كان ياما كان في قديم الزمان

و البنت

رفضت

و عاشت عيشة سعيدة

تصدقون يا بنات ان هالقصة كانت تنقال لي و انا صغيرة و كبرت عليها و تعودت عليها و انا كنت و ما زلت اشوف الزواج نهاية لحياة البنت السعيدة

خل شوي اعرفكم على نفسي

انا طالبة جامعية عمري 21 سنة و كنت دايما اقرا منتدى كويتيات اب صمت و لا عمري كتبت او شاركت لكن هالموضوع صارله فترة شاغل بالي و حبيت استشيركم فيه لأن ما شاء الله المنتدى مليان و اكيد فيه ناس مروا بتجربتي او عندهم خبرات بهالموضوع
ترددت وايد على ما اطرح الموضوع .. خفت من بعض الردود القاسية و صج في ناس ما ترحم و لكن بالنهاية توكلت على الله و حبيت استعين اب ناس من ثقافتي و ديني عشان يقدرون يحلون لي هالمشكلة

مشكلتي يا بنات اني رافضة فكرة الزواج الاآن و طول عمري كنت اقول البنت بالأول لازم تشتغل و تثبت روحها بعدين تتزوج و عقبها تقدر تبني حياة سعيدة مع شريكها

و دايما كنت استغرب البنات اللي يتزوجون في عمر صغير او للحينهم يدرسون .. و الله كنت افكر هذي البنت ليش ما تعيش حياتها و تستانس و بعدين تتفرغ حق عوار الراس

و المشكلة ان الجو المحيط كلللش مو مساعدني.. اهلي الله يخليهم لي خوش ناس و احب امي و ابوي وايد بس للأسف ساعات تصير هوشات و شجارات وايد جدامنا احنا العيال و هالشي مأثر فيني وايد
و أدخل قسم الحية الزوجية ..و يالهووووووووووووووووووووووي صج الله يعين البنات على مشاكلهم

من قبل فترة تقدم لي شاب يصير لنا من بعيد و هالصبي مثل ما ينقال انه ما يتطوف و خوش واحد و يحط الحرمة على راسه و يحترمها و يدلعها و انا قعدت معاه بالشوفة الشرعية و صج تبينت من هالشي
و الحين أهلي يضغطون علي لان الصبي ما ينرد
و لكن صاحبتكم راسها يابس كلش مو مقتنعة بالزواج قبل لا اتخرج من الجامعة و اتوظف
وصرت افكر و ادور و ابحث و ادرس

يا بنات و الله اني رحت دورت ابحاث عن الزواج من جامعات و قمت اقراها
قمت اقرا كتب
لا لا مو الكتب اللي خبري خبركم
كتب تاريخ .. عن نشأة الزواج و عادات و تقاليد الزواج بالشعوب و غيرها من الاشياء اللي ممكن تساعدني اني اغير وجهة نظري عن الزواج

تدرون شنو لقيت؟؟؟
دراسة من جامعة امريكية – ما اذكر اسمها الحين – تفيد بان الزواج فيه فائدة كبيييييييييييييييرة

للرجل!!

الرجل المتزوج اكثر سعادة من الرجل الأعزب
الرجل المتزوج اقل كآبة من الرجل الاعزب
الرجل المتزوج مفيد للمجتمع اكثر من الرجل الاعزب
الرجل المتزوج يعمر اكثر من الرجل الاعزب

الخ.

الحين وين المشكلة ؟؟؟
المرأة المتزوجة اقل سعادة و اكثر كآبة و تعيش اقل من المرأة العانس

اي اي بالظبط فاهميين علي؟؟ خلاصة هالدراسة انه الزواج مفيد جدا للرجل … لكنه العكس تماما للمرأة

و الله اني تعبت و يمكن اسلوبي شوي غريب لاني ماعرف اعبر بالعربي وايد اعذروني خواتي و تحملوني شوي

الله يخليكم .. ابي احد يقنعني بالزواج
ابي احد يقولي اني اقدر احقق طموحي حتى لو تزوجت
ابي احد يقولي اني الزواج مو عائق و حجر عثرة في
ريح نجاحي و التزامي نحو وظيفني
ابي احد يقولي اني لا تزوجت راح اكون اكثر سعادة و ماراح اتحسر على العز اللي عايشة فيه ويا هلي

و الله اني مادري شسوي اخاف اوافق على الريال و اتحسر بعدين و اتذكر القصة القصيرة اللي كتبتها اول الموضوع
و اخاف ما اتزوج و اعنس على قولة اخواني لاني عمري 21 سنة و ما قط احد خطبني او حتى كلموا اهلي او سألوا عني

ساعدوني بنات و فيدوني بتجاربكم و اللي تعرف وحدة كبيرة تزوجت و اهي تدرس و صارت دكتورة او مهندسة او حققت طموحها و فادت بلدها الله يخليهم ودي اتواصل وياها

انا الحين عندي قناعة انه اذا ما تزوجت راح احقق طموحي و اتخرج و اشتغل و ارفع راس بلدي و اهلي

ابي احد يقولي انه هالشي ممكن مع زوج

و بلا مبالغة اتجرأ و اقول
زوج عربي خليجي … !

نشكر لكم حسن استماعكم ..