سؤال مهم عن تساقط الشعر والقطط

خواتي انا قلت بموضوع سابق ان زوج اختي منع عياله يلعبون مع قطوي لانه خايف عليهم
المهم هم ماصارو يلعبون معاه وقليل اذا لمسوه بدون علم اهلهم
المشكلة ويييييين؟
ولد اختي يمكن عمره 6 سنوات صار فيه منطقه خالية من الشعر براسه

ودوه اليوم المستشفى وسئلو اهله عندكم حيوانات بالبيت وجاوبو ايه عشان قطوي يعني
قالو له هذ1 بعد ينتشر في الجسم كله
بس انا ابي افهم قطوي ماهو مريض ومافيه شي وشيكت على جسمه ماعنده فطريات والحمد لله مهتمه بنظافته كيف صار هالشي
معقوله ماني مصدقة المستشفى خلوني اكره قطوي ومو مقتنعه انه سبب هالشي اللي صار لولد اختي
انتو وش رايكم ؟؟

منطقه بشعره فاضيه يعني؟
قصدج ثعلبه؟
لا عادي مو شرط من القطوه دام على قولتج فحصتيه ومافيه شي
اسألي عن الاسباب اول شي
يعني يمكن جرح براسه من زمان وتوهم ينتبهون عليه يمكن الولد يعصب حيل فا صارله هالشي يمكن الولد جاه هالشي من بره بيتكم
ويمكن الخوف سببله هالشي ترا واجد اسباب للمشكله هذي
وهم انتي افحصي قطوتج وبعدين مو شرط السبب الرئيسي يكون فطريات
ممكن اسباب ثانيه
قبل كانت عندي قطوه فيها فطريات وانا اللي كنت اسبحها واقص شعرها وانظف بيتها ما صارلي شي
الشي الوحيد اللي كنت الاحظه انها لما تشمخني بأظافرها يحكني المكان ويصير احمر يومين بعدين يروح

ايه منطقة فاضية من الشعر
اظن الثعلبه ماكو غيرها تخلي الشعر يطيح
تسلمي حبيبتي على الرد انتي الوحيدة اللي عطيتيني وجه ورديتي علي

حبوبه نفس حالتي بس مع ولد اخوي

راسه صار فاضي ومن الفططريات

انا قبل كانت عندي قطوه فيها فطريات واعرف بالضبط اذا قطوتي فيها ولا لا

المهم انا خشيت قطوتي عن الصبي عشان مايعديها لاني مو ناقصه فطريات

انتي مسكي قطوتج شوفي صوب بطنها ذيلها او رقبتها اذا لقيتي مكان مافيه شعر ولونه وردي وفيه قشره هاذي فطريات

ومع الادويه يصير لونها احمر

وهم بعد اخوي يوم اخذ ولده للدكتور على طول سأله عن الحيوانات <<ماعندهم سالفه

انا لو منه جان قلت لا وبتشوفين شنو بيقولج اشيااء ماله شغل بالقطوه او بالحيوان

واخرتها تتخلصين من كل شي وهم بعد يضل بالبيت

اذا قطوتج تطلع بره الشارع (يمكن) اتييبه معاها لان يمكن شارعكم مافيه هالمرض

انتي قبل كل شي وقبل لا تخترعين من اللي قاله الدكتور

تفحصين القطو اذا مافيه شي

روحي سالي الولد في احد معاه بالمدرسه فيه نفس الشي بأيده او ويهه او اي مكان بجسمه

او كان يلعب بالحديقه على الرمل والتراب

لان هذي الفطريات تنتقل بسرعه

والقطو حاله حالكم يا ياخذها منكم او ياخذها من بره مو اهو يكونها على جسمه

الله يسلمج حبيبتي ولو
ما قصرت قطيوه بعد
وانا قلتلج اذا انتي متأكده من قطوج وفاحصته يمكن جا هالشي من بره البيت
او لأسباب نفسيه
بس هم لازم تفحصين قطوتج
وطمنينا

أحلى قطوة تسلمي على ردك المشكله اهله قبل مايروحو المستشفى حاطينها في قطوي وبعد ماقالو من الحيوانات كملت هههههه

شيكت عليه وانا خايفه ومالقيت شي
بس سالفة ولد اختي خوفتنييييييييي

القطوه ممكن يكون معاها المرض بس ما يبين عليها

والقطوه تسبب وايد من الامراض الجلديه لو اهي نظيفه ومعقمه ومن الامور اللي يسببونهم القطاوه العقم . فتخلصي منها احسن حبوبه . ومن ناحيه الشرع شعرها يبطل الصلاه .

عورتي قلبي اااااااخ يبطل الصلاة بعد

جديده هاذي ؟؟؟؟

من متى شعرها يبطل الصلاه؟؟

لا اهي مو جلب الجلب نجس ويبطل الصلاه

القطوه من الطوافات واهي من اهل البيت عادي

ماباقي الا يقولون حتى الريش يبطل الصلاه؟؟

لا حبيبتي كلامج مو صحيح
من وين هالفتوى؟

—
ورد احاديث عن الرسول صلى الله عليه وسلم , ان القطط من الطوافين علينا والطوافات :

أن أبا قتادة دخل فسكبت له وضوءا ، فجاءت هرة ، فشربت منه ، فأصغى لها الإناء حتى شربت . قالت كبشة : فرآني أنظر إليه ، فقال : أتعجبين ابنة أخي ؟ فقلت : نعم . فقال : إن رسول الله صلى الله عليه وسلم قال : إنها ليست بنجس ، إنها من الطوافين عليكم والطوافات

الحديث دليل على طُهر سؤر القطــة
السؤر : هو ما بقي في الإنـاء من شراب أو طعـام بعد شُرب الهرة

و المقصود بالطوافين عليكم و الطوافات : أنها كثيرة التردد على أهل البيـت و دائمًـا معهم كالخــدم, و الذين يريدون ما ينفعهم و يفيدهم
و فيها إشارة إلى الإحسان لمثل هذه الحيوانات

اذا القطوه شربت من الماي فمابالج شعرها

أي قطوة محد مهتم فيها أكيد 100% بيكون فيها مرض ومو بس القطاوة كل الحيوانات ومو بس الحيوانات ترى حتى الإنسان نفسه لي مالقى أحد يهتم فيه أو ما اهتم بنفسه فرح يسير فيه أمراض وايد وينقل الأمراض للناس الي حواليه سواء جلدية أو بكتيرية أو فطرية … إلخ، وسالفة العقم هذا كله غـــيـــر صحيح أتمنى تشوفين الموضوع الحقيقي من جذوره ورح تشوفين إن القطوة مظلومة في هالشي، والشرع، فشعر القطوة ما يبطل الصلاة، لإن القطوة طاهرة، ومذكور في الأحاديث، والرسول الحبيب كان يتوضأ من ماي شربت منه قطوة، وصلى في مكان مشت عليه قطوة، فهي لا تبطل الصلاة ولا شي .