لحقوووني حاسة نفسي بموت من الخوف ,, صدري وش صاير فيه ؟؟

السلام عليكم

ادري غثيتكم هاليومين بأسألتي الي ما تخلص

بس من كم يوم وانا ملاحظة شي غرييييب

انا عادةً قبل الدورة تقريبا باسبوعين يبدا صدري يورم ويصير قاسي -تغييرات قبل الدورة –

بس هالمرة ما ادري وش الي صاير

الدورة المفروض اليوم او بكرة تنزل علي اذا ما تأخرت طبعاً بس للحين صدري على ما هو ما تغير ..
وتونا من شوي مخلصين وقمت اسبح وبعد ما تنشفت بالفوطة عدل ومتأكدة انه صدري كان جاف مادري وش الي خلاني امسك صدري اشوفه ما تغير لأني احاتي موضوعه مرررة كل ما قرب موعد الدورة الي يطلع لي من صدري اليمين "مادة لزجة " تقريباً قطره
وعلى طول ناديت زوجي يجي يشوف قبل ما امسحها ويا حليله يقول لي هذي حليب :
بس مسحتها بمنديل وصايرة شفافة وكأنها شوية ممزوجة بصفار بس لأنه شوية ما قدرت اركز والاضاءة في الغرفة مو ذاك الزود
ولمستها وهي في المنديل باااين عدل انها لزجة
وزوجي يقول لي يمكن دهون : وانا اقول له اي دهون الي تطلع من الصدر وانا لامستها لزجة
بس هو راح ولا على باله يقول انا احاتي واجد
والحين خايفة ومو عارفة وش اسوي وحاسة محد مهتم فيني وزوجي صلى ونام وانا عارفة بعد هالموضوع مابيجني نوم

محد عنده رد ؟؟؟
صايرة زي الهبلا كل شوي اشيك على صدري

والله ما ادري بس انشالله ماكو الا كل خير
ولا تحاااااتين

سلامتج والله عادي رفيجتي مره جذي والله عادي

ان شاء الله يا رب ما يكون الا كل خير

احد ثاني يطمني ؟؟

انا كذا قبل وطلع فيني هرمون الحليب مرتفع وعدلته بحبوب…الله يطمن بالج

طيب وش اعراض ارتفاع هرمون الحليب ؟؟؟

حبيبتي من اعراض الهرمون لانه كان عندي هو عدم انتظام الدوره + الم في الصدر وانتفاخ خاصة قبل الدوره + ظهور بعض الشعر في الوجه + تاخر الدورة + ترين في حلمة الصدر مثل النقطه البيضاء او الحليب او اذا عصرتيه يطلع سايل ابيض على اصفر +ضيق بالصدر ودائما اشعر ان جسمي حار او ساخن في الصباح

طيب انا اول ما تزوجت لخبطت عندي الدورة بس الشهرين الي فاتو جاتني مضبوطة .. يعني استبعد انو عندي لخبطة فيها
الم في الصدر مو كثيرمررررة عادي وطبيعي الصدر شوي يورم قبل الدورة يعني ما اظن انو شي خطير
بعض الشعر في الوجه ما اشوف الا شي عادي مرررة
النقط البيضاء لاحظتها الحين في حلمة وحدة بعد بس ما تنعصر ولا يطلع شي

دعواتكم انو ما يكون فيني الا الخير

مافيه جواب جديد ؟

يا حبيبتي إقطعي الشك باليقين وروحي الدكتور وسوي اشعه عشان ترتاحين

روحي الطبيب وشيكي على عمرج

ما عندي فكرة و لو ادري ما كنت بخلت عليش بس ما حبيت اطلع بدون لا اشارك

وكيف اروح وزوجي عنده الموضوع عادي
يقول لي انا عندي هوس زايد والا ما فيه شي صاير
المشكلة ما اعرف اروح بروحي وزوجي اذا مو مقتنع من نفسه ما تسوى علي اروح
لو اروح ويطلع ما فيني شي وش بيسكته !!! يبغى له سنة لين ما ينسى السالفة