|
|
كنت عند مستشفى الولاده
كان فيني طلق ايام رمضان نص رمضان حسيت بالام الطلق ورحت حالي حال اي حامل بالشهر الاخير
وتم فحصي وطبعا تعرفون اشلون الفحص مايحتاي اوضح اكثر
قالت الطبيبه فتح الرحم ان شاء قريب تولدين يمكن على الليل
رجعت البيت وانا صايمه طبعا
ماولدت وبعد يومين ياني عوار مرة ثانيه ورحت وفحصت ونفس الطريقه ونفس الكلام
الى ان صار اليوم قبل الاخير من رمضان وفحصت ونفس الكلام
فقلت للطبيبه تراني تاذيت صار لي اسبوعين وانتو تقولون نفس الكلام تولدين بالليل ولا اشوف تدخلوني للولاده
فانبهرت الطبيبه وبما انها من الاهل قال اووووووووف اسبوعين
قلت لها احس راس الياهل طالع وانتو تقولون تو الناس
مو قادره اقعد ولا ني قادره اكل وانا صايمه مو معقوله هذي
فقالت لا لازم تدخلين واذا ماولدتي نعطيج طلق صناعي ولازم نولدج
المهم راح الطلق الى يوم ثاني وانا رايحه تكرمون الحمام حسيت نزل علي الماي فجأة وحسيت الياهل بينزل قمت ابجي والدموع اربع اربع
شافتني وحده كانت بالحمام عند المغاسل
قالت اشفيج قلت لها بولد خلاص
نادي احد وبسرعه رحت الفراش وجا الطبيب
قلت له مابي طبيب ابي طبيبيه ( بعد قويه باس )
قال اليوم خفارة وباجر العيد مالج امل تلقين احد اليوم
قلت مولزوم
والله سهل ونزلوني تحت للولاده وجت طبيبه متفرغه حدها وبمنتهى الاهمال
فحصت وقالت باقي اربع ساعات على الولاده يكون خبيره الاخت
يبطون جبدي اذا قعدوا يتفلسفون ويحسبون محد يعرف شي غيرهم وانهم واصلين كلش
المهم يالحبيبات
بس طلعت مني ما مداها صرخت على الممرضه
قلت تعالي بسرعه بولد
قالت لا الطبيبه تقول بعد اربع ساعات
قلت ليش الطبيبه اللي بتولد والا انا
اقول لج بولد
قالت لا ماراح تولدين يتهيالج
قلت اقولج طلع الراس احس فيه
هذي سادس ولادي لي شنو ماعرف الولاده
قالت لا بس الطبيبه تقول
والله ياجماعه بقيت اذبحها بس مافيني حييل
المهم طلعت تحت لقت الراس فعلا طلع
جان تقول لي صبري اشوي لاتولدين
قلت اشلون يعني ابلعه مع ويهج
اقولج طلع الراس تقولين صبري شنو قاعده اقول لج حصرانه اعزكم الله
والله ولدت ياجماعه وطلع البيبي بدون مساعدتها وبعد من الغباء منها
ومو بس غباء كثر ماهو تكبر فيهم كبر مو طبيعي
تبي تثبت حق روحها انها تفهم وتعف وتقدر تسوي الشغل بروحه
قلت لها نادي احد معاج ما رضت
المهم خلت البيبي على ريولي وقالت لي رفعي روحج عشان اشيل المشيم
قلت لها هو انا فيني حيل انت صاحيه ؟!
وقالت ترى البيبي على ريلج لا تطيحينه
عجيب خوش والله
قلت لها اسمع الياهل يكح كانه شرقان قالت المهم انتي
عجيب والله والياهل ؟؟؟
وبعدين قلت لها لون البيبي اسود مو طبيعي قالت ادعي له
طبعا انا ولا كلمه خمرت مرة وحده
وكل شوي تقول ادعي للبيبي
بصراحه حبست دموعي ليما ودوني الغرفه 
وهناك لاقاني ابوالعيال عند باب الغرفه
قال الحمد الله عالسلامه
وين البيبي
انفجرت وبجيت
قال بس بس يبه يسلم راسج ولا يهمج
مو لازم
عقب راح للممرضات وسالهم
قالوا ان البيبي شارب ماي من بطن الام فخليناه بالحاضنه وبعدين يطلع ان شاء الله
وبعدين رجع يضحك قال خرعتيني على البيبي
ترى مافيه شي
قلت خذني تحت اشوفه
وبعد الزيارة خلاني اروح له واشوفه
الحمد الله
نستخلص من القصه بعض الاشياء منها
الطبيب لازم يكون على معرفه باحكام الدين والفقه
ويعرف الادويه اللي يعطيها المريض خاصه للصايم
ثانيا : طريقة الفحص ففي فحص الولاده من تحت يفطر الصائم
وهذا اللي اكتشفته بعد مرور شهور من الولاده لاني صرت اسال وافادوا الشيوخ بان هذا النوع من الفحص يفطر الصايم
وكذلك وضع التحاميل من القبل او الدبر يفطر الصائم
وكذلك للمتزوجين حديثا الولوج حتى بدون قذف يفطر الصائم فالبعض يظن انه لايفطر ولكنه يفطر
هذا ماعلمته من الفقهاء بالكويت والله اعلم
وطبعا عيالي اول يوم العيد يكسرون الخاطر من غير شر من غير امهم
المهم صار على كل ايام الفحص صيام دين والحمد لله الله سهل وصمتهم
وبطت جبدي دكتورتج شنو وين قاعدين حاطه الياهل بحضنج جان اشتكيتي وين السسترات؟
ومشكوووورة انا اول مره ادري انه الففحص يفطررر مشكووورة ويزاج الله خير
والتحاميل بعد اول مره اسمع
وغدى شرج ان شاء الله
ومبروك ماياج