كويتيات خلونا نطرح بعص الأشياء والنصائح حق المقبلين للزواج والي ماتزوجو

انا صراحة عندي اهم شي الصبر على كل شي مثلا لما زوجج يتكلم ويسولف سمعيله وحاولي تفهمينه في بداية الطريج ، ولا تتسريع في اتخاذ اي قرار تظلمينه فيه وتظلمين نفسج .

مشكورة اختي ام شهاب على الموضوع الحلو والقيم بنفس الوقت

اهم شي في الحياة الزوجيه ان يسود التفاهم بين الزوجين وتقارب الافكار

والمشاركه في الاعباء في الحياة الزوجيه وانج تكونين قريبه من زوجج في كل الظروف

انا في رايي ان الزواج عبارة عن اول سنه او سنتين اذا صبرتي عليهم تصبرين العمر كله
لان الزوج في البدايه صج يدلعج بس دايما يحب يفرض رجولته ويشوفج تطيعينه ولا لا
فاذا شافج من البدايه خوش وحده يرتاح

واظيف انه الريال مايحب المره الي صايرتله شاويش عطيه وين رحت من كنت معاه وين ولا
وشغله مهمه اكو بعض الزوجات لي شافت لها وحده حلوه ولا لابسه لبس ملفت او من هالي بالتلفزيون يطلعون لا تعلقين عليهم ولا اي شي مثلا تقولين قطيعه نانسي عجرم جيكره وييييييييه هالبنت ماتستحي لابسه جذيه
ابد ولا جنج شفتي بالعكس لي شفتي نانسي عجرم وربعها خليج كوووووووول لانه راح يكون بينه وبين نفسه يفكر انه انتي ماعندج ثقه بنفسج

اعتني بنفسج وبنظافتج لاتهملين روحج خليج على طول عروس بالمقابل مو على حساب طلتج تهملين ريلج

شغله مهمه للاسف الكويتيات معروفين بشوفة النفس ترى الريال مايحب مرته شايفه روحها كل ماصار تقول انا اسوي جذيه ماكو شغل ومن هالسوالف لا حطي في بالج انه هذا ريلج ماكو حاجز بينج وبينه

والله يوفق الجميع

يعطيكم العافيه حبايبي على النصااائح الحلووه

>>> مقبله على الزواج أدعولى بليز

موضوع عجيب .. جزاك الله كل خير اختي ام شهاب ..

و جان زين خواتنا يشاركون بالموضوع ..

مشكورين خواتي عالنصايح الحلوه ما قصروا الله يخليكم وانشالله نشوف نصايح اكثر

حبيه ايه بيني له انج تحبينه وتموتين عليه

وشي ثاني بعد سوي روحج طيبه وكلا على نياتج

مو تصيرين ساحره ونيتج سوده

مشكوره اختي على الموضوع القيم

انا عندي اهم شي الاسرار ما تطلع بر البيت حتى لاهلج لان انتي تنسين شنو سوى لكن الاهل ما ينسون يردون يتذكرون لو بعد سنين

ثاني شي تقبلي شريك حياتج مثل ما هو يعني لا تقارنينه بزوج اختي او رفيجتج ترى الظاهر غير غير الباطن يمكن اللي يعجبج بزوج رفيجتج تلقينها اهي متضايقه منه

احس وايد قرقت بس الله يوفق الجميع

– قبل الموافقة على الزواج لازم تكونين مقتنعة فيه اقتناع تام .. و تتفاهمين معاه على الأشياء الأساسية مثل السكن , اسلوب الحياة و طريقة التعامل و تبينين له طبعج و لا تتصنعين خليه يعرفج على طبيعتج و يحبج مثل ما انتي و اذا ما تقبلج على حقيقتج في البداية ما راح يتقبلج بعدين .. لا تمثلين غير شخصيتج .. و صدقيني بترتاحين بعدين اذا الله كتب ..

– خلي البيت مكان راحته .. و خلي حضنج ملجأه اذا صكت الدنيا ابويهه و اول انسان يفكر انه يشكي له اهوا انتي ..

– لا تضايقينه بالانتقادات .. و لا تطلبين منه فوق طاقته ..

– خلج واثقة من نفسج .. و لا تشاورينه بكل صغيرة و كبيرة .. في مواقف تتطلب انج تفرضين شخصيتج و رايج .. و بعد لازم يكون بينكم احترام قبل كل شي .. احترام للراي و لأهل الزوجين .. الاحترام يأتي بالحب بينما الحب من غير احترام نادرا ما يستمر ..

– نظمي وقتج .. اهتمامج بجمالج و دراستج او عملج .. لا يكون على حساب بيتج و زوجج .. خلصي شغلج كله قبل لا يرجع .. بحيث انه لما يرجع البيت يلقاج في أبهى حلة .. حاولي قد ما تقدرين .. يعني في اشياء تقدرين تسوينها جدامه .. بل يفضل انج تسوينها جدامه علشان يعرف انج تشتغلين و تهتمين بروحج … و هذا يرجع لتقديرج الشخصي .. مثلا مو حلوة تحطين حنة و اهو مجابلج .. اما لما تبردين اظافرج .. تحطين ماسك على ويهج .. فمثل هالسوالف يستحسن احيانا تسوينها جدامه ..

– لا تصيرين حنانة . باختصار شديد

– و بالتوفيق جميعا .. شكرا على الموضوع الحلو ..

مشكورين بنات …

موضوع حلو ..

يعطيج العافية ام شهاااب

عاشت ام شهاب من ورانا هالمواضيع الزينه

لي عودة للموضوع مرة ثانيه نطريني

اهم شي ان اللي بينج وبين ريلج من اسرار المفروض محد يدري عنها حتى لو كانت اختج او امج وخصوصا المشاكل او الزعل لانج ممكن وانتي قاعده تقولين لهم واهم عن حسن نيه يشورون عليج انج تسوين نفس الطريقه اللي اهم ممكن يتصرفونها مع رياييلهم فلازم انتي تعرفين ان كل ريال ومرته طبعهم غير يعني اللي يتقبله ريل اختج يمكن ريلج مايتقبله وماينفع معاه والعكس صحيح وبالخصوص بحالات الزعل تنازلي شوي ولاتفكرين منو الغلطان فكري بس باللي اهم واللي اهو ان مايطول الزعل وانكم تكونون راضين على بعض ولا تفكرين بكرامتج وعزة نفسج ومادري شنو مع ريلج حبيبج ترا اهو جنتج ونارج رضاه من رضا الله عليج وكل ما شد انتي ارخي الا اذا كان شي موزين او يغضب الله او ان اخلاقه لاسمح الله فيها خلل هذا عاد شي ثاني
وكذلك لازم تعودين نفسج على الصراحه مع ريلج وتعودينه يصارحج وتصيرون ربع ورفجان مو بس زوج وزوجته لا خليه يسولف معاج ويفضفضلج وانتي نفس الشي وشيلو الحواجز اللي بينكم وخليه يقولج اهو شنو الاشياء اللي بخاطره تسوينها له وانتي نفس الشي وتقبليه بكل مواصفاته واذا تبين تغيرين فيه صفه صدقيني تقدرين بس بطريقه غير مباشره دلليه وونسيه وخليه اهو كل حياتج وخليه يحب يقعد معاج ويشتاقلج من نفسه بدون ما انتي تحكرينه وتقعدينه بالحنه وبالغصب وهو مو طايقج عطيه مساحه من الحريه بكل شي ودايما حسسيه ان مافي شي تمنيتيه بالدنيا كثره اهو ودايما مدحيه وشوفي ايجابياته وانسي سلبياته

يا ســــــــــــــــلام على هالمواضيع الحلوة .. إي الله يخليكم كثروا من هالسوالف .. و فيدونا .. علمونا ..

ترى غشيمات حدنا .. هيهيهيهي .. إديلوا كمان .. اللي بعده