قالتلي انها تطلقت واهي مستانسه

مرحبا بنات …… ذاك اليوم رحت بيت عمي عشان الزواره دشيت ما وعيت الاالصفقه واليباب قلت لهم شصاير قالولي بنت عمج انخطبت وانا هم صرت وياهم باللويه يو الرياييل عقب 3 ايام من اللويه اللي سويناها وطبعا قعدت مع بنت عمي نسولف شنو نسوي تعرفون بعد سوالف بنات ما بقى شي ما راح نسويه يبنه لسته وكتبنا فيها كل شي الصالون القاعه الحلو الديجي النفنوف الكوشه الخ الخ …. وكنا في قمة الوناسه وكنت كل يوم اروح واقعد طول اليوم عندهم تحجى ويون باجي البنات وطايحين له سوالف ويه يوم الملجه كانت بسيطه حدها ما فيها لويه كلش حتى اهله ما يو بس اهو يه اخذ العروس واحنا البنات نترقص ونغني وفرحانين وطبعا كل زواره العروس طالعه (عاد الله والطلعه ) المهم مر شهر على على جذي بعدين رحنا عند بيت عمي كنا معزومين شفتها مو على طبيعتها قلت بنفسي بدينا الهواش مايمديج خو توج مالجه شفت ايدها ما شفت الدبله قلت اه في ان عقب يومين دقت علي تقولي شنو صار معاها في هالشهر اللي ملجة فيه اول شي قالتلي انها طالبه الطلاق عاد شوفو ليش اول ما راحت عند الحموله والا طايحينله سب في بعض واهي كانت قايلتله ان اهي ما تحب السب عادي الام تسب بنتها والبنت ترد عليها عاد بنت عمي قعدت يم خالتها تسولف جان تقوم الخاله تحش في رفيجة عمرها وشوي الا هالرفيجه داشه عليهم جان تقوم تهلل وترحب فيها عاااااااادي بعدين سولفت الخاله مع بنت عمي عن مكان العرس قالت لها بنت عمي مادري يمكن (نسيت المكان) بس حطيت اسمي عشان مايروح الحجز واذا لقيت احسن باخذ قومي يا الخاله الملقوفه وطبعي الكروت قالتلها بنت عمي لا انا بغير المكان جان تقوم تهد فيها ودقت على مرت عمي وبهذلتهاشي مو طبيعي لا واذا طلعت مع ريلها دقو عليه يقولون له اخوانه اشوفك لاهي تروح سينمات ومطاعم (بعد يا ربي معرس خلوووووووووه)لا ما يصير وبس واهو كلمه توديه وكلمه تييبه وطبعا في اشياء وايد فطلبت الطلاق مارضي رفعت عليه قضية خلع وردت له كل شي وافتكت منه ودقت علي تقولي الخبر واهي مستاااااااانسه

لاحول ولا قوه الا بالله
الطــلاق صــار شي عادي هالأيام

اكيد تستانس .. البيئه اللي شافتها ما تبي تعيش فيها طول عمرها .. تعودت على شي في بيت اهلها و الحين شافت شي ثاني .. ما تنلام .
و الطلاق مو عيب و حلال ..بس انه ابغض الحلال .
الله يوفقها بغيره اللي احسن منه و يناسبها .

استغفر الله العظيم من كل ذنب عظيم

صار معدل الطلاق بالكويت اكثر من معدل الولاده !

هذا اللي بغيت اوصله بالضبط وتروالي الطلاق في هذي الحاله صج يفرح

لاحول ولاقوة الابالله

هذي اولها ينعاف تاليها الطلاق بحالتها نعمه

انا مع اختي زينه

اهم شي انه عرفته وعرفتهم ايام الملجة مو عقب ماراحت عندهم وصارت عند الريّال
اشوا انها عرفت وتدراكت من أولها ،، لو انها قاعده جان احملت ويابت الياهل وتوهقت ،،

القصد ،، انه مدام انهم عالبر وبالبداية ،، مافيها شي لو ينفصلون
ولا انها تقعد معاه ويدخل عليها وتحمل ،، وبعديـــــــن ،، تنفصل !

فهمتوا قصدي ؟

عسى ربي يوفق الجميع ويخفف حالات الطلاق المهوله !
ويستر علينا وعلى بناتنا وعيالنا وحبايبنا والكل ،،

وياربي تفتّح عقول شبابنا وبناتنا وتركّدهم وتخلي عقولهم امبطله
مو عقول سخيفة وتافهه وعلى اتفه الأسباب ،، انتي طالق .. أو ،، طلّقني

وتقبلوا مروري

الله يرزقها باللي احسن منه خيره

صاجه

الله يعوضها خير

صج الوحدة لازم تاخذ واحد نفس بيئتها