|
|
يسم الله الرحمن الرحيم انا من فتره وانا حابه احط هالموضوع وهي قصتي شلون حملت بالحمل الاول…وادعلولي ان الله يتمم حمالي الثالث….اول يوم تزوجت فيه كنت متوقعه ان اول مايدخل علي زوجي راح احمل حالي حال بنات العايله ماشالله كلهم حمل بالملجه وتوقعت اني راح اكون نفسهم..وبعد ليلة الدخله بسبوعين انزلت علي الدوره وماحملت قلت يالله توني عروس لييش مستعيله وماكان عندي شعور الامومه ابدا ابدا ماكن يهمني الحمل بس كنت ابي افرح زوجي واهلي بس ماصار المهم ويعدها بشهر وشهرين وثلاثه طبعا ماكنت اعرف ايام التبويض وهالسوالف وبسبب جرحي الي مابرا من يوم الدخله ماكان يصير بيني وبينه شي بتعمق….بلشو الاهل القراب والبعاد بجملت (هاااا ماكو شي بالطريج)وكنت اقولهم لا ماصار وبعدها الشهر الرابع بلشو الرفيجات والناس البعاد والقراب(ها ماكو نونو)والجواب عندي تغير لا تو الناس…الشهر الخامس بلش الوسواس فيني (ليش ماحملت)قمت افكر وافكر واسال مني ومناك عن ايام التبويض وطريقة النوم والسوالف هذي…علموني وماقصرو وصرت امارس العلاقه بيني وبين زوجي بهدف الحمل وبسسسسسس وطبعا تدرون كثرة التفكير مو زينه لان الجسم يفرز غدد وانزيمات تمنع الحمل عن الواحد..طبعا ماصار حمل..نرد عالاهل والناس الي مانخلص منهم يدقون على امي ها كربووشا ماحملت؟؟وامي تقول بنات هالايام الحمل عزيز عندهم وناس يدقون على خالتي ام زوجي ها ولدج ماصار عنده شي؟؟وخالتي لا والله ماصار توهم خل يستانسون..الشهر السادس متنت شوي من الزواج والي تشوفني مبروووك حامل انا لا؟؟مو معقوله متنانه انا الله كريم..غيرها تساسر الي يمها ويشوفون بطني..وبعدها يدقون على امي ها بنتج حامل امي لا مو حامل…ألمهم…انا سافرت برا سياحه وقررت اروح اول مره عياده اجيك واسوي سونار اذا في شي مني مناك..رحت ولا ماكو شي وكل شي تمام عطوني اول مره كلوميد وهم كنت اتوقع اني احمل على كلوميد من اول مره لا وكنت متوقعه اييب توووم 
جنج انا
الي ذاابحنا حجي الناس تمرض وتيييب المشااكل لنا
يالله كملي ناطرينج شنو صار للجيس
يا كربوشا كملي حبيبتي ناااطرييينج
امبيه شصار فيني اندقرت ومالي ويه مع العلم اني ماقلت حق احج اني حامل….فقررت اسوي شي تدرون شنو؟؟؟قلت صج صج تعبت ونفسيتي تعبت وصرت انا وزوجي كل مانبي نسوي شي بقصد الحمل نتهاوش او يكون الوضع مو مريح مانقدر نسوي شي لان يكون مو رغبة متعه فاهميني اكيد….المهم قلت اني بمشي واقول حق الكل ومن ضمنهم اهلي اني حملت واجهضت وعطوني حبوب تنظيف لاني باول الحمل…وفعلا قلت حق الكل والكل درا اني حملت وطيحت والنتيجه(ارتحت من الحنه)عقب مارتحت من الحنه هني تفرغت عدل حق نفسي..المهم رديت حق الدكتور النصاب الشايب الي مابقا تحلبل مابقا عله ماسواها لي وماشاف فيني شي فر عالمسكين زوجي..زوجي طبعا نفس عليه وتهاوش معاه قاله شلون تقول انها حامل جان يقول انا قلت اشتباه حمال (الجذاب عيل وين مبروك يابنت انتي حامل اكلي تمر عن اللوعه)المهم صار نقاش حاد بين زوجي والدكتور وبعدها تعدل الوضع في سبيل العلاج والانجاب وطبعا علاقتي مع زوجي ردت اخربت..طلب الدكتور من زوجي فحص الحيوانات المنويه وراح زوجي سوا التحليل وراجع لي مفور معصب تسقل فيني وصراخ مااصارت عروس خلاص كثر حنت الحمال ماحسيت بلذة العرس كلش..تدرون ليش سقل فيني يوم رد لان تخيلو ريال ماله خلق ومو مزاجه ياخذون منه الحيوانات المنويه يقوله روح الحمام حاول وتعال..حمام العياده ومن الصبح بعد ويع شالمزاج..بعد ماطلع فحص زوجي الصدمه الكبيره..الدكتور حق زوجي بص يا فلان انت لازم بتعرف ان كل شي بالدنسا قضاء وقدر …انا طلعت عيني وكنت بنهار تشنجت وزوجي بعد..الدكتور الحمار وانتو بكرامه(الحيوانات المنويه زي الحجاج الي عايزين يروحو للحج كل واحد منهم يحمل حاجاتو واغراضو معاه للرحله الطويله الي عن طريق البر في منهم يوصل سريع بالطياره والباقي بطيئ بالبر))طاااااع التشبيه كلش ماكو منطق..ههههه..صج شر البلية مايضحك…المهم قلب من سالفت الحجاج دخلنا بسالفت (فلان انت عسكري)زوجي تاليف اي ليش)الدكتور لانك معضل(زوجي لاهو عسكري ولا شي )الدكتور:ايوا يافلان(زوجي يادكتور كمل لاتخربط وايد) الدكتور عيب عليك انا دكتور وشوف شهاداتي ورا ظهري(زوجي اوكي كمل طبعا حده منغث)الدكتور ايوا يا فلان الحيوانات المنويه مثل العساكر علشان تفهم اكثر…لمن يروحو عالحرب حرب العراق…زوجي قام يصارخ عالدكتور يقوله والله انك مو صاحي وقالي قومي قومي هذا وايد يخربط..@@انا عيني طلعت لي برا بعرف شفيه زوجي تعبت عيني قامت تدمع خلاص..طلع زوجي انا ماطلعت زوجي حده متنرفز قعدت قلت له دكتور زوجي شفيه..جان يصدمني الدكتور بالواقع زوجج الصراحه ماوده يتقبل الواقع وعادي كل ريال مايرضا ان يكون العيب فيه..انا انهرت قمت ابجي جام يقولي اذا زوجج جذي مايبي يعالج انسي الحمل..تتوقعون شصار فيني والله ماقنت احس بجسمي..قلت له من شنو قالي يمكن ياخذ حبوب عظلات حق النادي او يغز ابر..قلت له والحل قالي لازم انتي بعد تعملي عمليه امشي الحين الحين ادخلج اسويلج منظار يشي التكيس…؟؟؟هذا شفيه مينون ماكان فيني شي قالي لا انتي اليوم سويت لج سونار لقيت فيج كيس صغير..امبيه لا مو صج اكيد ين الدكتور..رحت حق زوجي وقلت له برا عني ولافتحت حلجي عن الكلام الي قالي اياه عنه..جان يقولي زوجي عمليه ها…جان يدش عالدكتور ويصرخ ويقوله انت صج نصاب يابو حروب وعساكر وحج اكيد انت مخرف يالخبل وعمليه ها والحين منو يقول انك مادي …غسل شراع الدكتور وراح وقالي يالله تعالي قلت له اوراقي عند الدكتور باخذهم قالي بسرعه.رحت حق الدكتور اعتذرت منه وقالي عادي زوجج معصب من الي فييه..وقالي في ضعف بالحيوانات ومايمديهم يوصلون لج راح يموتون بالطريح..هذي اخر كلمه قطها علي علشان الاحباط وقالي دفعو برا..قلت له انشالله..وسحبنا عليه…..المهم رديا واخنا بالسياره زوجي احس صار مينون شوي قام يعصب ويقول انا جذي انا جذي؟؟؟وكلام وايد..انا ماخذته على قد عقله لين اشوف امي شتقولي..المهم رحت حق امي وكلمت اختي وقلت لهم الدكتور قالي ان زوجي فيه لزوجه جان يقولون عادي فوار برتقال وعصير برتقال وعسل…وقلت حق زوجي ان هالاشيا تقوي الريال ويالله يالله رضا يشرب يوم يشرب وعشرلا…خلصنا من هالدكتور ويت لي الدوره بالشهر الثامن رحت دار الشفا اسامه صالحه ومنو مايمدحه يوم رحت له نفسيه شيو عطيته تقاريري قالي مافيج ولا ولا شي..ولا زوجج وهذي الصدمه قلت له سالفة الدكتور الي قالي عن زوجي جان يضحك يقول ماكو ولا شي…تعاليلي لمن تكملين سنه..التكمله بعد قليل صكني حارج هههههههه يالله بالانتظار معنج عروس يعني ما طولتي ياقلبي بس مي خالف
يالله ناطرينج
وشربي حليب وخيار علشان الحااارج
قالتلي هذا الكيس وايد صغير وماكو نبض كلش خل ننطر اسبوع بس مايبشر بالخير…انا جني وحيت تعلقت فيه وحطيت امل كبير فيه ان خلاص بيتم…طبعا كالعاده من عساده لي عياده ماكو فايده كل الدكاتره يقولون ماكو نبض وطبعا دار الشفا عططاني امل70% ان بيطلع نبض حسبي الله عليهم لعبو فيني لعب عطوني امل…وكان حمالي بو 3 شهور..اخر شي قالولي خلاص ماكو امل
قلت لا حرام الي قاعد يصير فيني ليش جذي وصارت علي ضغوط التفكير وحاله يوم من الايام قعدت من النوم ولا نقطة دم رحت الحمام ولا شي يطيح وانزف وانزف وانا بجي مو من العوار لا ضايق خلقي انا الشي الي تاملت فيه راح رحت المستشفى سولي تنظيفات..طلعت من المستفا احس صرت مينونه الا شوي قعدت ابيت امي صرت اخاف من كل شي اخاف اسوق اخاف من الظلمه من الاصوات من شقتي اخاف اخاف اني اموت احس اني اختنق والله صج صج عانيت… رفيجتي الي متزوجا معاي حملت وراي على طول باسبوع تحبطت ان المفروض مع بعض نولد بس ماصار نصيب حقي الله يوفقها..وانا خلاص نفسيتي صارت صفر حتى لي رحت السينما مع زوجي ماكمل الفلم اخاف مادري ليش…ودوني قرو علي ارتحت..بس رد علي الخوف مره ثانيه…سفرني زوجي ارتحت برا الكويت مادري ليش مابي الديره بالي فيها..شالي صار مادري..ردو قرو علي وارتحت عقب مانظفت ويتلي اول دوره قلت حق الناس والاهل اني ماخذه حبوب منع حمل مابي احمل الحين بخلص دراستي…علشان مابيهم يحنون حطيت في بالي بطول بالحمال عقب التنظيفات..وخلاص انا بعد ماقمت افكر كثر قبل مع ان زوجي يكسر خاطري وايد عانا معاي…وبعدها صج ماحملت اول شهر ورا التنظيفات ولا ثاني شهر حملت عقب التنظيفات بشهرين وماكنت متوقعه اني بحمل بس قمت احس اني تعبانه وماشكيت اني حامل لان حسبالي نساتي الاولى نفس الثانيه لازم تكون..وعقب ماتاخرت دورتي بثلاث اسابيع اول مره تصير بتاريخي ماافحص سكت ماقلت ان متاخره عليحتى حق زوجي قلت افحص بروحي وفعلا فحصت وطلع posetive للمره الثانيه بشرت زوجي وايد فرح واهلي كانو مسافرين فرحو بس تصدقون ماكنت فرحانا ابدا ابدا احس خفت وتحبطت قلت اكيد ماكو نبض..خفت اسوي سونار..عقب شهرين سويت سونار وقالولي خفيف النبض تحبطت وبجيت قالي تعالي الاسبوع الياي..قلت ماني رايحه والله الي عطاني والله الي ياخذ…بس عقب حنه واصرار زوجي رحت والحمدالله الجنين طبيعي والنبض مسموع واضح بس ماكنت مستانسه..بشرت القراب من اهلي ومو الكل درا هالمره مع اني كنت مصره ان الناس تدري لاني بالحمال الي طاح ماقلت حق احد وماتم واحس اني فاولت على نفسي يوم قلت اني اجهضت وفعلا وراها حملت واجهضت..المهم قلت بقول هالمره والي بصير خيصير وفعلا تكلمت بس مو حق الكل طبعا وعقبها بالرابع اعلنتها والحمدالله بس كنت وايد خايفه وكنت انطر اطوف الثالث واوصول الرابع والخامس علشان يغدي شري والحمدالله الحين انا داشه الثامن بعد جم يوم وحدي كا ماصار شي اروح افحص واروح العيادات ماتبت احس صار فيني وسواس وكله خايفه ان مايتم..بس والله يابنت بفترة العلاج والحنه والحمل ماكنت انسى ربي والله كنت كله اركع واصلي ركعتين ادعي من ربي يرزقني بالذريه الصالحه ويوم رزقني مانسيته اصلي ركعتين شكر وايد صرت قريبه من ربي بهالمعاناة يالله كنت ارتاح والله(معلومه بهالحمال كنت مابي احن عالحمال صار عندي شي عادي والله رزقن الحمدالله)مع العلم بعد ترا كنت اييب رداده صينيه ورا الدورتين الي حملت فيهم وكاسات هوا وبفضل الله ورا المرتين الي سويت فيهم مساج حملت الحمدالله..بس هذي قصتي ومعاناتي وعلى فكره هاللويه كلها اول مره حملت عقب 9 شهور زواج والمره الثانيه عق سنه و 3 شهور من الزواج..الحمدالله على كل حال ربي لاتذرني فردا وانت خير الوارثين يالله ربي يرزق الكل
قصتج مأثره وايد
عاد انا خذيت كلوميد بدون استشااره الطبيب وطلعلي تكيسات منهم خخخخخخخخ
كل شي خيره وربيي رزق كل محروومه ياااارب
مشكوره وايد
كنت احتاج اقرا موضوع جذي
انا صارلي متزوجه بكمل السنه و ما حملت و كلمن غاثني … و زوجي مسكين ما يتكلم بس اشوفها بعيونه .. و اهله متعبيني نفسيا .. سويت مراجعات كل شي طبيعي .. و بخليها على الله .. الله سبحانه اعلم بحالنا و يبيلنا الاحسن
جزاك الله خير
الله يتمم لج على خير ويفرحج بشوفته
يارب