علمينا خبراتج الدراسية و الفناتق ومنكم نستفيد :)

السلام عليكم و رحمة الله و بركاته

هلا خواتي ..

شرايكم نعلم بعضنا الخبرات الدراسية ..

يعني شلون ندرس .. شلون طريقتنا .. حركات .. فناتق .. اشياء ..

بالنسبة لي :
– انا عندي دفتر اكتب فيه انه عندنا واجب بالمادة الفلانية و عندنا بحث للمادة العلانية و التفاصيل .. و اكتب فيه مواعيد الامتحانات ..
– عندي ملف للجامعة ، بسيط و مرتب احط فيه اغراضي و ملف داخله للأوراق اللي يعطوننا اياها بالمحاضرات .. هالملف احط فيه تلفوني و اغراضي . ما يحتاي اثقّل على نفسي و اخذ جنطة ايد بعد ! ..
– اخلص واجباتي و شغلي أوّل بأوّل عشان ما يتكودون علي ..
– اذا فيه موعد امتحان تغير و الا شي ، اروح للدكتور نفسه و اتأكد منه ، ما اخذ معلومات من البنات عشان ما اوهق عمري ..
– عندي ملفات وايدة لكل مادة .. ملف للواجبات ، ملف للتمارين و المراجعة ، ملف لكتابة القوانين المهمة و التعاريف و القواعد ، و دفتر للمحاضرات اللي نكتب فيه بالقاعة ..
– اوراقي اللي اخذها بالمحاضرة ، لما ارد البيت احط كل مادة و اوراقها في الملف .. فيه اوراق تحتاجينها في المحاضرة فا اخليها بملف مال الاوراق داخل ملفي مال الجامعة ..
– احب استخدم الالوان عشان تكون الصفحات اتونس ..
– احب اكتب ذكريات او تعابير ذكر الله مثل ( الحمد لله ، سبحان الله و بحمد ، الشكر لله ) على صفحات الكتاب في كل مرة ادرس ، احس بارتياح و عشان اتأكد انني درست المادة عدل و مو مخلية قسم .. مو بكل صفحة اكتب .
– عندي لوحة بالدار احط عليها المواعيد المهمة او الاشياء الطارئة عشان اقعد اشتغل عليهم و اشوفهم و ما انسى ..

هاااا .. و انتوا ؟؟؟؟؟؟؟ ..

خلونا نستفيد من بعض

اكيد عندكم افكار و اشياء بتساعدنا وااايد

شاركونا لو سمحتوا

و السلام عليكم و رحمة الله و بركاته

ماشااللـــــــه عليج هابي مرتبه وسنعة …

الله يوفقج …

ا

ذكرتيني بنفسي …وليما الحين على دفتري التحضير …أذكار او ابيات شعر توعويه ..

فعلاً تريح الواحد وتحفزه للأفضل …

ذكرتينا بلي مضى وايام الدراسه

ويييه طلعتوا عيايز لووووول اتغشمر

حياكم الله خواتي اوركيد و نوال

شكرا عالردود

وعليكم السلام ورحمة الله وبركاته

هلا والله بهابي

انا طريقتي اللي أستخدمها سهله ومريحتني وااايد

آخذ النوت اللي يصير في 5 أقسام كل قسم حق ماده بدال ماتتشتت الأوراق

وتعرفون طبعاً الفواصل الورق الملونين ! اللي ينلزقوون

إذا صار عندي H-W أكتب عليهم وألصقهم بالنوت فلما أرجع البيت وأشوف هالورقه تطل علي من النوت وتقولي قوه أتذكر الهوم وورك

والبحوث والميدتيرمات والكويزات أكتبهم بكالندر الموبايل عشان كل شي يكون جدام عيني لا أنسى ..

وسالفة الألوان هذي طبعاً شغله ضروريه

وعن نفسي ما أشيل فايل ! لا أشتري الجناط الكبار وأحط كل شغلي فيها نوت وموبايل وبوك وآله حاسبه وكل شي

حلووو موضوعج ترى ياليت البنات يتفاعلون عشان نستفيد من بعض

حسبييييييي الله على ابلييييييييسج .. قاعدة بـ لاب الجامعة و مييييتة ضحك على جملتج .. حلوووة تطل عليج من النوت و تقول لج قوة ..

لووووووووووووووووووووووول

مشكووووورة على الكلام اللي قلتييه .. شي حلووو موفقة اختي

ههههههههههههههههههههههههههههههههه

شلاب الجامعه إنتي وين تدرسين ماعطلتي !!

ذكرتينا باللي مضى ….

انا ترى ايام الامتحانات ما كنت اراجع واااجد 0…..يعني كنت اماطل ابنفسي لاخر يومين ..يا الله اشد الهمه …
بس طريقتي اني كنت اسوي نفس نظام التوقعات للاسئله مالت الامتحان …يعني اتوقع ان الاسئله رح تكون جذي و جذي ….
فاركز على الموضوع

و بعدين اسوي نفس الملخصات باسلوبي الخاااص ….و اقراها مره مرتين …اهم شي اني افهم مو احفظ …لان انا ذاكرتي حيل ضعيفه في الحفظ …تقول امي سبحاان الله كل الاغاني اتحفظينهم و دروسج لا …

بس اني ماشاء الله كنت دايما من الاواائل ..بس ما ادري اش فيني برابعه ثانوي …انخطبت ..و بالتالي اشتغلت الاحلام الورديه و نسيت الدراسه …فما كانت علاماتي نفس اول …

بس اضطريت اني اعيد الثانويه العامه يوم سافرت للدراسه بره لانهم ما اكتفوا بمالت الكويت …و خذيتها في 3 سنين ( سنه لدراسه اللغه + سنتين للثانويه ) و جبت علامات مااااشاء الله لان هناك نظام تدريسهم عجييييب يعتمد بالاساس على ان الطالب يفهم مو يحفظ ..و هذا الشي اللي عجبني
و بعدين الامتحان على شكل اسئله متعدده الخيارات ..يعني اسهل شي

و الله يوفق الجميييييييييييع

اختي تفـّووووخ ..
انا ادرس بجامعة الخليج و احنا تونا خلصنا دراسة .. امس اخر يوم محاضرات ..
و امس الثلاثاء عندي امتحان عملي فاينل .. و امتحاناتنا الرسمية تبدي باجر الخميس ..

اختي seule12
مشكووورة على مشاركتج الحلوة موفقة

اهااااااااا موفقه حبيبتي

انا كنت اكحط خطوط على النقاط المهمة وبعدين اكتبها بايدي واذا المادة صعبه وقرقر واجد كنت اسجلها بصوتي بشريط واحط نسخة بالسيارة ونسخة بداري عشان ليله الامتحان لما ارجع اكون سامعتها كذا مره فاغلب النقاط تثبت بمخي
ولما الواحد يحلل شخصيته يعرف من اي نوع فانا كنت من النوع السمعي فثبات المعلومات مرتبط بالسمع اكثر اماالانسان البصري يقدر يكتب النقاط المهمة بلوحه كبيرة(مالت الوساءل) ويعلقها بالغرفة عشان يشوفها كل ما دخل غرفته
الله يوفق كل الطالبات

اختي مسك3 ..

كلامج حلو ..

و نقطتج وايد حلوة اللي بخصوص السمعي و البصري .. جزاك الله كل خير ..

انا بس اشترلي النوت الي مقسم وكل ماده قسمها …

ووووو بس!

وانا ادرس اقرا واخطط على الاشياء المهمه :d

وماحفظ افهم واذا شي ما دخل مخي احاول اركز فيه

موضوع مفيد موفقة

عجبتني سالفه الشريط

انا حق الواجبات استخدم الاوراق الصغيرة ومثل ما قالوا لما ارد البيت تكون الورقة جدامي وما انسى
وبالنسبة حق النوت
قبل كنت اكتب بالنوتات اللي تكون مقسمة
بس بحكم اني فوضوية ماحب الترتيب ماعجبتني هالفكره

الحين قمت احط فايل وفيه اوراق مخرمه وفي فايلا ت شفافه مخرمه
اكتب بالاوراق والفايلات اذا في اوراق معطينا اياهم الدكتور احطهم