صدق أو لا تصدق عدد الذكور في الكويت أكثر من عدد الإناث !! عيل العنوسه من .؟؟؟؟

مرحبا

بدش بالموضوع على طول

المنحه الألف اللي عطانا ابونا الشيخ صباح الله يحفظه ويطول بعمره قولو امين

بعد ماتوزعت حطو احصائيات عن اللي توزعت عليهم المنحه ومنها عدد الكويتيين اللي توزعت عليهم المنحه:

المواطنين الذكور: 585 ألف و 447
المواطنات الإناث: 564 ألف و 131

يعني الذكور أكثر من الإناث بشويه تقريبا 20 ألف

هالاحصائيه مطلعتها رفيجتي من دوامها
وفيها احصائيات تضحك بقولها من باب التغيير والفرفشه بس
(أكثر واحد حصل منحه عنده 41 ياهل و 5 منهم تعدو ال21 لاقوة الا بالله الله يبارك فيهم
وأكبر واحد حصل على المنحه عمره 114 ماشاءالله
واللي نولدو يوم 1-2 عددهم 80 ياهل هاذول انولدو وبجيبهم ألف )

المهم اللي باط جبدي ليش يقصون علينا طول هالمده ويقولون ماكو رياييل واحنا عددنا وايد لازم نتزوج بسرعه

مو هذا موضوعي الأساسي

موضوعي الله يسلمكم اهو معاناتنا يالبنات

دام الذكور أكثر المفروض ماعندنا عنوسه بس اللي أشوفه العنوسه منتشره ووايد بنات بالعشرينات وينطرون يتزوجون
لو المشكله بالعدد جان عرفنا شنو المشكله بس الحين احنا مو عارفين سبب المشكله أصلا

هل لأن الرياييل ياخذون من بره وايد بس ما أتوقع هذي مشكله لأني أشوفهم نسبه قليله اللي تاخذ من بره وبعدين اهما أكثر

ولا مثل ما قالوا ان السبب من البنات نفسهم يتقدملها واحد زين أو معقول وترده؟؟

حبايبي انا أيام الجامعه اخطبوني وايد بس الحين لما تخرجت صارلي 3 سنين قل عدد اللي يخطبوني وصارت فتره كبيره بينهم واذا خطبني واحد والله أبجي من مواصفاته مستحيل اخذ واحد جذي ومن تخرجت هذي طقة اللي اخطبوني. مابي أقول عشان ما أجرح أحد وانا مادري

انا عن نفسي أعترف ان غلطتي اني رديت زينين أيام الجامعه بحجة بعيش حياتي

انا اعترفت بغلطتي بس يليت بنات الكويت يعترفون بغلطتهم
ان سبب عنوستهم اهو رفضهم
انا ما اقول يتشرطون ما أشوف أحد يتشرط الحين أصلا عيب
بس ليش مو اول واحد زين اييلج توافقين عليه؟ وانا همن أسأل نفسي مثل هالسؤال
مو شرط زين مواصفاته مقبوله

لحد ينكر ان كلنا كنا ننطر واحد مواصفاته وااو

نصيحه اذا مواصفاته معقوله اخذيه وماكو أحد بدون عيوب تذكري ان انتي لازم فيج عيب همن

قبل ما يفوت الفوت وتصيرون مثلي فرق عن اللي يتقدمون ايام الجامعه والعاهات اللي تتقدملي الحين مستحيل اوافق عليهم أتم عانس أحسلي

لحد يعصب ويقول انا احط الغلطه على البنات اللي للحين ماتزوجو
انا قاعده أناقش مشكلة العنوسه وانا برايي هذا السبب الوحيد بالكويت وانشاءالله تتقبلون وجهة نظري وتسمعون بنصيحتي

اللي تشوف ان في سبب ثاني أتمنى تطرحه هني عشان نشوفلنا حل نبي نتزوج

لأن بصراحه احصائية المنحه كانت صدمه احنا بديره عدد الذكور أكثر من الإناث؟؟ عيل هالعوانس شنو؟ ووضعنا شنو؟

وفي سبب ثاني مادري اذا صح ولا لأ شرايكم بس انا اشوف الشكل واحد من الأسباب بالكويت خاصتن
الحلوه كل مكان تروح يخطبونها والعاديه محد يدري عنها للأسف مجتمع يفكر بالشكل مع ان احنا مسلمين والأخلاق أهم شي بس مجتمع كتخلف أهم شي الضعف والبياض والشعر الناعم خلاص يمشي سوقج مو مهم طبعج شلون واذا انتي عاديه تشوفين عاهات ايولج حتن ماتدرين شنو جرأتهم يخطبونج من أهلج يعني مو معقوله باخذ واحد مو مقتنعه فيه وعيوبه قويه وأقط نفسي عند أي واحد لأني وصلت 25 لحد يقنعني اني صغيره ولازم ما أحاتي العمر يركض والله واحنا ننطر أحد معقول نقدر نتقبله. والنطره بين واحد وواحد همن تاخذ العمر

هذي مجرد وجهة نظر ومجرد كلام كان يدور بمخي ودي أقوله وأفضفض وأبي أسمع رايكم ونتحاور

ونصيحه للبنات الصغار أول واحد زين يخطبج اخذيه لأن ماراح اييج أحسن منه لاتنطرين نصيحة مجربه

جاااو

انا اقولج اغلب جنوس ومتخلفين عقليا وفي طور النمو اللهم ياكافي من زينهم عاد كش

لووووووووووووووووووووووووووووول

نص شباب الكويت ولا عايله تقبل تزوجهم امبي اشكالهم صارت غريبه منوو يرضى يزوج بنته حق واحد جذي وترى رياييلنا صارو اشكبرهم ومازالو مراهقين انا ريلي صار ابووو وللحين عباله ياهل طايحلي بسياكل و الهياته لا مسؤوليه ولاشي و بعدين طلبات اهل البنت الي تكسر الظهر قاعده تخلي الشباب يدورن من بره او ما يشتهون فكرة الزواج
وسالفة الي يكلمون الحين سواء بنت او ولد يا كثر ما اسمع بعد حق شنو يتزوجون كل يوم متعرفينلهم وطلعات ومواعد وهدايا عاشووو حياتهم خلاص و لين تلقالها واحد صيده يستر عليها و اهو لين يلقاله وحده جربت مع الف غيره امن النظيفه الي منخشه ابيتها هذه الله يعينها محد يبيها بهل زمن ولا احد عارف قدرها
وسالفة الاهل الحين مايبون علشان الامراض والمشاكل واهي واهو مثل الاخوان والله يعيين

ترا في بنات خير شر مع انهم يرزون نفسهم
ومو ناقصهم شي
بس ماقاعد ينخطبون
يمكن لان الشباب بطلت تبي زواج
تبي لعب ومصاخه وسفر وسيارات وهوايات
والزواج عندهم ماله قيمه

لوول دلع داشه بقوه

يمكن نفس ماقلتي البنت ترده علي بو انها توها صغيره بس في اسباب وايد ونفس ماقالت دلع خخ
يبون يغازلون للحين مو ناوين يفتحون بيوت
واشوف اغلب الشباب الحين عقولهم صغيره اولهم اخوي عمره ۲۱ جنه عمره ۱٥ يفكر يشتري ويلعب
شكله لي بعد ۱۰ سنين مايتحمل المسؤليه الله يهديهم ان شاءالله والاخو الكبير شايل المسؤليه ويقول مابي اتزوج اخاف اتأذا وما تراعي اهلي عقد اللهم ياكافي

وانتي لا تتحسفين هذا نصيبج
وان شاءالله الله يرزقج بالزوج الصالح يااارب
ويرزق كل البنات *

صححح السانكم
والمشكله حق الترقيم وهالسوالف تلقين ألف واحد يلحقج ويبيج وحق الزواج ولا واحد فيهم يبيج

اي والله ههههههههه

‘،

زوجي مو كويتي .. وفرت لكم واحد

،‘

ماشالله عيل الذكور اكثر من الاناث ..

بس انتي حبيبتي بعدج صغيره لا تعدين نفسج عانس ولا فاتج القطار

وصج الزواج حلو بس صراحه العزوبيه احلى

الله كريم

ايه والله صح
أعرف وحدة تصير لي تقول البنت اللي تكلم شباب يبونها
و اللي محترمة و ما عندها هالسوالف محد يبيها<< على فكرة هيا تكلم لها 4 شباب بوقت واحد الله يستر عليها أحسها تسوي بلاوي من ورا أهلها
^ ^ ^ ^
يعني
أمبيه صج ناس بدون عقلية في أحد يخلي النظيف و يروح حق الوسخ
الله يهديهم و يحل مشكلة العنوسة
ترا عمري 20
و أنا من عمري 19 ما ادري 18
أنطر الزواج ههههههههه
ألحق على عمري
بس أنا تقدم لي وايد بس أغلبهم مو زيين
و الزين يكون بس شكل يعني مو معتمد على نفسه
و جذي نفس هالطقة
الله كريم و يحل هالمشكلة بأسرع وقت

انا ماأيد كلامج لما قلتي الحين يبون بياض وجسم

صج اغلب الشباب يقولون نبيها بيضه شعرها ناعم ضعيفه بس حزه الجد يختلف الوضع والنصيب نصييييييييب تشوفون بنات موحلوين كلش تزوجو احلى الرياييل وبنات جميلات قاعدين

الجمال كلش ماله علاقه بالزواج بذات

وانا ماشوف وايد بنات مومتزوجات بالكويت ؟؟ ايام الكليه كله متزوجات مع انهم بال 20 و21 و22 و23

اذكري الله لا اله الا الله الله يكثرهم قولووو امييييين
ويهديهم ويهديناا

هههههههههههههههههههههههههههههههههه

ياحليلج والله

عنوسه لانهم ياخذون من برا

الا صج
ليش صارت موضه سالفه
ابي اكمل دراااسه

عاد الله يالدراسه اللي بتخلصينها بـ 4 سنين ..
هذا اذا ماسقطتي بمواد وحالتج حاله . .

انا من رأيي
انه لاجاء الوحده ريال كفووو تاخذه وتشرط عليه انه تكمل دراسه ..

يسلمووووو على الردود
ملوكه حبيبتي صح هذا واحد من الأسباب (أبي أكمل دراستي) والدراسه الحين صارت 5 سنين مو 4 يعني صج غلطه
بس همن ترى صعبه وحده تدرس ومتزوجه مو كل من يتحمل