|
|
السلام عليكم
الحمدالله يارب ولدت بتاريخ 11-7-2011 ويبت احلى البنات اسم الله عليها
اخر مراجعه لي كانت بتاريخ 10-7 مع الدكتوره ليلى اشكناني
رحتلها وكان فيني عوار بريولي اليمين وفخوذي جنه عرج ناط ماقدر امشي عدل اسحبها سحب عشان امشي
رحتلها وانا نفسيتي خلاص موصله حدها قلتلها بس ولديني ما اقدر اتحمل عوار ريولي ظحكت علي قالتلي بتولدين عشان ريولج تعورج قلتلها لا خلاص انا خلصت شهري ومالي خلق كل يوم اروح اسوي تخطيط
المهم بعد حنه ورنه
قالتلي خلاص المغرب روحي المستشفى
وصلت المستشفى 8 وعلى ماسويت الاجراءات 10 ونص دخلت الغرفه تقريبا
اجراءاتهم اتطول الزحمه اتنرفز انا وايد كنت متنرفزه ومتوتره
جهزت اغراضي ولبسوني لبس الميانين
السسترات يهبلون بس الدكاتره اييبون المرض حسافه مالقطت اساميهم عدل الدكتور ساعه ونص على مايت اتحطلي تحميلة الطلق الصناعي دشت حتى بدون ماتسلم قطيعه تقطعها نرفزتي حطت التحميله وذلفت ويو السسترات حطولي التخطيط طبعا مادري شالسالفه قالتلي لاتتحركين عالاقل ساعه
وانا ساعه نايمه على ظهري لا اقدر اتحرك لا يمين ولا يسار خايفه اخر شي ناديت السستر قلتلها خلصت الساعه بنام على جنب تعبت جان اتقولي ليش مانمتي تحركي عادي بس قصدي لاتمشين 
وانا ذابحه روحي بالنومه السيده حتى ريولي خفت احركها
بعدين قالتلي شربي عصير وتمشي بالغرفه مشيت وشربت رديت نمت ولا فيه طلوق خفيفه قاعده اطالعها بالجهاز اي نسيت اقولكم كنت مفتوحه بس سانتي وبعد اربع ساعات من التحميله وصلت سانتي ونص دقيت عالدكتوره بالغصب يتلي قلتلها ماقدر انا ابي ابرة الظهر نزلوني قالتلي نطري لي 3 سانتي قلتلها مابي تعبت
نزلوني ولا دكتور الابره مو فاضي عنده عمليه نطروني ساعتين تقريبا ماقدرت اتحمل عطوني الكمام بس خففو عليه عشان اقدر اقعد حق الابره من اول ماخذيته جان اهستر ابجي واظحك ماتحملته شوي جان ادوه وانام جان اتيي الدكتوره مالت الابره مادري شنو اصلها اجنبيه ساعه الا ربع اتغزني الابره عورتني الصراحه وعقبها بدى يخف عوار الطلق بس مااختفى كلش وكنت احس شويه بالفحص لمن يفحصوني لي الصبح ماكو فايده الرحم مصكر دكتورتي ليلى كانت متواصله معاهم قالتهم بطو الماي بطوه جان يبطل رحمي 3 سانتي شوي ولا 4 بعدها بديت احس بكل شي وقمت ابجي وكل شوي فحص تعبت ويتلي دكتوره مصريه نفسيتها حلوه قالتلي انتي مو قاعده تتعورين بس خايفه اقولها والله احس مو راضيه اتصدقني جان اقولها شوفي جهاز الطلق اذا ارتفع الرقم راح اقولج بدون ما اشوف وصج كلمن يزيد الطلق اقولها فيه عوار استغربو زادو جرعة الابره 5 مرات ولا اكو فايده ماكو تأثير قاعده احس جان اينادون دكتوره ثانيه حق التخدير قلبوني شافو الابره ولا متحركه او مو غازتها عدل فالدوا مو قاعد يأثر خلاص قالولي بس مانقدر انغزج مره 2 اخذي كمام
خذيت كمام وصار فاصل كوميدي مابقى شي ماقلته هلوست صح يبيلي موضوع ثاني 
الحمدالله كنت احس بعوار الطلق بس خفيف وبس عقبها فحصوني ولا 5 ونص دقو على دكتورتي بعد عمري يت على طول بدعت معاها كل شوي اقولها انا احبج خخخ والحمدالله فتح رحمي لي 10 جان يوخرون الكمام وسويت بوش 4 مرات تقريبا وطلعت بنتي حبيبتي والدكتوره حيل كانت صبوره معاي معني اذيتها بحنتي كل شوي اقولها مابي اسوي بوش اخاف تلوع جبدج مني خخخ وكل شوي اطرد ريلي وامي اخاف يشوفون طلعو بحزة طلعة الراس
وطلعت حبيبيت حطوها على بطني توني بمسكها جان ادوخ وانام قعدت ولا عماتي يمي وصعدوني الغرفه ماحسيت بالخياط ولا شي
وتجربتي كانت حلوه ومو حلوه
اهم شي صحت بنتي حبيبتي
تقيمي حق المستشفى
زحمه
الدكاتره اغلبهم نفسيه يطولون على ما ايوون يمكن لانه دكتورتي من برى مو مهتمين مادري
السسترات زينين الحمدالله بس ستاف عن ستاف غير
الساعه 12 حطولي تحميلة الطلق الصناعي
ثاني يوم 2 ونص الظهر ولدت الحمدالله
غرفتي كانت الملكيه
عقب الولاده وايد وايد كنت تعبانه وصداع امي كانت اتوكلني اول يوم
ثاني يوم سبحت
بالغصب قدرت اكل
الحين احس بعوار ظهر مال النومه
وبس اي اسأله انا حاضر
وكل يوم عن يوم يزيد خوفي من المستشفيات الخاصه
من القصص اللي اسمعها
الصراحه علوووج وتعبوووج اكثر من تعبج
هذا بفلوسج وجذي سووا عيل لو ابلاش شبيسوون
انا بولد بالحكومه ابرك
ومبرووك عالبنوته ان شاء الله تنسيج كل هالتعب
ويعطيج الف عافيه عطيتينا من وقتج
ماقلتي شنو سميتوها؟
كنت اقرأ لج ردود بالقسم بس ما انتبهت متى ولادتج … يالله فصلت على سالفه الكمام يحليلج عيل طلعتي تحبين هاه هههههههههههههههه
امانه شنو كان تعليق الدكتورة هههههههههههههههه
شدي حيلج نبي موضوع ثاني فيه فصلت الكمام.
ومبروك النونو
والحمدالله ع سلاااامتج
الله يجعلها من الذريه الصاالحه يااارب
والف مبروك
وتتربي وتدلل بعزكم يارب
ومبروووك ماياج
لا يكون الي غزتج الابره البوسنيه العيوز ؟
اهيا الي لعوزتني بابرتي !!!