لا لإطالة الحصه ولا اليوم الدراسي

السلام عليكم كويتيات
الموضوع باين من عنوانه

قريت بالجريده ان وزارة التربيه تدرس إطالة الحصة وجعلها ساعه كامله وبناء على ذلك
إطالة اليوم الدراسي
ومثل مانعرف كلنا أن وزارة التربيه تبدأ بدراسه وتنتهي بالتطبيق
بس كويتيات تخيلو ندوم لي الساعه 2 أو 3 متى نرجع ونقابل عيالنا وازواجنا وبيوتنا
لازم نسوي حمله ونعلن حنا المدرسات اننا ضد إطالة اليوم الدراسي
وشراااااااااااايكم

ماقصرتي ساره عالتوضيح

مشكووووووره على التوضيح يا قلبي

مشكوررررررررررره ماقصرتي ياساره
بس معنى كلامج ان هناك نيه للإطالله وهني الكلام حبيبتي
لان وزارة التربيه أول شي تبدأ بفكره ثم دراسه ثم تطبيق
مثله مثل الملف الاعجازي أقصد الانجازي والمناهج الجديده والحصه المستقطعه
كانت أفكار وتم تطبيقها وللأسف فشلت بتحقيق أهدافها

بصراحـه ..
فكـره تحتـاج .. لـ تروي .. وتفكيـر ..
لان الطالب طاقـه معينـه .. حتى وان انقسمـت الحصـه لـ تدريس وتفاعل على راي أختي سـاره …
هذه الدراسـات تنفـع في دول غير دولنـا…
احنا المدرسـه بيئـه طارده بالنسبه للطلبه .. والمعلمـات ..
مافي انشطـه ترفيهيـه .. مافي وجبات صحيـه معتبـره .. مافي نوادي مواهـب وتبنـي أفكـار ..

هالسوالف بصراحه مو لنا ..
خل نكووون واقعيـيـن ..
لا الاداره المدرسيـه تساعد لا البيئة المدرسيـه . ولا حتى أولياء الاموووووووور ..

لاااا يـاويـل حــالي بس .. لا يبااا ولي يرحم والديها بس

شنو تأخير لي الساابعه واليـهال خــلاص يوصلون حـدهم حلجهم مشـرع ..

و مــالهم خلق و يـوووصلوون حدهم .. شلون ندرس فيهم بلا حـرام عليها .

تبي تأخر الدوام لا تخلي القعده من الصـبح نقوم من الفير و همن نرجع البيت متأخر لــــــيش ؟؟!!

الله يهديها انشالله .

ثانكس ثانكس

تعالوا معاي في رحلة عشان نسلط عدستنا على وحدة من تناقضات التربية العجيبة

ألا و هي الحصة المستقطعة اللي فارضينها علينا فرض في المدارس الابتدائية هالسنة

و هي كالتالي: حصة تعطى بعد طابور الصباح مباشرة (يعني الجدول اليومي يكون 8 حصص بدل ال7 حصص المقررة)

الهدف منها: تأصيل بعض القيم الأخلاقية .. و في أغلب المدارس للأسف (بلا هدف) .. تكون حصة احتياط

يعني التلميذات ياكلون و المعلمة تحط ايدها على خدها و تندب حظها الاغبر

————

س: كيف تم توفير وقت للحصة المستقطعة؟؟

ج: ببساطة تم استقطاع دقائق من الحصص الأساسية للحصول في النهاية على حصة احتياط اجبارية على المعلمات قليلات الحيلة!!

———–

س: شنو مشكلتكم من الموضوع؟؟

ج: بعض المعاناة:

1- الحصة تشكل عبء زايد على المعلمة .. يعني اللي جدولها 3 حصص باليوم راح يكون 4 حصص إذا أضفنالهم الحصة المستقطعة غير الاحتياط اللي تاخذة غصبا عليها .. و يا ويلها لي فتحت حلجها بكلمة.

2- المعلمة ما تاخذ اجر على الحصة المستقطعة إذا تجاوز جدولها النصاب الطبيعي (يعني الحصة المستقطعة ما تنحسب من ضمن جدولج) .. شغل زايد على خالي بلااااااااااش.

3- الدقائق المستقطعة من الحصص الأساسية عيالنا مو أولى فيها؟؟؟ ليش أضيع من المواد الأساسية 10 دقايق كاملة ممكن التلاميذ يستفيدون منها .. على الأقل المعلمة تصلح فيهم الكتب بدال لا يكون الوقت حده حده .. لا و عقب كل هذا .. اذا احضرت الموجهه و لا الناظرة قاعدة تحاسب على الوقت .. و الله قواة عين .. يعني الحصة عقب ما قصصتوها و حسحستوها و صفينا على 35 دقيقة قمتوا تحاسبونا بعد؟؟؟ المعلمة وين تقدر تقسم شغلها؟؟؟؟؟؟؟ شنو هالمسخرة؟؟ يعني تشرح و لا تسوي النشاط و لا تتابع التلميذات و لا تحل التقويم معاهم و لا تصلح (و كوني مدرسة علوم لازم أخذ التلميذات من الصف إلى المختبر هالمشوار بروحه يبيله يبيله 5 دقايق.. شبقى من الحصة؟؟)

يعني باختصار انتوا تبون مكاين مو معلمات

و المسخرة الكبرى ان واحد من المناهج الجديدة (منهج ثانية ابتدائي للعلوم) فيه نشاط يتطلب 45 دقيقة .. و وقت الحصة ما يتجاوز ال35 دقيقة .. يعني نضحك و لا نبجي؟؟؟ (شر البلية ما يضحك الصراحة)

الزبدة من هالدندرة .. أبي أقول للمسئولين في الوزارة .. كا عرفتوا تقصرون وقت الحصة عشان تطبقون الحصة المستقطعة اللي مالها لزمة .. و التجربة فاشلة بكل المقاييس .. ليش ما تخلون الحصة 35 دقيقة مثل الحين دام احنا تعودنا على قصرها و قمنا نمشي حالنا!! و بالمقابل تطلعونا مبجر !!

يعني بدال لا تقصرون الحصة و تحطون حصة مستقطعة عقب الطابور .. و محد يستفيد منها .. الغوا الحصة المستقطعة و طلعونا احنا و عيالنا مبجر .. تصير كل الحصص على 35 دقيقة و نطلع من الدوام مبجر ..أشوف ما ضركم يوم قصرتوا الحصة الأساسية!!

و لا على المشتهاة .. تقصرون متى ما بغيتوا و تطولون متى ما بغيتوا!!!!!!!!!!!!!!

قرقت وايد .. ما عليه تحملوني شوي .. مع ان هذا غيض من فيض .. بقلبي هاااااااااااااااالكثر على هالوزارة التعبانة

انا وحدة أعلنها من الحين

إذا طولوا الدوام لي ال3 .. بروح البترول على الاقل أقعد تحت عين أبوي الله يخليه لنا .. و اسمي بنت المدير خخخخخ

و لا هالكراف اللي احنا فيه .. شمقعدنا احنا بهالوزارة إلا بعض الأشياء اللي ممكن نسميها مميزات (الدوام لي 1:30) و العطلة .. و الاختلاط

غير جذي ماكو شي مصبرنا على التربية ترى!!

و الحين الدوام راح يصير لي ال3

و العطله قاعدين يقلصونها

و الاختلاط .. بيحطون كاميرات و ما راح يكون في خصوصية للمعلمات!!!!!

يعني وين المميزات بالتربية؟؟؟؟؟؟ و لا شي .. غير انها أعمال شاقة و بس

و إذا على المعاش .. أماكن وايده معاشاتها أحلى بوايد .. و فوق هذا كله يعاملون الموظف على انه انسان له كيان .. يعني ما راح تحسين انج مهانة مثل ماهو حاصل بالتربية!!

لا شنو احنا نص ساعه وخلاص تلوع جبدنا من الحصه !
مانبي انتو الابلات اعترضو
احنا الطلبه اعتراضاتنا كلها عالفاضي محد يسمع
بس صايرين فيران تجارب لنوريه
واذا اهي مخططه هالخطط اغلب الابلات ماراح يطبقونها !
لا تطول الدوام الدراسي لين تعدل المدارس وتهيأها

واسفه عالتدخل =)

هههههههههههههههههههههههه
حلوه هالنكته

اتمنى من البنات يقرون مشاركتي عدل

انا كتبت راي نورية الصبيح ..
ورايها هذا يعبر عن رغبة ونية من الوزااة لتطبيق هالموضوع

ولا يعبر عن رايي انا كــ ساره
انا فقط نقلت شي صار بلندوة

استتخيري .. واذا ارتحتي .. رووووووووووحي البترول
عالاقل نهاية السنه .. تلقين اشياء وايد اتشجعج عالاستمرار بالعطاء والعمل للسنه اليايه

انا صارلي مده افكر اني اطلع

وامجهزة السي في مالتي من زمااااااااااان وناسخه عليها 10 نسخ

لأن نفس ما قلتي
وزارتنا من ردي الى اردى
ودنا بالتغيير الى الافضل
بس محد يساعد ….
ماكو غير الاحباطات للأسف

مشكورين بنات على التجاوب والمشاركه
بس حنا لازم يكون لنا صوت مسموع ولازم يشاورونا ويأخذون برأينا مو بس فكره ثم التطبيق ليش مايروحون المدارس ويشوفون شصار
بالطلاب ليش مايشاورون المعلمات خصوصا ان حنا اللي بنبطق الفكره ونأديها بالمدارس

وهالساعه مو كلها تدريس ودراسه
25 دقيقة تدريس
والباجي تفاعل
انشطه صفيه
تنمية مهارات حركية ووجدانيه
حل اسئلة واج

اشدعوه 25 دقيقه تدريس بس و35 انشطه ما فكروا بمناهج الثانوي؟؟؟؟؟؟؟؟؟؟؟؟؟؟
اشلون بالله المدرسه تخلص المنهج اذا كل يوم تشرح ب25دقيقه !!!!!
الله والانشطه اصلا المختبرات والمدارس ما فيها المواد المطلوبه للانشطه علشان تطبقها المعلمه مع طالبتها!!!!!!!!
صراحه قرارات التربيه كل يوم تصير من سيء الى الاسوء الله يكون في عون المعلمين و الطلبه الي صج صايرين فئران تجارب