صديقة الطفوله !!شوفوا واحكموا كل الصديقات مثلها ؟؟؟

السلام عليكم
معذره اذا كان مكانه مو مناسب اتمنى المسؤلات نقله للمكان المناسب
بنات ابي اسألكم كل وحده مطلقه مثل صديقتي ؟؟ فيه مثل صديقتي وفيه مثلي ؟؟اسمحوا لي احكي قصتي مع هالصديقه ..
صديقتي من الطفوله .. تزوجت قبلي بسنوات من تزوجت تكبرت علي وصارت مغروره للعلم بان كنا ( قبل لاتتزوج دايم مع بعض )بعدين خلاص تغيرت تماما ماتتصل لي واذا اتصلت لها ترد علي من طرف خشمها تعقدت وصرت انظر لاي بنت انها اكيد بتتغير بمجرد انها تتزوج بعد سنوات وبعد ماصار عندها مشاكل رجعت لي تتصل وتتشكى من حياتها وانا انصحها وقفت معها لاني مانسى العشره الي كانت بينا ..كانت تجلس معي ( لما كانت بنت )من الصبح لليل .. نفطر .. نتغذى .. نتعشى .. نطلع مع بعض .. المهم بعدين كثرت مشاكلها .. بعدين انا تزوجت وكنت مواصله معها والله ماتغيرت ولاشي الا احيانا اتهاوش مع زوجي عشانها .. بعد زواجي بفتره بسيطه جددا تطلقت وهي الي تبي لانها من اول ماتزوجت وهي تبي الانفصال ( هذا موضوع ثاني عن مشاكلها الزوجيه وقصص الحب الي تعيشها )بعدها طلبت تعيش لحالها مع اولادها .. كانت دااايم تتكلم لي عن طليقها وانها مقهووره منه للعلم بانه كثير ساعدها ماديا وهي مطلقه .. مافيه مكالمه اتكلم معها الاا تجيب لي طاريه وبقهر منه (الان تزوج قريبته ) وتذمر منه وتبي تقتله ..مع اني اقول لها خلاص مرحله وراحت انسيه .. فيه موقف صار لي قبل لا تتطلق كنت توني متزوجه وظروفنا الماديه سيئه جدددا لاول مره اطلب منها مبلغ مادي بسيط جدددا ( كان عندها مبلغ ضخم في حسابها وكانت عادي تعطي حبيبها اذا احتاج )وتعرفني ياما كنت اعطيها بدون سلف واذا بتسلف تعرفني مستحيل ما ارده .. طلبت منها وانا ادعي لها تفك ازمتنا وكلها شهر وفلوسها راجعه لها .. قالت زين بعدين تهربت وصارت ماترد على مكالماتي وانا جالسه من بدري عشان اخذ المبلغ وفوق هذا بعد فتره لما كلمتها الا تقولي صراحه استشرت زوجي (الا هو كانت على وشك الطلاق وبينهم مشااكل وعمرها ماستشارته بشي كل تصرفاتها بمزاجها ) ذاك اليوم عاد استشارته وهو كونه مشاكل معها مفكر انا لي دور فكان يكرهني مع اني والله دايم انصحها لاتخرب بيتها ..المهم بعد الاستشاره رفض مو بس كذا الاقالت كم شتمه طلعت من زوجها يقصد زوجي منها انه مو رجال ؟؟!! تخيلوا غير ان المفروض تنحرج انها مالبت لي الا بعد تشتمنا على لسان زوجها وانا حسيت لاي درجه بالاهانه ومن من ؟!! اعز انسانه .. كثير مواقف سويتها لها كثير وقفت معها .. قلت في نفسي حتى لو هو شتمنا المفروض ماتنقل الشتمه عشان لااتضايق .. المهم سكرت الموضوع بعد طلاقها تواصلت معها تحملت اساليبها .. زوجى ترقى قولوا ماشاء الله .. وضعنا المادي ماشاء الله تبارك الله الي حولنا يحسدنا والله كله من نيتنا .. الحمدلله .. المهم ياما تهاوشت مع زوجي عشان صديقتي ابي اشتري لها اغراض الي يحتاجه اي بيت لانها لحالها واهلها مايسالون فيها .. وطليقها يساعدها ماديا .. زوجي مو راضي ابد مازال يتذكر تصرفاتها والموقف الي ذكرته ..اذا لقيت وظيفه اخبرها ..اذا عندها مشكله احاول اني اساعدها لو عن طريق النت صارت حساسه جدددا لاتفه الامور .. ياما تصير بينا مشاحنات ومشدات وانا عادي ارجع اتصل وهي الي ماترد علي !! الان تتكلم علي من وراي ان بامكاني اوظفها عن طريق زوجي لكن انا السبب الي ماسويت لها شي !! واصلا زوجي لو بيوظف صعبه يوظف صديقتي وهي بتكون معه في نفس العمل ومتحجبه ورح يشوفها باستمرار ..وتحط بعد اللوم علي .. غير كذا احيانا تكلم مثلا اقول لها ان زوجي يقولي اذا تبينتكملين ماجستير عادي كملي الا ترد علي سوري زوجك مجنون !! وباسلوب سيء .. ليه تقولي شنو فيه زوجي مجنون ؟؟ ليه يبيك تكملي ماجستير والحين كل الوظايف قايمه على الانجليزي والحاسب ؟؟ قلت لها مو قصده اتوظف اصلا مايبيني اتوظف مجرد ارضاء لطموحي وكانه يبي يرد لي الي سويته له انه كمل دراسته بتشجيعي وتحملت بعده بين شغل وبين دراسه وفوق هذا انا الا اقوله خلك بالغرفه ذاكر واخلق له الجو المناسب واسوي له كل الي يبي واوصله للغرفه واختبره في المذاكره .. قلت لها مو قصده اني اتوظف هي تعرف ان زوجي مو محتاج اني اكون موظفه ويقول لي راتب الي بتحصلينه من وظيفه اعطيك ياه .. سكتت وبعدها كلما اتصل ماترد ؟؟!! يعني هي ترضى تهين زوجي وماتبيني ادافع عنه ؟؟ وغير كذا دايم تشوفني اني مو مسويه شي لها ماطلعتها من الملل الي هي فيه يعني تلمح لي ان المفروض امر عليها واطلع معها ؟؟ كيف وانا ماطلع الا مع زوجي ؟؟ يعني تبي نطلع كلنا ؟؟!!! اذا بناتي واحيانا اخليهم عند امي عشان تكون طلعه خاصه مع زوجي وهي تطالبني اني اطلعها من ازمتها .. كثير بنات عانيت من اسلوبها ومن تشددها وبعض اسليبها الي تضايقني لكني اتحمل واقول يالله مسكينه تعبانه نفسيا ولا قادره انسى عشرتنا لما كنا صغار وجلساتنا كلما ازعل منها واتضايق واتذكر عشرتي معها احن لها وارجع اتصل لها للعلم بانها ماتخسر نفسها علشان مكالمه دايم انا الي اتصل مع ذالك اقول ظروفها .. دايم اوجد مبررات لها .. لكني بعدين حقيقي اتضايق كثييير والوم حظي الا صارت عندي صديقه مو قادره انساها ومسببه لي تعب .. ياما تقولي كلام يضايقني وارجع اتصل لها .. ماتتحمل اي انتقاد او كلمه تعصب وانا المطلوب اتحملها .. شنو المطلوب مني ؟؟ دايم تتكلم من وراي وتلمح لي اني مقصره ؟؟ على ايش ؟ عمري ماتركتها ولا تكبرت عليها رغم اني اعلى منها في التعليم والحين ماشاء الله افضل ماديا .. كنت دايم معها اواسيها احمل همها .. كثير اتهاوش مع زوجي عشانها هي بالعكس لما تزوجت ابتعدت ولما طلبتها اهانتني .. انا معها معنويا وماديا مو بيدي .. للان هي اوقات تتوظف وتترك الوظيفه واوقات تدرس وحتى اذا صار عندها اي شي ايجابي على طول احس منها بالغرور وتشوف نفسها فوووق ..!!

والله اختي انا من رايي خل تولي صديقه جذي البعد عنها غنيمه يعني قاعهد اتهينج وماتوقف معاج ونفسيه وتتكبر شكلها اكيد تكلمج مصلحه ونصيحه لاتسكتين على ايد احد كان انه يغلط على ريلج وقفيها عند حدها حتى لما قالتلج انه ريلها سب ريلج المفروض تلعنين خيرها وماتسكتين وانتي اللي تزعلين ختولي عنج هذي محتره واذا احد وصلج حجي ناها متكلمه قوليلهم اهي نفسيه وماتتصل وانا اوقف معاها بس مايبين بعينها خل تطلع اهي الغلطانه مو انتي

الي ماايعدك راس مال لاتعده راس بصله

تبين الصج ؟؟
انتي الي بطيتي جبدي مو اهيا
المفروض من لما حسيتي انها شافت روحها عليج لنا تزوجت انج اتصكين بابها بطين و عجين
مسكنيه الظاهر كانت مستذبحه على الزواج .. و ليش التكبر و الغرور بالله ؟!! ترى كل يوم الناس اتزوج و كل يوم ناس اتطلق
و حتى القطاوه بالسكه يتزوجون .. هذي شغله
الشغله الثانيه لما ضكها الزمن و حكــّـــتها المشاكل ياتج تشكيلج ؟!! ليش اتحملين وحده مصلحجيه ؟ اشتبين فيها؟ زيادة عدد يعني ؟؟
و بعدين لما انتي احتجتيها دارت وجهها عنج و اجرحتج؟؟

وايد قدرتي العشره ؟؟ وايد احترمتيها و سكتي و تغاضيتي و طوفتني و كبرتي عقلج و هنتي روحج
الحين stop
نسفيها ورا ظهرج و بعدي عنها بدون حتى تبرير ولا تفسير … و اهيا راح اتعرف ليش

صراحه لو انا منج اخليها هذي مو صديقه

بس علشان العشره ادز لها مسجات بالمناسبات بس و اسلم عليها سلام رسمي بعد

غريبة متواصلة معها حتى الآن ..؟؟

حتى نفس طيبة و أسلوب زين ما فيه ..

الله يعينك …

حبيبتي هذي موكفو والله العالم حاطه عينها على زوجج لاني احس من كلامج انها موثقه تصرفاتها تدل على انها مريضه نفسيه وفيها خبث ديري بالج منها
انسيها او خلي علاقتج فيها سطحيه بالشهر مره كلميها كافي ولاتسولفيلها عن زوجج هذي حسود حقود

انتي الغلطانة ،،،
باب يجيك منه الريح ،، سده واستريح ،،
شحادك منتي مجبورة عليها ؟؟ اذا هي حتى وقت الشدة ماوقفت معك ومفروض هنيه صدق تعرفين من صديقك من عدوك ؟؟
لا وفوق هذا تهاوشين زوجك وتعاندينه على شانها ؟؟!!
غلطااااااااااااااااااانة ياقلبي ،،

وخري عنها وقطعي علاقتج فيها لانها مستغله هالصداقه لمصلحتج
وهالانسانه باين عليها والله اعلم تبي خراب بيتج

ترى تزوجت وهي صغيره تقريبا 16 سنه وانا اصغر منها بسنه وبعدها اتصلت فيني بعد تقريبا 3 سنوات .. الي خلاني اتقبل اولا اني توقعت ان عندها ظروف وحاولت ابرر .. يمكن اني صغيره ماقدرت اتصرف .. تدرين انها عرفتها من لما كان عمري 8 سنوات وظلينا مع بعض طلعاتنا دايم ويا بعض كانها من اهلي .. فلذالك لما رجعت لي ماقدرت اصدها ولها ذكريات كثيره مو زيادة عدد اصلا من لما تركتني والله تعقدت وللاسف ماكونت صداقه مع احد كل البنات اعتبرهم زميلات فقط .. كنت اقول اذا تزوجوا بيتغيرون .. مع الفتره لقيت نفسي مو ناسيه انها تركتني من تزوجت وكلا اعابتها ابي اسمع رد كلما تجيب لي مبررات مو مقنعه مع ان حتى اسلوبها لما اتصل كانت وحده ثانيه مو الي اعرفها كانت تكلمني من طرف خشمها مع انها تركت الدراسه ورجعت بعد ما انا ظليت اودي خطاب للمديره واحاول وبعدين كملت في محو الاميه .. ومع الذك انا الي كملت عمري ماتكبرت ولا استغريت عليها .. مادري صراحه ليه مو قادره اني الغيها تماما من حياتي .. يمكن ان لها ذكريات كثيييره كلما اتذكر طفولتي اتذكرها .. يمكن لان لما كنا بنات حقيقي كانت تنصحني بصدق في اي مشكله وكانت معاي في مشاكلي وافراحي .. كانت تحفظ كل اسراري ماعمري سمعت انها قالت عني شي .. شفت فيها اشياء ماشفتها في الي من حولي .. هذا انا الحين تزوجت ولقيت عيلة زوجي وزوجات اخوان زوجي كان عندي امل ان تتكون صداقه مع اهل زوجي لكن والله مالقيت غير الحسد .. الكلام الي من وراي والمشاكل لاتفه الامور .. كلما اشوف الي حولي اكتشف ان صديقتي لما كنا صغار او لما كانت بنت فيها اشياء افتقدها الحين .. قبل فتره تعرفت على وحده تمنيت ان تكون بينا صداقه ..لقيتها كذابه .. اذا تكلمت معاي بس كل همها انها توضح لي لاي درجه زوجها يموت فيها ويدلعا و.. و.. واغلبه كذب .. والا تتكلم على البنات الي تعرفهم اكيد رح تتكلم علي .. بعد كل الي اشوفه اكتشف مافيه صداقه في هالزمن .. احن لها بس احن الى الاوليه مو الحين من بعد ماتزوجت بدت امور سيئه اشوفها .. ياريت والله على كلامك زيادة عدد .. اصلا ماعندي صديقه حقيقي صادقه معي .. اتمنى اني تنوجد هالانسانه الي تحفظ اسراي الي ماتتكلم علي في وراي واذا لقت احد توقفه عند حده مو تروح وتجاريهم .. .. مالقيت شي من هذا ابد .. افتقدها كثير وان تركتها ولا اتصلت ارجع احن لها ..نفسي اكون حازمه .. لكني مو شايفه شخصيه تعوضني وتنسيني واقول صح فيه صداقه ..

المشكله حلها بيدك
والصعب فيها مشاعرك
دوسي على قلبك وشعورك واتركيها
خلي بينكم سلام وبس ولاتضايقين نفسك

خلي علاقتك معاها رسميه وهي بتحس انك تغيرتي واكييد راح يتغير اسلوبها
الله يعينك

خليهاااااااااااااااااااااا

ليش تدورين عوار القلب

خليها تولي
اللي مافيه خير تركه احير
هذي مريضه نفسيا
مو بعيده تغار من استقرارج وتخرب بيتج
وتهدم حياتج
نصيحه ابعدي عنها مالج وصل فيها واشغليي نفسج في بيتج وعيالج
واذا شفتيها سلام وبس
النصيحه تنشرى بفلوس وانا اختج
وكلنا اهنيه صديقاتج

شالصديييقه

تقولين تعطي حبيبها وماعطتج واستشاارت ريلها؟؟؟

يعني لها علاقات واهي متزوجه!!!!!!!!!

اشتبين فيها حقريها لا تخرب بيتج وموبعيده تبي ريلج بعد