|
|
سلام عليكم ورحمة الله وبركاته..
الظاهر من خلال مواضيعكم انكم عطلتوا .. اجازة سعيدة
انا يا مدرسات عندي مشكلة وكل سنه تتكرر عندي تقريبا واهي عبارة عن اعيال المدرسات اللي معانا في المدرسة اذا صارو عندي في الصف والله اقعد ادعي اني ماادرس ولد مدرسة والمصيبة اذا صار مستواهم دون المتوقع من اهلهم اشلون اتعامل معاهم
يعني الحين انا في موقف لااحسد عليه ..
الموقف الاول :.عندي ولد مدرسة وولدها امانة مممتاز جدا مو بس ممتاز الا عبقري في مادتي بس سبحان الله استغربت انا نفسي من الغلط اللي ارتكبه ,, الحين المفروض ينقص 3 درجات تقريبا شافتني امه وسئلتني عن درجاته فقلت له انه ناقص بالنهائي ..اشوي وتموت وردي له الورقة من غير مااحد يدري قلت لها مااقدر اذا رديتها له لازم اردها لغيره قالت انتي تعرفين مستواه قلت لها واعرف مستوى غيره بعد قالت لي والحين انا ماابي ولدي اييب بالشهادة اقل من 100 بالله عليكم من وين احط المئة واذا بزيده بزيد غيره ما يصير يعني لانه ولد مدرسة لازم الدرجة الكاملة ما يصير
الموقف الثاني : عندي ولد وحدة من اعضاء الادارة وولدها مسكين مستواه جدا ضعيف عنده بطئ في التعلم يعني اقول لكم انه ما يسوي شي غير انه ينقل من السبورة الى الكراسة المهم بيوم الامتحان حطيناه باللجنة الخاصة علشان المدرسة اتابعه اول باول ومعاه مجموعة من التلاميذ الضعاف عاد انا كنت امر على الصفوف علشان اوضح الاسئلة واخر شي مريت اللجنة الخاصة لقيت انه واحد مستواه جيد الى جيد جدا اهناك باللجنة قلت له محمد انت بالغلط يايي اهني المفروض انت بالصف وبعدين للحين ما خلصت ؟؟ رد محمد قال معلمة انا المفروض خلصت مبجر بس لانه المعلمة يقصد فيها ام الولد ( الادارية ) كل حين اتيي تشوف اجابتي علشان تعلم ولدها !!
انزين اهو ابتدائي مو ثانوي يعني شي اساسي والحين معاج بالمدرسة بعدين بروحه وانا خايفة الله وخايفة م الظلم ولااعرف اتصرف يعني ماامبي اسوي مشاكل للمدرسات اللي معااااي
انا يضيق خلقي اذا شفت واحد من عيال المدرسات بصفي وحتى لو يكون ممتاز
انا معلمه قبل الامتحان بيوم تجي تسأل شلون طريقة السؤال شنو المهم !!!!! قلت كل شي بالمراجعه قالت الدرس الفلاني مهم ادرسه والا اطنش الدرس !!!! يعني بما معناه تبي الامتحان بس ما عطيتها الي تبيه قلت يدرس المراجعه مثل عيال خلق الله
فأنتي لاتعطينها وجه من البدايه
ولدها زيه زي عيال الناس ماعلى راسه ريشه
أنا العام وحده من الأبلات ولدها كسلان وقليل أدب
كثير عليه الجيد جتني وبكل وقاحه أنا زعلانه منك ؟ وأنا المسكينه أسألها ليش خير أن شاء الله !!
أتاري الحبيبه تبيني أعطيه أمتياز !!! موكفايه متحمله قله أدبه في الصف حت شرح موقادره أشرح !!
بس شتقولين ناس ماتستحي
والله حرام حتي بالابتدائي واسطات الله المستعان
والله حراااام عليهم في ابلات بضمير يشتغلون وفي لاابلات الله يهديهم
آنا أدرس ولد رئيسة قسمنا وصراحة … إهي المرة حيل محترمة وحبييييييبة وأقدرها وايد وااايد
وكل مرة تسألني عن ولدها وأقولها عن مستواه بصراحة..
وقبل لا أحط درجة الفترة الأولى دقيت عليها وقلت آنا ما أبي أصدمج أو أخلي بخاطرج شي..ترى هالشي مضايقني قبل لا يضايقج آنا ما ودي أحطله هالدرجة بس شسوي هذا مستواه… ما فيه مجال أعطيه أكثر من هالدرجة…
قالت لي : عادي أهم شي تسوين اللي يريحج…
طبعا حطيت له "جيد" وما ناقشتني … بالعكس قالت لي آنا عارفة مستواه … وحتى بعدها تقول الولد شد حيله أكثر وتأثر بالدرجة…
يعني آنا لو بجامل الأم على مصلحة الولد جان استانس بعمره وأهمل الدراسة لأنه ضامن التفوق… بالعكس خل ينقرص عشان يتعلم…
وصراحة الولد مستواه تحسن عالشهر اللي وراه وحطيت له جيد جداً…
حرام اصلا تساوين مستويات الكسالى بالشطار
وبالنسبه للاداريه اذا اهي مغششه ولدها فانتي مالج شغل بذمتها
وعلى طاري بطيء التعلم او الي يعاني من صعوبات التعلم لومشيتيه بالابتدائي والمتوسط مستحييييييل يعدي الثانوي
انتي اشتغلي بضمير ترى الدنيا حياة وممات ماتسوى عليج هالسوالف تضيق عليج قبرج
مو شرط عيال المدرسة دائما متفوقين
وهم في معلمات يضيعون حق ولد الابلة لاي سبب
انا اذكر بنتي كانت معاي في المدرسة واهي مستواها عادي لكن رد ابلتها خلاني اشك انها درجتها
لما سألتها عنها تقول انا كنت اقدر احط لها درجة —– بس خليها عشان تتعلم
قلت يعني اهي تستاهل اكثر بس انتي تبينها تشد حبلها ؟؟ تقومين تضيعين عليها الدرجة ؟؟
هذا واهي زميلتي ظلمتها
قمت نقلت بنتي مدرسة ثانية والحمدلله مشت
فمو شرط ان المعلمات يحطون لعيال الابلات امتياز 
عيال المدرسات قصتهم قصه كل سنه ..
انا ما احب أدرس صفوف اللي في عيال ابلات حتى لو الصف شاطر بصراحه ..
شوفي حياتي بصراحه هي تعتمد على شخصيه الابله نفسها
يعني من أول مرة تحط حدود ..
وتبين لها ان علاقتج معاها شي .. وعلاقتج مع الولد كـ ابله شي ثاني ..
انا كذا مرة يطيحون عندي عيال مدرسات كل سنه تقريبا :d
وفي الشاطر وفي المتوسط وفي الكسلان ..
بصراحه الشاطر شاطر ..
واقول لامه بويهها .. مو عشان ولدج .. بصراحه الولد يستاهل ..
واللي متوسط أو كسلان ..
اقول لامه بويهها .. حاولي تشدين عليه ترى الولد مو مركز معاي ..
أو مو ماشي معاي ..
واقولهم ..
اذا هو ولدج .. ترى الصف كله عيالي …
وما احب اظلم احد على حساب أحد ..
والله توني اكلم اختي عن هالسالفه هههههههههههههههههه
حبيبتي اهم شي ضميرج وزعل العباد ولازعل رب العباد
قولي لما تضيع الامانه وازيد ولدج معناه ظلمت كل الصف وانا ما اوزع صدقات !!
والله كانت عندي بنت مدرسة على طررريف وتسقط
والثااانيه على شفا حفره
وكان عندي بنات مدرسااات شطاااار وفي منهم ممتاازاااات لا وازيدج من الشعر بيت درست بنت الناااظره وكانت على مو اللى تبين يعني جيد
———————————————–
انا بنتي بمدرستي القديمه يعني اعرف ابلااتها صج يابت امتيااز بس مو مرتفع يا معوده من جد وجد ومن زرع حصد
ومو علشاان ام الطالبه زميله ارووح اعطيها درجااااات لا هذا شغلنا واحنا محاسبين عليه من رب العالمين
اول شي هذا ظلم و اذا كنت بعطيه الاجابات بعطي حق غيره , بحطله 100 بحط حق غيره 100
انا اقولج اذا ييتلج الام << المدرسه
قوليلها ما اقدر و سامحيني و مالج شغل فيها ازعلت ولا عند يدي
و انا كانت معاي بنت و امها تدرس والله ولا كلمتني ولا قالت زيديها بالعكس كانت حبوبه و حالها حال البنات
صح موقف لانحسد عليه
وانا كلش ولا هسالفة كان عندنا جم بنت امهاتهم بمجلس الامهات وهم شطار بس وااايد مدللين والاخصائيات معطينهم برستيج انهم فوق البنات ومعاملة خاصة مرة ياتني الاخصائية تقولي بيني وبينج حطي حق فلانة درجة كاملة اهيه الاولى ع المرحلة قلتلها ان زدتها بزيد الصف كله وماراح تاخذ الا حقها حالها حال البنات ..
انا عن نفسي اعطيهم حقهم وبس
حتى مره درست بنت اخوي وعطيتها تقدير جيد جدا
اهتمي بشغلك
و واسي بين التلاميذ لازم تعدلين بين الكل من دون تفرقه