* طـالبـات العـلـوم الاجـتمـآعيــة <wanted> حيـاكم

حبوبه الواحد ينصح و يقول إللي عنده و عليج القرار ..

يعني الحين لو صاحبة الموضوع دخلت قسم جغرافيا و ما عجبها تحملت و آخر شي ما حصلت وظيفة مثل اللي ببالها
يصير تقول كله منج خليتها تدخل هالتخصص ..

في وايد نصايح الناس تقولها و تطلع صح و نقول اشوه انه ما سويناها ..
و في نصايح تكون عن تجربه .. أو لأنها سامعه .. فمو شرط ..

أنا عن نفسي ما أحب علوم سياسية ولا جغرافية ..
فطبيعي إني أقول لغيري عيوبه ..
لأنه لو زين جان دخلته بنفسي ..

حورية
بالنسبة لي أنا توني متخرجة من علوم اجتماعيه ..
كنت أدرس علم نفس ..
لي الحين ما قدمت على الديوان ..
لأني برتااح ، صراحة تعبت ..
و لاحقة على الشغل إن شاء الله ..
رفيجاتي إللي قدموا يا يودونهم الشؤون يا يودونهم التربية ..
و كلهم يرفضون ..
كل واحد و اهتمامته و رغباته ..
ناس تبي معاش قوي .. ناس تبي مكان زين ,, ناس تبي شغل شوية ..

أنا كنت قايله بصير أخصائية بمدرسة ..
عشان أعطل مع الأبلات و يكون عندي اجازة صيف ..
و كنت أقول عادي لو المعاش شوية ..
شنو بحتاج أكثر من 600 دينار !
يعني على شنو بصرف !
بالكثير بقط 200 و يبقى 400 ..

بس يوم تدربت بالميداني ما عجبني جو المدرسة ..
و كان شغل الاخصائية متعب و يحتاج معاش أكثر صراحة !
و انصدمت إنه معاش الغير جامعيين قريب مننا !
يعني يوم قمت أقارن ، صار ما يعجبني ..

لو بتفكرين فيها أنا جامعية تعبت و كرفت و آخرتها حالي حال المعاهد و مادري شنو ..
راح تتضايقيين ..

أما بالنسبة للتخصص ..
علم نفس ، كنت داخلته برغبة مني ..
طبعا حالي حال وايد ناس عبالهم إنه علم نفس
يعني تحللين شخصيات ، و تصيرين تفهين الناس
و كل ما قلتي لوحدة انا تخصص علم نفس ..
تقول يالله حللي شخصيتي !

بس الدراسة كانت شي ثاني ..
أحس كل اللي درسته بال4 سنين ..
أو 5 سنين لأني تأخرت ..
أحس إني خذيت فكرة عن علم النفس فقط ..
ما أحس إني صرحت خبيره !
أو أعرف أحل مشاكل نفسية و لا أمراض !

أما مثلا إللي داش هندسه يقدر يصلح شي خربان ..
إللي داش انجليزي يقدر يتحجى انجليزي ..
إللي داش كمبيوتر يفيده بالكمبيوتر ..
إللي دارسه برمجه أوتصميم يفيدها بالنت ..

أما علم نفس يعطيج فكرة عن علم النفس بكل تخصصاته ..
تطبيقين جم اختبار .. بس مو بحياتج اليومية ..
فيه معلومات غريبه و يديده .. و معلومات حلوة ..
و شغلات تفيد الأم .. معلومات عن الامراض الجسميه و النفسيه و أسبابها ..

بس ممارسته مو نفس المهندس و الطبيب و المبرمج و المترجم ..

لكن بنفس الوقت كانت دراسته ممتعه ..
كنت أحب المحاضرات .. أحب الكتب .. أستمتع ..
في دكتورات و دكاتره يعطون من قلب ..

لما كنت آخذ مواد ثانية غير علم نفس ..
أحس مواد تخصصي أحلى شي ..

يعني أهم شي تدرسين شي تحبينه ..

و بعد مهم تدرسين شي له مستقبل ..

بس لا تدرسين شي ما تحبينه و لا له مستقبل ..

صج إني درست 5 سنين بتخصص أحبه ..
بس عادي علم نفس أقدر أدرسه بالكتب موجود بكل مكان ..

بنفس الوقت ما دخلت تخصص ما أحبه لمجرد إنه له مستقبل ..
يعني أدب انجليزي وايد قالولي له مستقبل ..
و التدريس له مستقبل ..
لو دخلته جان صار كل يوم بالجامعة سخيف مليق ..
لأني مو قاعده أسوي شي لراحتي النفسيه ..
قاعده أسوي لبعدين .. و يمكن يضبط يمكن لأ ..

باختصار لو تقولين لي ندمتي انج تخصصتي علم نفس ..
أقولج لأ ما ندمت ..
خاصه إني دخلت هالتخصص لأني أحبه ..
مو عشان له مستقبل أو لأ ..
و لا عشان سهل أو لأ ..

و صدقيني لو كان معاشنا 1000 ، هم مراح يعجبنا ..
لأنه الناس كله تقارن نفسها بالناس الثانية ..
و الكل يبي كل شي مثالي ..
معاش قوي ، مكان كشخه و يديد ، ناس زينه ، شغل ممتع طول المده ، أو شغل خفيف
مديرة ممتازه ، زميلات توب ..

بس الواقع غير .. و هذا اللي يسبب إحباط ..

يمكن أنا أتكلم عن شي بالنسبة لج بعيد ..
بس انتي طبقيه بحياتج الجامعية ..

لما تقارنين بين كلاس الدكتور فلان و دكتوركم ..
هالدكتور كله يعطيهم أوف ، و هالدكتور امتحااناته سهله ..
و هالمادة كتابها أسهل عند الدكتورة فلانه ..
و الدكتوره تنكت و تضحك .. مو الثانية عصبية و كله جد ..
وهالدكتور كله يبي بحوث ، و الثاني يعطي اوبن بوك ..

إذا إنتي بحياتج الجامعية كله بتقارنين ..
حتى لما تتخرجين بتظلين تقارنين ..

سوري لو طولت عليج .. ^^