قوه يا حوامل يا حلوات ، و ياللي تبون تحملون كلجن حلوات خخخخخ 
بغيت أقولكم سالفتي مع الحمله الأخيره لي مو بقصد طلب التعاطف لا حشى و الله بس بغيت أنوركم علشان تحتاطون ، آنا الله يسلمكم عندي بنتين اسم الله عليهم و الله يخليهم لي ، يبتهم فتح بطن ، بس حمالي عليهم الحمدالله ما فيه اي مشاكل غير فقر الدم اللي يظهر بالسابع و يكون بسيط و يتعالج ، المهم فكرت أييب الثالث وصار الحمل ، آنا طبعا حللت منزلي و طلعلي واضح ، المهم التحليل كان يوم 28 / 6 و بعدها بيومين بدا ينزل علي دم و كان لما ينزل ينزل كأنه هوا بالرحم و يطلع فجأه ، آنا خفت لأن المشكله هذي أول مره تصيرلي و ما كنت متوقعه ، رحت المواساة و خذيت موعد عند الدكتوره لينا و دخلت عليها شرحتلها الحاله ، و قالتلي توج بأول أسابيع ما عديت الأسبوع الخامس و ما راح يبين شي بالسونار و عطتني مثبتات و قالتلي تعالي بعد اسبوعين ( ما اسألتني أسوي تحليل هرمون و لا سونار داخلي ) ، رحت و داومت على حبوب التثبيت و كانو اسبوعين عذاب عوار و لويه و تقلصات و الدم يروح و يرجع ، لي يو م السبت 12 / 7 زاد علي العوار و الدم و حسيت الوضع مو طبيعي رحت المواساة الساعة 2 الظهر مع أمي و طبعا خفاره ، شرحتلهم الوضع و خذوني بالكرسي المتحرك لي السونار الداخلي ، و الدكتورة مصريه و كانت مستعيله تبي تطلع ، و بالغصب حصلناها علشان تسوييلي السونار ، المهم سوتلي السونار و قالتلي انه ما فيه بيبي ولا فيه جيس يعني البيبي طاح و يمكن يسوونلج تنظيفات ، رحت حق دكتورتي العصر و كان السونار معاي قالت ما يحتاج أشوفه التقرير عندي في الكمبيوتر و ما تحتاجين تنظيفات اذا كمية الدم زينه ، و تميت اسبوعين آخذ أدوية و حسو و قامت تنزل مني قطع كبيرة قلت هذي المشيمه ، المهم لي يوم الخميس 24/7 بالليل حاشني عوار قوي و مو طبيعي جسمي كله تشنج ما أقدر أنام و أسدح جسمي أحس جنه قلبي بيتشنج و يوقف تميت على هالحال ليله كامله لي يوم الجمعه 25/7 بعد صلاة الظهر اللي ما أدري اشلون صليتها ، رحت مع ريلي الهادي و دخلت على دكتور الباطنيه و آنا غصب أمشي حطيت في بالي انه اللي فيني عوار عضله و راح يعطيني مسكن و كريم و أطلع ، قلتله انه صارلي اسبوعين طارحه حولني على السونار رحت و سويت السونار و بعدين صعدتله قالي انتي الحين اتروحين لدكتور أمراض نساء و ولاده ، ليش ؟؟ ، قالي جسمج مجمع سوائل بشكل كبير و ما ندري هل اهوه دم ولا شي ثاني و احتمال يكون تكيس و منفجر أو حمل خارج الرحم ، طلعنا من عنده الساعه 4:30 و رحنا المواساة و هم خفارة حولوني على السونار الداخلي و تعذبت و هو يفحص لأني مو قادره أسدح جسمي و قاعده أتلوى من العوار ( كان عوار مو طبيعي آنا جربت الطلق بس هذا كان مووت ) و قبل ما يكتب التقرير سمعته يدق على دكتورتي و يقولها بسرعه تعالي ( و اهيه اجازه ) و لما وصلت غرفة الفحص خذو مني دم للتحليل و طلع دمي وايد نازل و يت الدكتورة و قالتلي انتي معاج حمل خارج الرحم و صاير معاج نزيف داخلي ولازم تدخلين المستشفى و نسويلج عمليه فورا و احنا طالبينلج كيسين دم لأن دمج وايد نازل ، آنا طقتني البوهه و قعدت أطالع ريلي واهوه يطالعني مو عارفه شسوي و شقول ، و أمسك التلفون و اكلم امي و آنا أبجي منهاره ( اشلون ما اقدرو يعرفون من البدايه طبعا غلطة دكتورة السونار اللي ما لاحظت عدل عل أساس مستعيله و السونار لي الحين عندي و راويته دكتوره ثانيه و قالتلي انه السونار واضح انه حمل خارج الرحم ،و غلطة دكتورتي لأنها اعتمدت على تقريرها بدون ما تشوف السونار اللي بايدي ) المهم دخلت المستشفى و قبل العمليه طلعت نتيجة تحليل الهرمون و طلع انه هرمون الحمل عالي يعني البيبي لي الحين موجود و ما طاح ، سلمت أمري لله و دخلت العمليات الساعة 10:30 و ما طلعت منها الا الساعة 3 الفجر ، و لما طلعت قالتلي الدكتورة انه جسمي كان ميمع دم و واصل لي الكليتين و الكبد و متجلط و البيبي متعلق بقناة فالوب و كبر فيها لين افجرت و هذا اللي سبب النزيف و اضطروا يشيلون القناة و آنا الحين على قناة وحده ، العملية مشت أوكي و عطوني كيس دم بالعمليات و آنا لي الحين أعاني من فقر الدم و قالولي ياخذ 3 شهور علشان يرجع و ضعه الطبيعي .
اللي بوصله بنات انه أي وحده فيكم تشك أو تتأخر عليها الدوره يومين بس مو تنطر أكثر اتحلل و اذا ثبت انها حامل اتراجع دكتورها و اتسوي سونار داخلي علشان تشوف اذا وضع الجنين صح في الرحم ولا لأ و تتخذ الاجراءات اللازمه لأن الحمل خارج الرحم اذا اكتشفوه مبجر يحولونكم الصباح و اهناك يعطونكم ابره توقف نمو الجنين و تنزله بدون تدخل جراحي ، بس اذا تأخرتو بالكشف العواقب راح تكون وخيمه مثل ما صار معاي ، و الله يحفظكم من كل شر ان شاء الله 
اشدعوه بنات على الأقل طيبو خاطري بكلمه ترى تعبت و آنا أكتب الموضوع 
فعلا اللي صار لج مو شويه بعد عمري …الحمدلله على سلامتج حبيبتي …. و ما تشوفين شر انشالله … و الله يعوضج بالذرية الصالحه يارب …
الحمدلله علي سلامتج والله يعوض عليج بالخلف الصالح
الله يسلمج حبيبتي و يكفيج من كل شر ان شاء الله و مشكورة على الرد 
الحمدلله على سلامتج وما تشوفين شر
لاحول ولا قوة الا بالله
الله فكج والحمدالله يت على جذي
سلامتج وماتشوفين شر
الحمدلله على سلامتج وماتشوفين شر يالغاليه
الله يسلمكم حبايبي و مشكورين على ردودكم ، و ان شاء الله اكون فدتكم و فدت وايد بنات غافلين عن هالشغله و خصوصا انه اي وحده معرضه لها ، الله يحفظكم .
حبيبتي ماتشوفين شر و انشالله ربي يعوضج بالضنا الصالح آمين يارب ….
الحمدلله على سلامتج حبيبتي والله يعينج إنشالله، الله يرزقج ويرزقنا انشالله، والله ذكرتيني بسالفتي سويت تنظيفات والدكتوره ما نظفتني عدل كل شي صار فيني الله ستر علي الحمدلله على كل حال
الحمدالله على سلامتك
والله حفظك لبناتك
عندنا هني الوحده اهي تقول حق الدكتوره شنو لازم تسوي لها …..لانهم صاروا ماديين بشكل مو طبيعي
الحمدلله علي سلامتج
حمدالله على سلامتج حبيبتى والله زين ماصار فيج شى سمله سمله عليييج من كل شر حبيبتى والله يعوضج وهذى غطله كبيره مفروض تتحاسب عليها دكتوره ارواح الناس مو لعبه
سلامتج بالدنيا والله يعوض عليج واقري دعاء الرسول عليه الصلاة والسلام لله ما اعطى وللله مااخذ وماتشوفين شر