شنو سياستج بخصوص النوم في بيت اهلج بعد الزواج؟؟

السلام عليكم بنات
شلونكم
ابدي بنفسي انا بصراحه مااحب انام عند اهلي كل وييك اند اولا كل اغراضي بشقتي وتعودت على النومه هناك حتى ولدي الله يحفظه يتعومس اذا تغير عليه المكان وثانيا احس خلاص صارت موضه قديمه انه الوحده تنام الويك اند عند اهلها حتى الريال موحلو تعود انه مرته كل دايم تنام عند اهلها وانا خواتي ماينامون عند اهلي بس يزورون بالوييك اند وحريم اخواني نفس الشي بس المشكله لما تزوجت حمواتي عندهم لازم خميس وجمعه ينامون وحتى حريم حمواني يروحون حق اهلهم وزوجي يبيني مثلهم
كل اسبوع يبيني انام عند اهلي يقولي الويك اند اجازتي وخليني اسهر واستانس مع ربعي واروح الشاليه او اكشت
واذا انتي بالشقه ماراح آخذ راحتي بدقين علي كل شوي وبعدين كل حريم اخواني يروحون لاهلهم انتي شيقعدج!!!
المهم من كثر ماهو ملوع جبدي بالحنه على اني ابات عند اهلي مرات اتعذر بأي شي واقعد بشقتي ماابات عند اهلي
والله يابنات احس اني موقاعده على راحتي واني متضايقه واهو متضايق بس شسوي
موحلوه كل اسبوع ابات عند اهلي كلش كلش مره بالشهر او مرتين

ادري قرقت عليكم والحين دوركم تشاركوني رايكم
تأيدون المتزوجه وعندها اطفال تبات عند اهلها كل اسبوع؟
واذا كان زوجج مثل زوجي يبيج تروحين لاهلج وانتي ماتبين بشنو تتعذرين؟؟
والمايك لكم

*

اب
اب
اب

كويتيات وينكم؟؟!

لا ماراح انام بيت هلي كل اسبووع يمكن اسبوع اي واسبوع لا شكوو هو يقولج روحي بيت هلج ؟ قولي له هذا بيني وعيالي مستاانسين في بيت ابوهم لا تعودينه على هالشي باجر يمل منج الله لايقوله وقولي له ولدج ماينام في بيت هلج
طلعي لج اي عذر زوريهم زياره هلج بس بدون نوم وجهة نظري الله يوفقج يارب ولا تدقين عليه واايد

شوفي انا ابات بس و الله احس يوم جبت عيال صارت صعبه
بخصوص العيال تعودو على مكانهم بس الوحدة لازم تاخذ اف شويه نقاهه

لو انا متزوجة

ما أنام بيت اهلي ألا لضرورة بس
عيل ليش أنا متزوجه عشان أنام بيت أهلي :/ ظلي هيك أحسن

تحياتي لج

انا للحين ماعندي بيبيات "بالطريج انشالله "
مانام عند اهلي طبعا كل ويكند مستحيييييييييل اصلا شالحاجه ؟!؟!
بس انام اذا كان الشفت ماله نايت + مايقدر يطلع مبجر
حتى مو كل نايت انام عند اهلي وحتى لو نمت تكون ليله وحده بس
وبعدين مع البيبيات انشالله يمكن مانام كلششش ببيت اهلي لان صعبه اغراض اليهال شيل وحط على يوم ولا يومين

اشوف النومه ببيت الاهل مال امها داعي دايم امي تقولي لاتعودين ريلج ع الفراش البارد

انا من تزوجت انام عند اهلي بس موكل مره يعني كل اسبوعين ثلاثه انام مره وحده

اما اللي عندها جهال وبيبيات صغار كلش كلش مانصحها اريحلها بيتها وحتى الجهال يلعبون وينامون ويكسرون في بيتهم اريح لهم وياخذوت راحتهم اكثر

اصلا امي ما ترض انام عندهم الا لمن يكون زوجي بالبر او شي جذي

بس امي دااايم تقولي لا تعودين زوجج ينام بسريركم برووحه

والله كلامها عين العقل

الله يحفظها

آنا نظامي آنام عند اهلي اذا جتني الدوره بس ..

لان لما تجيني اتعب حيل ولازم ارتاح عند اهلي ..

بس مو حلوه كل اسبوع انام عندهم ..

حلاتها بالشهر مره او مرتين ..

بس انتي ليش ما تستانسين عند اهلج ؟

بالعكس وناسه وحلو التغيير شوي ..

حتا انا ما انام فبيت اهلي لاني خلاص تعودت

ليش انام بيت اهلي !! الاخت مو متزوجه. ؟؟

و ما انام ببيت اهلي الا اذا كان شفته بليل

كنت انام ليله كل جم اسبوع لمن كنت حامل واتنسى بس بعد ماولدت كلللش مانام خير شر

حتى بحمالي هذا بنساتي مانمت اصلا امي ماترضا كلش الا اذا سافر

حاولت انام مره بس لقيت نفسي الفير داقه عليه ياخذني
تعودت على شقتي صعبه النوم ابيت اهلي

انا اروح واجلس يومين ثلاث
بس ماودي بالنومه بس المكان بعيد واضطر غالبآ اني انام

مو حلوة كل شي الوحدة تنام ببيت اهلها
بس كل بين فترة اي
تغيير جو

انااول ماتزوجت كنت أنام دائماً ببيت اهلي ،، وكانت بيننا مشاكل كثيرة
اماالحين نادرا ابات يمكن مرة كل شهر او شهرين ..
ومع الوقت والعشرة عرفت ان سبب المشاكل بينا البعد
صدق من قال ( البعد جفاء )
تقبلي مروري