويهد خرابيطه ويرجعلك ندمان .. مع ان صعب بهالدنيا وبخصوص بهالايام اذا الواخد تعلق بالخرابيط يفج عنها ..

شوفي حبوبة .. اذا انتي تحبينه وبطبعج حكيمة وصبورة روحيله وقعدي في بيتج وتجنبي سوالفه واسكتي عن اللي بيسويه بس ادعيله بكل صلاة ..
اما اذا انتي (عافك الخاطر) وماقمتي تتحملين سوالفه تقعدين عن اهلج وتتحملين عيالج وتربينهم على كيفج .. لا انتي اول ولا آخر وحدة انظلمت من زوج بهالدنيا .. شنسوي الدنيا جذي صايرة ولازم احنا نعرف شلون نتصرف بحكمة عشان عيالنا وعشان نكمل حياتنا

ونصيحة: لاتهدرين صحتج وتفنين عمرج عشان انسان .. انا هذي قاعدتي بالدنيا
وعسى الله يقومج بالسلامة ويفرج عنج همج وكربتج ويسخرلج زوجج آميين ..
وماتدرين يمكن بعد الولادة ترجع الامور افضل من قبل…كل شي ربنا كاتبه بيصير بيصير

الله يهديه انشالله

شوفي اختي اول شي سألي بالنسبة للطلقة الثالثة اذا وقعت او لا لان البعض يقول ان الطلاق بارسال مسج لا يقع ثانيا لا تردين الا اذا زوجك اهو اللي يطلب منج انج ترجعين واذا وافقتي لازم توافقين بشروط ان ما يرجع حق سوالفه وخرابيطه وانت غيري من شخصيتك لا تصيرين ضعيفة خليج قوية واثقة من نفسك وتصرفاتج ترى الريال يحب زوجنه تصير قوية ولا تحسسينه ان اهو اهم شي في حياتج ترى يشوف نفسه ويقول هذه مهما سويت فيها راح ترجع لي واذا ما تشتغلين اشتغلي والله يسهل عليج ولادتك

أقول اختي أول شي المفروض من البداية ما تسكتيين عن الأخطائه وبعديين ما حسييتي فيها الا بعد الحمل في الثالث ليش ما حاولتي تسنعينة وتحاجينة ليش ما تجاهديين عشان هالبنات حاولي فيه نادي حكم من أهلج وأهله خل يحاولون وياه والله يصلح حاله

والله ماحد مرتاح في حياته الله يعينك
زي ماقالوا البنات أسألي عن الطلقه الثالثه وقعت وأنا اللي أعرفه ان الطلاق عن طريق الرسايل مايقع واذا انت عارفه ان زوجك يحبك ومايستغنى عنك ارجعي بس لازم تحطيله شروط وان يبطل خرابيطه والله يختارلك اللي فيه الخير

الله يكون بعونك اذاكان زوجك يحبك ومايقدر يستغن عنك وردك وهو ندمان وماعا يرجع لهاالشى مرة اخرة ردى عزيزتى علشلن عيالك وفوضى امرك لله لى خلقك وعليك بالدعا ء الله يصلح لكى

الله يعوضج يارب

عسى ان تكرهو شي وهو خيرا لكم
ماتدرين يمكن اذا ضليتي معاه اتزيد مشاكلج معاه ويمكن ينقلج اي مرض لاسمح الله الان مومعقوله الخيانه بس تليفون ولي يبيعج مره ممكن يبيعج مليون مره وهو لو كان فيه خير جان خذتا الي تصيرله وبعدين اشلون يصير يطلقج وانتي حامل انا اعرف انه مايصير لين تولدين واول مره اسمع ان في واحد يطلق زوجته بالمسج اشلون جذي
يبا ابعد عب الشير وغنيله وانشالله ربج بعوضج بالي احسن منه والله يوفقج حبوبه ويبعد عنج كل مكروه

شوفي انا طول عمري ضاربه الكل عرض الحائط اذا في الموضوع مساس للكرامه
بس انتي بالذات اقولج اذا تقدرين تردين لريلج ردي له
وعيشي حياتج لج انتي
وربي بناتج حدر ام واب مو ام بروحها بدون ابو
لان اذا قعدتي في بيت اهلج انتي خسارنه اميه بالاميه كل شي لا راحه ولا ريل ولا استقلاليه ولا فلوس اتوقع لا وبتكونين امطلقه ام لبنتين واللي كبرج ويا اعيالهم ورياييلهم والا بعضهم ليلحين ينخطبون بعد
لكن اذا رديتي حق ريلج النذل اسمج لازلتي زوجه ويمكن الله يهديه لج ما تدرين وتصير حياتج معاه روعه
واتربين اعيالج ويا ابوهم
وما اتحسرين على شبابج اللي بيضيع على الاقل يكون عندج امل الهدايه
وان تم نذل خليه يولي لا اتناجرينه كلش خل يعرف انج وحده ثانيه تستحقره عادته اي شي بس اكسسوار لبرستيجها جدام اهلها والناس
عيشي لبناتج

مادري انا تكلمت وايد بس ابي افهمج قصدي