|
|
مرحبا بنوتات
شخباركم انشالله طيبيين
انا اول ماتزوجت على طول حملت وكنت كارهه الحمل ومابيه في اول شهر من حملي نزل معاي دم وكان الدم متقطع واحسبه دوره ودايم كنت امشي واشرب دارسين واخذ شاور حار ابي الدوره تنزل وكنت ساعتها مسافره اول مارجعت من السفر ولدت وحده من قريباتي ورحت ازورها بالمستشفى وانا جالسه عندها مدري شنو جاني وجلست اتخيل نفسي مكانها وشلون يالله تقوم ويالله تقعد والبيبي كل شوي يصيح قلت في نفسي لايكون انا حامل وانا مادري بس رجعت البيت سويت تحليل حمل وطلع لي خطين جاني شعور غريب مدري شنو صدمه على مومستوعبه على زعلانه كلمت امي جان تقولي احمدي ربج هذي نعمه من ربج غيرج يدور الحمل المهم قالت لي كلام واجد والحمدلله وزوجي كان حيل فرحان بحملي لأنه يموت بالأطفال ..
ومرت شهور الحمل اول ثلاث شهور كانت حيل متعبه دايم مغص ببطني وظهري يألمني وكنت اطبق ميداني بالجامعه وكله واقفه على رجولي ودايم مافيني حيل وبسرعه اتعب وصايره يالله يالله اتنفس شي ضاغط على رئتيني ونفسيتي زفت ماتحمل شي ابد ومالي خلق زوجي ولا اطيقه ابد كرهته وكرهت ريحته و اي شي اكله لو نتفه احس يوقف ماينزل ويضغط على صدري ماتحمل.
الشهر الرابع والخامس والسادس كانت حلوه ارتحت بهالشهور وماحسيت بأي تعب فيها بالشهر الخامس بديت احس بحركات البيبي كانت مثل الفقاعات داخل البطن مدري شلون بس شعور حيل حلو.
بالشهر السابع بان بطني وحركة البيبي زادت وبالثامن كبر بطني اكثر وثقلت حركتي و ظهري كان يعورني الم يروح ويجي وبنتي جالسه تحت صدري على اليمين مقدر اقوم ولا اقعد ولا انام منها حيل ضاغطه حتى لما اشوف بطني مايل على اليمين واليسار فاضي وكانو يقولون وزنها 3 ونص وكنت خايفه يزيد وانا مابعد دخلت التاسع ..
بالشهر التاسع ثقلت خركتي اكثر وبس انتظر متى ولادتي وانتظر الطلق بأي وقت وكل ماخسيت بألم قلت طلق وانتظره يستمر بس مايستمر يروح وكنت دايم اتحرك وامشي واكثر الجماع ودايم اكل تمر واناناس كنت ابي اولد بسرعه..
المهم كات موعد ولادتي حسب السونار 5-5 وحسب الدوره 12-5 ..
جا تاريخ 5-5 وكان عندي موعد بالمستشفى رحت سويت سونار كل شي كان اوكي ودخلت ع الدكتوره وطلبت منها تفحصني فحص داخلي كنت متفائله يكون رحمي مفتوح المهم فحصتني الدكتوره وحيل حيل عورتني حسيت يدها كلها دخلت ولله بطني حيل ارنفع يوم فحصتني حسيت بنتي وصلت لصدري جان تقولي الدكتوره مفتوحه 1 سانتي واذا نزل منج دم ترا عادي لاتخافين بس اذا حسيتي بطلق تعالي لأن الفحص مثل التحريض ع الولاده رجعت البيت الا القى الكلوت كله دم سكت وقلت عادي واستمر الدم ينزل معاي لبكره بعدها صارت تنزل مني افرازات مخاطيه فيها خيوط دم لما نزلت هاذي الأفرازات خفت تكوت سدادة الرحم رحت للطواريء ابي اشيك فحصوني نفس الشي واحد سانتي وحطولي جهاز الطلق نص ساعه ومابين فيه طلق قالو مافيج ولاده ورجعت البيت واستمرت الأفرازات تنزل مني ومعاها ماي وانا مادري شنو هاذي الأفرازات وشنو سببها بس حطيت ببالي انها بسبب الفحص ..
قبل موعد ولادتي بيومين كان يوم الخميس قمت من النوم الساعه 6 رحت الحمام تكرمون لقيت على الكلوت افراز اخضر ومويه شوي وريحة غريبه جان ادش النت واسوي بحث اغلب البحوث طلعت لي ياألتهاب او البيبي متبرز جان اروح اقوم زوجي كنت قبلها بيوم متهاوشه معاه وهو نايم تحت قومته من نومته ابيه يوديني الطواريء ولله كان قصدي اعنيه لأنه قاهرني كان .gif "Eh S(4)")
فحصوني وكالعاده 1 سانتي وحطولي التخطيط مافيه طلق زوجي يشتغل بالمستشفى نفسه راح يبي يبصم وخلاني بالطواريء جان يلقى بالطريق الدكتوره اللي اراجع عندها وقالها الموضوع جان تقوله بالشهر التاسع المفروض ماتنزل عليها افرازات انا اللحين راح اكلمهم اخليهم يشوفون المويه هاذي ايش وكنت ساعتها توني لابسه عبايتي بطلع الا يقولون لي لحظه شوي حبيبتي نبي نكشف نشوف هاذي موية البيبي ولالا قلت اوكي نمت على السرير وحطولي القطنه اللي جنها عود اذاني ويد الدكتوره حيل ثقيله عورتني يوم حطتها وحرقتني حيل تألمت حيل يعني الفحص باليد اهون منها مع ان انا من قبل مجربتها وماتعور بس مادري هالمره شكلها مدخلتها غلط او جارحتني يوم دخلتها ..المهم ماعلينا طلعت القطنه الا قلب لونها اسود اول ماشافت الدكتوره القطنه كل القسم انخبص ويسألوني انتي شلون متى ينزل منج ماي من اي يوم كم صار لج قلت شنو شسالفه قالو هاذي موية راس البيبي انتي لازم ولاده انا هني تعالو شوفوني تشققت من الوناسه واخيرن بولد جان تجي دكتورتي قالت لي شوفي ياحبيبتي انتي نازل منج موية الراس وهاذي المويه هي اللي تحفظ البيبي من المثيرات الخارجيه الأمراض والألتهابات وكل شي وبما انها نزلت خلاص مافيه شي يحفظ البيبي وخطر عليج وعلى البيبي تبين ندخلج ولاده اول تبين تروحين مستشفى ثاني انتي حره قبل ماتكمل جملتها قلت لا ولاده ولاده
.gif "Eh S(9)")
هذا الكلام كان الساعه 8 الصبح زوجي ضبط اوراق دخولي وكلم امي وابوي وقالهم اللي صار وانا رحت غرفتي بدلت ملابسي ونمت ع السرير شوي الا جو وحطولي الابره الشرجيه تكرمون بعدها بساعه رحت الحمام وفرغت كل اللي ببطني واصلا ماكان شي ببطني نايمه بدون عشا وقمت ماأفطرت وعلى طول رحت المستشفى بعد مافرغت حطولي المغذي وخذو مني تحليل دم بعدها بشوي حطولي التحميله اللي تفتح الرحم وكانت الساعه تقريبا 10 بعدها بنص ساعه بدا معاي الطلق شوي الا امي وابوي جايين فديتهم وجلسو معاي وانا كنت اتألم بس مستحيه من ابوي ومابي ابين اذن الظهر راح ابوي يصلي ورجع البيت وبعدها بدا الطلق اقوى كان قوي وبين طلقه وطلقه دقيقتين جاتني الدكتوره على الساعه 12 فحصتني الا قالت مفتوحه 3 سانتي انا هنا استانست يعني بوقت قصير انفتحت 2 سانتي قلت الحمدلله يعني على المغرب انشالله والده ويزيد معاي الالم قوي حيل امي يوم حسبت لي قالت هذا طلق وحده بيطلع راس البيبي لأن مابين الطلقه والطلقه غير دقيقه دقيقتين ومارضو يعطوني مسكن لأن رحمي مومفتوح الا 3 انصحتني الدكتوره بالمشي وبديت امشي انا وزوجي بممرات المستشفى وشوي انا وامي وكل ماجتني الطلقه اخذ نفس عميق واجلس استغفر ولله يابنات الأستغفار حيل يهدي من الألم بشكل فضيع المهم تحملت وتحملت لين الساعه 4 ماقدرت اتحمل دخلوني غرفة الولاده وبعدها جاتني الدكتوره تفحصني جان تقولي مفتوحه 3 سانتي انا هنيه بغيت اموت كل هالألم والوقت والطلق اخر شي مانفتحت شي توقعت بكون مفتوحه 6 او 5 جان اقول ابي مسكن مخدر اي شي قالت الدكتوره دكتور التخدير موجود بالغرفه الثانيه اذا تبين ابرة ظهر قولي قبل لايروح جان تقول امي اي اي تبي ابرة ظهر قالت لازم اول شي تدفعون سعرها لأن ماعليها تأمين وتروح امي وزوجي للرسيبشن عشان يجيبنون الفاتوره وتأخرو حيل بغيت اموت من الألم شوي والدكتور مستعجل وراه شغل ويبي الفاتوره عشان يحطلي الأبره تخيلو على الأقل تعال خدر المنطقه او عقمها لا لازم اول شي الفاتوره شدعوا بنحاش يعني ..المهم جا زوجي وعطاهم الفاتوره وجا الدكتور لبس الملابس والقفازات وجلسني بوضعيه يكون فيها ظهري مثل حرف السي وحط المخده بحظني وقالي حاولي ماتتحركين واذا جاتج الطلقه اخذي نفس عميق وحاولت قدر الامكان ماتحرك حطالي اول شي المخدر بين فقرات الظهر وحسيت فيه يعور بس مو مثل الطلق الم الطلق فوق كل الم وحطالي ابره بيدي مثل المغذي بس مادري حقة شنو وشوي لين يطلع مفعول المخدر حط لي قسطرة الظهر وحط فيها المخدر هذا كان الساعه 4 ونص من بعدها حسيت بالراحه شي شي خيالي وين الألم اللي كنت بموت منه وين العذاب كله راح حيل ارتحت بس برد الطلق عندي حيل وضطروا يحطون لي طلق صناعي جات الدكتوره وبظت ماي البيبي الساعه 5 جات الدكتوره فحصتني مفتوحه 4 سانتي انا ارتحت من بعد الابره وماصرت احس بشي حتى لما يفحصوني ماحس بأي شي جلس عندي زوجي وامي وجلسنا نسولف ونمت شوي على الساعه 7 فحصتني مفتوحه 5 ونص بس المشكله الطلق الصناعي كل ماتجي طلقه يقل نبض بنتي عشان جذيه حطوني تحت الملاحظه كان الستف اللي موجود ذيك الساعه يهبل الممرضات والدكتوره يجننون نفسيتهم وابتسامتهم واهتمامهم وحيل حيل كنت مرتاحه الدكتوره كانت كل شوي تجي تشيك علي وتدعيلي وتمسح على راسي والممرضات ابتسامتهم ماتفارق وجيهم يهبلون حيل المهم الممرضه قالت لي كل ماحسيتي بألم قوليلي لأن يكون مفعول الابره راح عشان احط لج جرعه وكل ساعتين ونص كان يروح المفعول واناديها وتجي تحط لي جرعه ابرة الظهر تهبل بس سببت لي رجفه كنت ارجف بس تحط لي جرعه وبعدين تخف رجفتي المهم على الساعه 8 فحصتني الا مفتوحه 6 وعلى الساعه 9 مفتوحه 7 وعلى الساعه 10 مفتوحه 8 وهنا وقفوا مفعول ابرة الظهر عشان احس بالطلق واقدر اسوي بوش على الساعه 11مفتوحه 9 حيل استانست قلت الحمدلله جا الفرج المهم على الساعه 11 جات الدكتوره تودعني انتهت مناوبتها انا بغيت ابجي كنت ابيها ومتفائله بوجودها المهم ودعتني وتمنت لي ولاده سهله وراحت بعدها جات المناوبه وكانو كلهم هنود ونفسيات ومالهم خلق مادري توهم قايميين من النوم ولا يبون ينامون والدكتوره حامل وتعبان شكلها المهم طولت على ماجات تفحصني اول شي جاتني الممرضه تعرف بنفسها وانها راح تكون وياي وعلمتني شلون اسوي بوش وحضرت الاشياء حقت الولاده على طاوله وشوي جات الدكتوره فحصتني وكانت عادي كأني تو الناس علي جان اسألها دكتوره كم سانتي قالت 10 قلت يعني ولاده قالت حبيبتي كيف ولاده انتي لازم شدي قلت كيف شدي جان تقول النيرس سيم سيم سوي براز قلت يعني بوش قالت ايوا بس تحسين بالطلق سوي بوش وكل ماجتني طلقه احاول ادقع بأقوى ماعندي وماحسيت الطاقم متحمس معاي مدري ليش وعينهم على التخطيط شوي الا جات دكتوره ثانيه وتفحصني ويتكلمون انجليزي ومصطلحات طبيه مادري مافهتم لهم وانا شوي واموت من الألم والبوش ساعتين وانا ادفع تخيلو شوي الا تقول والدكتوره كل مادقعت تقول ايوا ايوا يلا يلا يلا يلا وكل ماقالت كذا قلت اكيد الراس الممرضه تمسح وجهي وثنتين يضغطون بطني على تحت يحاولون ينزلون البيبي والدكتوره تحاول بيدها من تحت وانا احاول ادفع بكل قوتي اخر شي قامت الدكتوره طالعت التخطيط وتكلمت مع الدكتوره الثانيه جان اقول شنو دكتوره ايش المشكله بالأنقلش قالت ماعليش ياحبيبتي البيبي راسه مانزل بالحوض ونبض قلبه ضعيف ولازم قيصريه وين زوجك يوقع الأوراق وينادون زوجي وقع الأوراق ودخلوني على العمليات وانا بموت من الألم حطا لي الدكتور الكمام وقالي اشفطي بنفس عميق هذي اخر كلمه اتذكرها وبعدها نمت ماحسيت الا مبروك مبروك بيبي قيرل وانا بغرفة العمليات نص ساعه وولدوني يعني على 2 ونص ولدت لما قوموني وسمعت كلمة مبروك نزلت دموعي لا اراديا ولما شفت امي وزوجي جلست ابجي وامي تحاول تهديني وتبارك لي تقولي بنتج مثل القمر وبصحه وعافيه وانا ابجي حيل خفت على بنتي ..
المهم بعدها ودوني غرفة الملاحظه وعطوني منوم وجات امي وزوجي ودعوني ونمت قمت على الساعه 4 وناديت النيرس ابي اشوف بنتي جان تجيبها لي يوم جابتها ماصدقت عيوني ضميتها وبستها ياحياتي على اللي كانت ببطني 9 شهور سبحان الله والحمدلله على اكتمال النعمه وتمام المنه.
جلست بالمستشفى 6 ايام وبعدها طلعت البيت كانت اول الايام من بعد طلعتي من المستشفى حيل متعبه كنت ماقدر اتحرك ولا اقوم واقعد لأن مكان العمليه على الحده بالضبط وعمليتي كانت كبيره وفوق هذا عانيت من الأمساك بشكل فظيع ومؤلم على الرغم من اني اكل مسهلات..
بنتي جميله جميله بشكل ماتتخيلونه صورها انتشرت بين الناس بسرعه البرق والناس مو كلها تعطي خير جاها يوم تخيلوا بس ترجع وماترضع ولا تنام مت من الخوف عليها وجلست امي تقرا عليها وودوها المستشفى وامي تدعي ان الله يحفظها ويبعد عنها كل شر والحمدلله بعدها بيومين صارت زينه وترضع شوي شوي..
المشكله اللي عانيتها بنتي ماتتقبل صدري وماتبيه وكنت ميته ابي ارضعها طبيعي بس شكل ال 6 ايام اللي قضيتها بالمستشفى خلاها تنسى صدري وتتعوج على الرضاعه..
ماكنت متخيله بيوم من الايام اولد قيصري وطول حملي وانا احاتي الولاده الخياط من تحت مومستوعبته لكن الحمدلله..
هاذي قصة ولادتي واللحين صارلي من ولدت 35 يوم ياربي لك الحمد عقبال الحوامل يارب مايفرحون بشوفة بيبياتهم ..
بنتي تبجي برب .gif "Eh S(16)")
والله يحفظ لج بنتج يارب
دمعت عيوني يوم قلتي بجيتي لما ولدتي
كل هالتعب و اخرتها قيصريه الحمدلله على كل حال
ارقي بنتج كل يوم وماعليها الا العافيه ان شاءلله
م قلتي لنا اي مستشفى ولدتي ةالدكتوره
الحمدلله ع سلامتج والله يخليلج البنووته ويصلحها
.gif "Eh S(17)")
الله يأجرك وتكفير ذنوب ان شاءالله
وربي يحفظ بنتك من الشر ويخليها لك
قصتج وااايد مؤثرة ان شاء الله الحمل الياي يكون اسهل وتولدين طبيعي
و قصة تفاصيلها ان شاء الله تفيد و تعطي فكرة عن الولادة
و الله يكتبلج ولادة سهله و طبيعية المرة الياية و ترضعين طبيعي
و معروف البيبي اذا تعود عالرضاعة الصناعية يرفض الصدر
الله يحفظ بنتج و يبارك فيها
وتاثرت بقصتج وايد
وان شالله اليوم اللي لي وكل حبايبي يفرحون بهل اللحظه
والحمدالله
وكله اجر
اي مستشفى ولدتي