قصة ولادتي المفاجأه بولدي حبيبي

اشكر كل من بارك لي وهناني واشكر رفيجتي ام جوود واشكر كل بنات تجمع شهر يناير وماراح انسى احلى ايام عشناها ابتعبها وحلاوتها

انا دخلت التاسع بتاريخ19|12 والدكتور حددلي تاريخ23|12 عساس يفتح الربط مالي

حجزت الصالونه قبلها ابيوم وحفيت وتنظفت ويوم 23 دهنت شعري مع ان صارلي فتره مو داهنته ورحت تسبحت ودقوا علي عيادة دكتوري ماجد الشمري وقالوا عندج موعد اليوم قلت بتأخر بالجيه لان الدكتور قال تعالي متأخر قالوا تعالي الحين لان الدكتور عنده ولادات اليوم وبيطلع امبكر

رحت على طوول العياده ودخلوني ع الساعه 7 تقريبا وحاول الدكتور يفك الربط بدون بنج والعوار موطبيعي وقاعده ادعي واستغفر بعدين قتله دكتور خلصت؟؟ قال لا ماقدرت افتح الربط لان الربط صار عليه لحميه وانتي انفتحتي 2 سانتي روحي مستشفى العرف وانا بكتب لهم يدخلونج غرفة الولاده عساس بس افتح الربط ببنج بس اول بروح عندي ولاده بدار الشفا وعندي ولاده بالعرف

قلت اوكي رحت مع زوجي العرف وبالطريق زوجي قال روحي العرف بكره مولازم اليوم!! قلت الدكتور لازم يفتح الربط اليوم وانا مفتوحه 2 سانتي وينزل علي دم موزين

المهم دخلوني غرفتي وانا شعري كله مبلول ماي ما استشورته عقب السبوح والغرفه بارده وحطولي الدريب وجذي بعدين نزلوني غرفة الولاده وكنت اسولف مع السسترات بالانجليزي كاشخات فيني هع عقب اسألتني دكتوره جم لج؟ قلت 36 اسبوع ويوم قالت وناويه تردين البيت وقلت ان شاء الله جان تضحك

المهم قريت اية الكرسي جان تسألني سستر انتي خايفه قلت لا بس يفتح الربط موخايفه

عقب دشت دكتوره مصريه اول مره اشوفها وفهمت انها بتسويلي شغله وقالولها تو الناس وقالت ان الدكتور داق عليها وقايل لها وعقب مادري اشصاااااااااااااار

بس اتذكر اني نايمه وافتح عيوني واشوف الكمام ينحط علي ورديت نمت عقب قمت لقيتهم امقعديني بيشيلوني والدكتور ماجد عندي وقال لي انتي قيصريه ايد الجاهل اطلعت هزيت له راسي ورد قال لي انتي قيصريه ايد الجاهل اطلعت ولقيت مكاني كله دم ورديت نمت وقمت والعوااااااااااااااار موطبيعي واصارخ غطوني بردانه وعطوني ابرة مخدره

ولدت تاريخ 23|12 الساعه 10 بالليل بس ماجابولي ولدي ولما جا الصبح ترجيت السسترات عساس بس اشوفه وطلع كتكوووووووووووووووووت
بس والله بنات ماتوقعت القيصريه اتعووور لهالدرجه الكل يقول تنامين تقومين تلقين اولدج جمبج مرتاحه وطلع العكس
وثاني يوم السستر خذتني اتوديني الحمام وانتوا ابكرامه وقالت لازم تقعدين ع الغنفه اشوي وانا اشوي وابجي اقول لها موقادره العوار موطبيعي وبالغصب قعدتني والا تجيني دووخه وما احس باللي حولي ولا اسمع ولا اشوف وهي اتصفق بخدودي واختي تصيح وماصحصحت الا لما شمموني اسبرين
ويوم الجمعه الصبح جاني دكتوري ماجد الشمري الله يجزاه كل خير ويبيض وجهه وقال لي انتي فعلا تحتاجين ربط ابحمالاتج لان انتي ماكان معاج اطلوق ولا تقلصات ابدا واول مافتحت الربط انفتح معاج الرحم 6 بعدين 7 سانتي ولان ماي الجنين كان زايد ابسبة سكر الحمل انبط الماي والجاهل طلع ايده واضطرينا انسوي لج قيصريه ونصحني اخذ كيس دم مع فيتامينات لان طلع معاي فقر دم وزاد عقب العمليه وقال لي اجيه عقب جم يوم عساس يشيل اللحميه ويكويها

والحمدلله انا اليوم احسن بفضل ربي ثم بفضل الدكتور ماجد الشمري ودعائكم