|
|
كلمه تقولها احيانا بعض الأمهات : ولدي فجأه حسيته غير !
بنتي صارت مو مثل ماكانت ؟؟ !! ..
أول شي .. قبل الموضوع .. ودي تشاركون بالاستطلاع : أي مرحله عمريه حسيتي طفلج تغير حيل عليج في أدائه المدرسي .. سواء بالسلب أو الإيجاب .. شاركي (( فوق ))
………………………………….
والحين لب الموضوع :
كثيرا ما تتسائل الوحده شصار فيه .. شنو السبب ..
أكيد الكل مر بمثل هالفتره .. وأكيد أمهات وايد عانو من تغير عيالهم فجأه .. واختلاف أداءهم المدرسي ..
ممكن يكون الطفل عمره 7 .. أو عمره 12 أو 16 ….. أو أي عمر ..
ممكن يكون طفل ….. أو مراهق …. بس سبحان الله تحسون انه غير ..
شي طرأ جديد .. في يومه … في مدرسته … في حياته … في شخصيته ؟؟؟ الله أعلم .!
منو قاعده فيكم تمر بهالنوع من التغيرات في عيالها ؟؟ .. وشنو تعتقدون الأسباب .. وشني الحلول.؟؟
شاركينا سوالفنا عن العيال سن المدارس والتغيرات اللي تطرأ على شخصياتهم وسلوكياتهم فجأه من غير سابق إنذار ..
حياك .. وبياك … ومن تكون أول المشاركات ؟؟؟؟؟ … نعطيها << 
صج خوش موضوع وعساج على القوة يارب
الصراحة بنيتي تغيرت ولله الحمد قبل كانت تحن إلا أدرسها وأحفظها وانا كنت أبيها تعتمد على روحها لأنها بمرحلة متوسطة يعني لازم تبتدي تدرس روحها فشوي شوي حست وعرفت إني مافي إذني ماي يعني ماراح أرد بكلامي وقامت تجابل دروسها وانا من بعيد أجيك وناقشها صج بالبداية تعبت شوي لكن ألحين بروحها تلخص وتسوي لها امتحان ورقة خارجية ولله الحمد.
من ناحية شخصيتها: بالبداية كانت تسكت عن حقوقها وما تعرف تواجه أي مشكلة تصادفها بالمدرسة ,,,, فصار ألحين لازم نعلمها شلون تعرف تقول لأ أو نعم بالحوار معاها على طول وإعطائها فرص للكلام والمحادثة بينا والإستماع لها والتحاور بالبيت و برة فهذا الشي خلاها يعطيها دافع قوي للثقة في نفسها والتعبير عن رايها بأي موضوع يطرح عليها وتعرف شلون تتصرف بأي موقف يصير لها.
مثال: مرة مدرسة الألعاب طلبت من كل طالبة تحضر معاها كرة وقالت لهم: اللي ماتجيب كرة أزفها وادق على اهلها وووو.ز
ردت عليها بنيتي: أبلة الكرة من حق المدرسة والوزارة إنها يوفرونها لنا.
فعندنا قاعدة معلمينها عليها اللي اهي:لاتبوق لاتخاف.
– ماراح أرد عليك إلا لما تهدي وتبي تسمعني.
– معصب متنرفز أخليك وأرد مرة ثانية أكلمك بالموضوع.
– الإحترام لكل فرد غصب .
– لاتعيب علشان ما تنعاب.
– مايهمني مايلزمني.
– تصرفاتي تعكس تربيتي.
وسلامتكم وتعيشون.
بس ماشفت شي واضح بعيالي اقدر اتكلم عنه يمكن لي الحين صغار
الصابرة المحتسبة
عجبتني القاعدة اللي معلمينها بنتكم ربي يحفظها لكم من كل شر
يعطيكم العافية
إالى الصابره :
الله يخلي لج العيال ويحفظهم يارب ..
حلم الطفولة: ههه أبي التصفيق بالطابور الصبح علشان الكل يشوفني.
نبي تجربتج يا حلم الطفولة
1- بنتي الأولى .. السلوك اللي استجد عندها : أخاف !.. أخاف الأبله تزفني .. أخاف من الامتحان ..,, أخاف من الجرح .. أخاف عليج ماما .. أخاف يصير شي .. أخاف مايصير شي .
الأسباب .. سبحان الله هي في سن المراهقه الأولى : الفتره من 11- 13 وهذي الفتره يزداد عندهم الخوف من كل شي .. << وهذ في عموم سن المراهقه اللي هو 11-19 .. فهي الحين في بداية هذي الأحاسيس والمخاوف ,,
الدراسه صارت تبي تعتمد علي وتبيني اقعد يمها طول الوقت .. تبي اهتمامي جنها طفله صغيره وتزعل بسرعه .. وهذا بعد من مظاهر المرحله الأولى من فترة المراهقه .. 11-13 ,, يكون فيه طفوله كبيره ويكونون حيل حساسين .. فتلقون العيال بهالسن يراكظون ويطقون ومادري شيصير فيهم .. وآخرتها يبجون ويزعلون !!
الحل اني كنت أقولها انه عادي وطبيعي الانسان يخاف .. وكل واحد عنده مخاوف بس لازم يحط لها حد .. ومايقد طول اليوم يفكر فيها .. حتى ما تتحقق.
ولازم تتعوذ من الشيطان ومن وسواسه .. << طبعا فاد بنسبه مو تماما لأن ازدياد المخاوف هي صفات المرحله السنيه هذي.
بالنسبه لدراستها ماعطيتها مجال خفت تزيد .. بس قمت أخفف عنها وأخليها تقعد يمي تدرس .. لأن المسكينه مو بيدها .. وأدري انها مرحله وتعدي ان شالله .
وبالنسبه لبنتي الثانيه … راح اكتب لكم عنها في المره القادمه 
هذيل عيالنا فلذات اكبادنا الله يخليهم ويحفظهم من كل مكروه
انا ولدي الله يحفظه في الثالث ابتدائي
من اولى روضه (كانت الباكستانية ) كنت انا دايم مجابلته وساعات اساعدة في الكتابه أووووووه وايد واجبات عندهم ياعمري كان ينهد حيله بس يخلص علطول عشا ونوم 0وواي فديت قلبه 0
ونفس الشي اول وثانية ابتدائي
وليمن صار بدايه الصف الثالث بديت اسحب نفسي منه شوي شوي أقوله على الواجبات وأجهز كتبه واقوله اكتب وبعدين ارد اراجع معاه واجهز الجدول
وبس المفاجئة لما حب يدخل النادي قلته ما في وقت عندك دراسة وايد وواجبات متى تخلصهم اذا النادي من 4 إلى 7
قال اول ماارد من المدرسة وقبل لا تيين من الدوام اخلص طبعا ما صدقته بس بعدين وافقت
ولا صج قام اول ما يوصل على البيت وقبل الغدا يخلص الواجبات والي مايعرفه بروحه يسال أبوه أو اول ما انا أرد من الدوام يسألني يعني ثلاث ونص اهو خالص الواجبات وحاط جدول باجر بعد
كل هذا في سبييل النادي لأنه حبه وربعه كلهم هناك
وسلامتكم والله يوفقه وخليه لي .
والشكر لكل من طرح أسلوب تعامله مع عياله والتغيرات الي صارت لهم وأفادنا .. الله يجزاكم خير ..
انا عندي بنتي العوده .. كانت بروضه حكوميه .. تخيلوا طول السنتين الابلات تمدح في البنت وهذا ليش .. لانها ما تزعجهم .. كل ساكته ..
طبعا اهم فرحانين وانا محترقه على بنتي ..يعني شي مو طبيعي ابد ماتتكلم ولاتلعب مع اليهال ولاتاكل ولا شي .. بس تجيني اسم الله عليها ..
حافظه الايات .. وانا اعلمها بالبيت يعني ماعتمدت على الروضه .. تدرون الحكومه مافيها الا الاغاني والرقص .. المهميوم شفت حالت بنتي جذى ..قلت لا مافي مجال لازم خاص ..والله وفراره على المدارس وحوووسه .. لين رحت الكامبيردج (المنقف).. عجبتني حييل ارتحت لها .. والله الحمدالله مافيها عييب يعني اشياء بسيطه لاتذكر .. اي عاد ما اطول عليكم لما دخلت بنتي بديت احس بتغير بسيط جدا .. بدت تتكلم مع المس .. والاطفال وتاخذ حقها بس على خفيف حيييل .. والبنت في البيت جدا طبيعيه وعاديه تلعب وتسولف وكل شي .. الي لاحظته في بنتي ..سلوك حييل ماعجبني وضايقني لان بنتي مو جذى استغربت من تصرفاتها .. بدت تمد ايدها على الخادمه مسكينه .. وبدت تقول كلمات موحلوه .. مع انها تبجي وتحس بالغلط الي سويته بس شنو الفايده بعد ماتسويه تحس بالندم .. المهم ماسكت والله واروح استشاري اطفال .. وقوله .. قال لاتضغطين عليها وتقولين لها سوي جذى اواخذى حقج او ان انتي جبانه وخوافه .. من الكلام هذا .. لان اهي تحاول ترضيج بس بأشياء وهميه تقولها لج من خيالها بس ماتسويها صج بالمدرسه .. وبصراحه الحين قاعده احاول امشى على تعليمات الدكتور .. وحيل متضايقه من تصرف بنتي .. والي تقدر تفيدني لاتقصر .. الله يجزاكم خير ..السموحه طولت عليكم ..
بس عشان أفيدج اكثر .. ودي اعرف جم عمرها الله يحفظها ؟؟
عمرها ياطويلة العمر .. 6سنوات ونص .. ربي يطول بعمرها اهي واختها واخوها ..
ويخليهم لي ويخليلكم عيالكم .. وياريت والله تفيديني .. لاني احاول اسوي اي شي بس علشانها ..
تعرفين بعد شلون الام تحاتي عيالها .. الله يخليلنا عيالنا وامهاتنا يارب ..