عملية تجميل الأنف ,,, أمور تخيفني

وناويه أسوي العمليه .. وأحاول أحجز موعد
لكن إلى الآن المستشفى مابعد يردون علينا

يعني يمكن أسوي العمليه .. ويمكن لأأ …
لأن للحين مابعد يوصلني الرد منهم

أدعولــي بنات الله يسهل أموري ~~

~~~~~~~~~~~~~~~

حبيت أكتب الأمور إلي تخوفني بعد إجراء عملية تجميل الأنف

أحب أذكر إن (نجاح العملية والنتيجه)
كله هذا توفيق من الله سبحانه وتعالى
وإلي تنجح عمليتها ..
يحق لها تشكر الله ليل نهار وتقول الحمد لله رب العالمين ألف ألف مره
لأن كم بنت مسكينه ربي بلاها بعمليه فاشله ونتائج مريره
وخسرت فلوس وجهد .. كله راح هباء منثورا ..
ونسأل الله يعوض هل بنات ويخلفهم خيــر .. وكل مشاكلهم تنحل يارب

~~~~~~~~~~~~~~~~
وإليكم الأمور التي تخيفني

إذا الله قدر وسويت العمليه ..
خايفه من هل أمور

1- السلام على الناس
أحاتي إذا جيت بسلم على الناس
شلون أسلم عليهم
معروف إن احنا بالخليج,, مايكفي نسلم باليد على الحريم
لازم سالفة (التقبيل على الخد) وإذا وحده كبيره بالعمر (نبوسها على الراس)
أخاف تجي وحده تسلم علي بخشونه وحراره (اسم إن من زمان ماشافتني)
وتصقع بخشمي وينعوج

2-الخوف من اخواني الصغار
مشكلة أخواني دفشين ويحبون الهواش والصراخ.
وخاصة بالسيارة إذا جينا بنطلع ,, أم الزحمه
((بالبيت أقدر أبعد عنهم .. بس بالسياره حاله))
خايفه أحد يضربني أو يطيح فيني منهم,,
أو ولد أختي النونو يضربني على وجهي إذا عصب
أو يرميني بشيء ,, يبيلي أحترس منهم

3- الإصابة بالزكام
أنا أشتكي من حساسية بالأنف
وتعودت إذا جيت أنام لازم أغطي خشمي بالبطانيه
لأن إذا دخل هواء على طول أزكم .. فكيف لو سويت العمليه
((الله يعين)) ما أدري شبسوي بخصوص هل نقطه

4- البثور السوداء
هاذي كثير بنات يشتكون منها بعد العمليه
وصج هي مع الوقت تروح … بس منظرها كريه
وبعض الأوقات تطول لين تروح
وكمان شغلة تنظيف الفتحات
مايصلح تنظيف الأنف بالمناديل
لازم أعواد أذن للفتحات .. الله يكون بالعون

5- المناسبات والمكياج
لمن الوحده تكون توها مسويه العمليه
ويصير عندهم عرس .. ولازم تحضره …
يؤؤؤ شصعبها تروح وخشمها مورم .. ولازم تحط مكيــاج
أحس لو بسوي العمليه كلش ما أبي أحط مكياج إلا حمره وكحل
أخاف حيل على خشمي >__<

6- لزقات الأنف
هاذي الشغله بعض الأطباء يشددون عليها ولازم الوحده ماتهملها
فأحاتي مع الصلاة والوضوء .. كل مره بشيل وبحط في اللزقــات

7- لبس النقاب
إذا سويت العمليه بضطر أغطي وجهي كامل (بدون نقاب)
فالله يعيــن 6 شهور .. إلى سنه كامله بضطر أغطي وجهي
<<< لأن ما أبي أي أثر يتركه النقاب على الأنف

8- الصلاة والسجود
بنات شلون صليتوا أول ماسويتوا العمليه ؟؟
هل كان عادي تسجدون .. بس ماتخلون خشمكم يلمس الأرض
يعني بس تنزلون الجبهه بشويش بدون مايرتطم الأنف بالأرض
ولااا لأ ؟؟

9- الوضوء مع الجبيــرة
بنات كيف كنتوا تتوضئون ؟؟
هل بس تتوضون بدون ماتغسلون وجهكم
عشان مايجي للأنف مــاي ؟؟

الله يسلمكم .. مشكورين على الرد

يآآآآآآآآآآآآآآي. . ألف الحمد لله لك يارب العالمين

مستااااااااانسه حدي .. الحمد لله وصلني الرد^^ .. ومثل ما أتمنى
عمليتي بتكون يوم الأحد .. الساعه 1 الظهر

يارب تيسر أموري وتسهلها (وكل قارئين كلامي ) وتحقق لنا جميعاً إلي نتمناه
ومايصيبنا مكروه .. وتكوون أمورنا ناجحه وبأحسن حال
وما نواجه أي مشاكل أو صعوبــآآت

أستغفر الله ربي وأتوب إليه
سلام قولا من رب رحيم
قُلْ لَنْ يُصِيبَنَا إِلَّا مَا كَتَبَ اللَّهُ لَنَا هُوَ مَوْلَانَا ۚ وَعَلَى اللَّهِ فَلْيَتَوَكَّلِ الْمُؤْمِنُونَ
ما شاء الله تبارك الله .. لاحول ولا قوة إلا بالله العلي العظيم…
اللهم صل على محمد وآل محمد