قصة ولاده الراجيه مغفرته لبنات المنتدى

شلونكم بنات حبيت اقولكم قصة ولادتي انا ولدت بتاريخ 3/11 وجبت بنوته بمستشفى الهادي
طبعا انا الشهر الاخير كله كنت عند اهلي لان زوجي مسافر وماراح يرد الابعد شهرين ونص
المهم كنت قاعده اتغدا ولا احس شي خفيف نزل علي واقوم واروح اشيك ولا ماي خفيف قلت حق امي ولاتقول عادي انطري وبعدين كل ما اتحرك وامشي قاعد ينزل ماي خفيف ودم للمغرب قلت خلاص يمه انا بروح مستشفى الهادي قالت كيفج المهم فكرت وقلت يمكن انا مو مفتوحه واروح ويلعبون فيني ويحطولي طلق صناعي وانا ما ابي طلق صناعي لاني جربته بولدي يذبح قلت اروح مستشفى الفروانيه طوارىء اشيك اذا انا مفتوحه اروح طيران لمستشفى هادي واقوم وادق على اخوي الصغير ماعنده حتى اجازه قلت ودني المستشفى لانه غريب من بيت اهلي وما اقدر اروح معاه الهادي وابوي مسافر المهم رحت ودشيت وسالت السستر في دكتوره قالت ايه قلت خلاص انطر عشان تفحصني المهم يوم جاء دوري ولاتقول السستر الدكتوره عندها عمليات وبتروح وفي دكتور المهم قلت باطلع ما ابي دكتور يفحصني ولا يكلمني الدكتور وقالي شنو تبين قلت ابي دكتوره تفحصني لاني طايفه موعدي والله قام وكلم الدكتوره الله يجزاه خير قامت وفحصتني ولا اربع سانتي مفتوحه يلا دخول قلت لا ما ابي اولد قالت وقعي على مسئوليتك واطلعي طيران على المستشفى اللي بتولدين فيه قلت خلاص وارد البيت وتقوم امي تدق على اخوي الكبير عشان يجي يوديني المهم قلت ماني رايحه لين انوم بنتي وولدي والعوار قاعد يزيد علي المهم ناموا واقوم ابوس كل واحد فيهم وابجي واخذ جنطتي واطلع وكانت امي بتروح معاي قلت لها لا خلاص انا اروح بروحي واركب السياره واقعد ادللي اخوي الطريج والعوار كل عشر دقايق وانا متحمله ما ابيه يتخرع واضيع اخوي الطريج واقوله الطريج ونوصل اوا ما وصلت ولا قدامي بالطوارىء خمس حالات والعوار صار كل خمس دقايق وانا ميته وقاعده انطر وقاعده افكر واقول لو زوجي عندي اللحين جان عرف شلون ادخلني واخوي ما يعرف شي المهم ما قدرت اصبر واقوم وادخل على السستر وقول لها انا خلاص ما اقدر العوار كل خمس دقايق والماي قاعد ينزل المهم دششتني وفحصتني الدكتوره وقالت اربع سانتي دخول وقامت تسالني انتي جم عندج ومتى اخر دوره واقوم واعصب ليش هذا مو مكتوب بملفي قالت لا هذا ملف جديد قلت شنو انا توني مراجعه عندكم وجايبه عيالي هنيه قالت راح يلقونه كلمي الاستقبال وسوا اوراق الدخول واطلع ولا تقول السستر حق اخوي سو اوراق الدخول وانتي امشي فوق قلت لا هذا اخوي ما يعرف شي ورحت معاه وسوينا الاوراق ولقا ملفي واطلع حق الغرفه واقول حق اخوي خلاص روح لاتنطرني راح وقمت لبست ملابسهم المهم الا انا واصله حدي خلاص ما اقدر امشي ويدخلوني غرفة الولاده غرفة بروحي ويعطوني الكمام وروح واجي الصراحه من الكمام وكانت دكتورتي رشمي وعلى طلعت الراس قوموني بوش بوش وجبت سارونه الساعه ثلاث وربع الفجرصج اني تعبت بس لما شفتها نسيت كل شي
ويوم صحيت من النوم قمت ودزيت حق زوجي رساله وقلت له انا ولدت وجبت احلى عروسه
ومانسيت بنات قسم تاخر الانجاب وبنات المنتدى ان ربي يرزقهم ويرزق كل محرومه