كيف نكسر جمود مشاعر الرجل

السلام عليكم
صديقتي عندها مشكلة بسيطة و محتاجة منكم مساعدة
زوجها من النوع اللي ما يبين مشاعره لها بالكلام او بالغزل وهذا ناتج عن مبدأ اهو ماشي عليه ان هو ريال البيت و لازم ان يكون ثقيل ، في بداية زواجهم كان دايم معاها و يطلعون مع بعض و يضحك و يتغشمر معاها . لكن مع الوقت و مع زيادة شغله ( يشتغل بالتجارة) ومع اليهال بدا يفج عنها و بدت طلعاتهم تخف و قعدتهم مع بعض اغلبها ساكتين و نادر ما تكون بينهم سالفة و كله بسبب انشغال تفكيره بالشغل .

اهي من النوع الرومانسي و تحب الغزل و الكلام الحلو و المديح ، و تحب ان زوجها يشاركها بكل كل شي يخصها و تحب ان يكون معاها باغلب الوقت و يكون دايم ملهوف عليها و ما يستغنى عنها ( مثل كل البنات)

هي مو مقصرة معاه بولا شي من كلام حلو ومن لبس و من اغراءات ومن مديح بس للاسف ما لفت المثيل و بدت تتعب

ورغم كل الجمود اللي اهو فيه ، وايد وايد وايد يحبها و مو مقصر معاها باي شي تطلبه و الكل عارف هذا الشي . بس هي محتاجة شوية حنان و رومانسية

و اتمنى انكم تساعدونها بمشورتكم ، كيف تكسر الجمود اللي فيه و تخليه يعبرلها عن مشاعره و ان يتعلق فيها اكثر و اكثر ولا يقدر يفارقها ولا لحظة

والله يالغالية الحال من بعضوو

بس اهي تقدر تساله عن شغله جذي راح يتكلم اشوي

وخل تشوف هو شنو يحب وتسولف فيه

مشكورة اخت جرح الليالي على الرد
سالت لكن كان الرد فقط المختصر المفيد او الرد عادة ما يكون الحمدالله و الله كريم ( للاسف ) هم ما نفعت الفكرة معاه

والله انا نفس الشي والمصيبة ان الحنان والحجي الحلو موجود بس مايطلع الا حق اللي يبون

والله انا كبرت عقلي وما عدت اسأل كل حزه تحبني والا لا

علشان يتعطف ويقول اي

الحياة فيها مواقف اهي اللي يبين اذا كان صج يحب والا لا؟؟؟؟؟؟؟؟

فاشغلي وقتج وحطي ببالج اذا ما يحبج جان من زمااااااااااان انتي عند اهلج

حبيبتي جمود الريال ما ينكسر اهو فيه ووده يقولج هالحجي الحلو بس ما يقدر تدرين ليش…؟

لان كل الرياييل عبالهم اذا الوحد فيهم قال حق مرته بالذات حجي حلو ان المره راح تتكبر علي وتدوس على راسه والحجي مو من عندي هذا حجي الرياييل نفسهم ,انا اول كان عندي صديق بمثاية اخوي وكل اهلي يعرفونه واهو يعرفهم اهو الي قايلي هالحجي وحتى ريلي مره قالي احنا نتعمد ما نقول حجي حلو دايما عشان ما نمل اولا وعشان ما تركبنا الحريم.

شفتي السخافه عاد…… لا تعليق.

همسات الليالي و ناني سيكرتس صح كلامكم .. انا دشيت هالموضوع لان صج انسانة عزيزة علي تعاني منه .. و اهي تدري ان ريلها يحبها بس ما يقول .. حلوة و مو قاصرها شي و انا متأكدة انها ما تقصر على ريلها من جميع النواحي ..

الله يعينكم والله .. و يهدي لكم ريايلكم

حبيبتى عادى مافيها شى اهم شى ينفذ كل طلباتها هذا دليل حب

مشكورين خواتي على المشاركة و يعطيكم العافية خففتو علي بردودكم

العفو حبيبتي بس نصيحه لا تحطين هالموضوع في بالك على طول ترا راح تتعبين وايد وراح تسوين مشاكل على ولا شي.

حبوبة ..

إذا علاقتج زينة في أخوانه الرياييل .. اشتري كتاب الرجال من المريخ والنساء من الزهرة .. وأعطيه أخوه خليه يعطيه اياه .. بس لازم يعطيه اياه ريال موب حرمه .. ويلزم عليه يقراه ويقول له بسألك عنه .. بدون ما يخبر زوجج إن الكتاب منج ..

حاولي وشوفي .. ترا هالكتاب مفيد ..

حبوبه الريال ما يعبر عن مشاعره بالكلام

صعب حيل عنده الكلام وسهل عنده الفعل

يعني أذا بيعبر عن حبه واهتمامه يزيد من شغله واهتمامه بالجانب المادي للحياة

علشان يثبت لشريكة حياته انه موفر لها الي تبيه وانها ما تحتاج غيره كلش

تقريبا 99 بالميه من الرجال جذى يعنى ما يطلعون مشاعرهم بقوه نفس الحريم ولما تكلمينه عبر تحجى سولف يقول الحب بالافعال مو بالكلام
وتلاحظين اكثر الحركات والشغلات الرومانسيه الحريم يسوونها والرجال
بس يستقبل ويستانس – يعنى باعتقادى لا اتعب نفسها وتفكر بهالشى واجد
وتهتم بنفسها وبعيالها وبزوجها وتحمد ربها عالنعمه وانها احسن من غيرها بكثير

آنا مو متزوجة و قاطة ويهي عندكم أدري بتشوتوني برة بس آنا كنت أبيج تنصحين رفيجتج بنفس الكتاب إلي قالت عنه عذوب بس مو علشان هو يقراه (إن رضى يقراه فهذا حظها من السما لأن هالنوعية من الكتب ما يقبلون عليها الرياييل في الغالب) آنا أبي رفيجتج إهيا إلي تقراه علشان تتطمن و تتمتع بحب زوجها لها حتى لو اهو ما يتكلم و تعرف إن زوجها طبيعي 100% و إن أغلب رياييل العالم جذي مو بس الكويتيين.

بعد في كتاب وايد حلو إسمه لماذا لا تستطيع النساء الصمت ولا يستطيع الرجل قراءة الخرائط؟ و كتاب لماذا يكذب الرجل و تبكي المرأة؟هالكتابين يونسون خف طينة و يعلمون شلون المرأة و الرجل تكون ردود أفعالهم على النفس المواقف و الأوضاع ،و إلي مألفينهم أثنين متزوجين(آلان و باربارة بيس) و عندهم سلسلة كتب بنفس المجال كلها تتركز في الفروقات بين المرا و الريال هالكتب (النساء من الزهرة و الرجال من المريخ،لماذا يكذب الرجل و تبكي المرأة ، لماذا لا تستطيع النساء الصمت و لا يستطيع الرجل قراءة الخرائط؟) كلهم راح تلقاهم بمكتبة فيرجن في المرينا…و بالتوفيق إن شاء الله

يعطيكم العافية بنات على الكلام الحلو
وبصراحة الكتاب اللي عنوان الرجال من المريخ والنساء من الزهرة انا استفدت منه وايد عن تجربة واقعية وعملية وعرفت ليش في مواقف معينة الريال يتصرف تصرفات غريبة كنت اعتبرها جمود بس للأسف طلعت العكس وانصحكم تقرونه علشان تتعلمون اكثر

وبصراحة انا حطيته حج ريللي بالحمام على البيديه بما أنه ما فيه ايات قرآنية وخليته بطريقة غير مباشرة يقراه وشوي شوي بدا يناقتشني فيه هذي خطة حلوة صح :::))