سؤال عن الصباحيه

السلام عليكم ..

بنات عندي سؤال بخصوص الصباحيه ..

انا اللي اعرفه و اشوفه دارج هالايام انه العروس من بعد يوم عرسها تروح مع ريلها فندق وماتبين الا بعد 3 ايام او حسب لو بتسافر و جذي ..

فشنو سالفة الصباحيه يعني هذي موجوده عند الكل او بس خوانه البدو ؟؟

لانه وايد اسمع عنها بس مو عارفه شنو فكرتها

فيدوني و مشكورين مقدما

هلاوالله خيتووه

هذي سالفه دارجه من زمان

ومن زمان العرايس يسونها بس طبعا مو كلهم

يعني على حسب

اما انا عن نفسي صراحه احس لويه اقعد بشقتي اللي تعبانين عليها

واذا بغير جو اسافر شهر عسل

افضل جذي

حبيبتى الصباحيه اكثر الناس اتسويها وبعض الناس اتسويها بالليل يعنى عشا

واهيا تكون عائليه واشوفون العروس عن قرب ويسولفون معاها احيانا

انا عن نفسى اهل زوجى سووها بس مو الصبح لاااااا سووها عشا يعنى من المغرب لى 11 او 12 تقريبا قعدت بينهم تقريبا نص ساعه او ساعه بعدين رحت شقتى مع ريلى وثانى يوم الصبح سافرنا العمره

فعلا اختي هالعاده تقريبا اندثرت بس كاانت موجووده ولااازم تصيير انه اليوم الثاني بعد العرس ييون اهل العرووس ويتجمعوون مع اهل العرووس والعرووس تنزل واهي طبعا على سننننننننننننننننننننقه 20 مووو 10
اوكي بس الحيين تغيرت اغلب النس يسوونها عشا وبعضهم الغوووها كووليا بس للاحتياااط لاااازم العروووس تكوون مزهبه بدله كشخه لليوم الثاني اذا ماا سووو عشا عالاقل تييبلها مصوره وتصور كشختها <<<كل شي لااازم يتحلل بالصووور خخخخخخخخخخخخ

حلوه فكرة شهر العسل بعد العرس على طول احس احسن لانه الوحده محتااجه شوي تغير جو بعد ضغط التجهيزات والترتيبات

شكرا عالرد حبيبتي

ما شاء الله صج فكره حلوه مالت العمره

حلوة الانسان يبدي حياته بشي جذي ..

الله يهنيج

لوول اشوه يعني انا مو مضيعه يعني اهيا بالاساس هالشغله صار قليل يسونها ..

لانه اشوف محد من اللي اعرفهم يسوي جذي ..

بس مشكووره عالمعلووومات

انا اللي اعرفه انه احنا الحضر ما عندنا صباحيه
ولا شي واعتقد انه هالعاده من عوايد اخواننا البدو

احنا عندنا استقبال هذا اللي اعرفه وهذا اللي يصير بعايلتنا كلها

اي لو تلاحظين في بداية الموضع كنت اسأله عن هالشي ..

لانه وايد سمعت في المنتدى عن الصباحيه بس ماذكر انه في احد من اهلنا سوه هالشي يعني دايما العروس تروح فندق او تسافر او شاليه يعني جذي سوالف

بس خل نعرف عن الصباحيه هم الواحد ياخذ فكره وناسه

مثل ماقالت اختي دهن العود
الصباحيه ثاني يوم العرس نسويها ايام اول يخلونها الصبح وغداء
اما الحين يسوونها بالليل وعشاء والعروس تكشخ وتلبس ذهبها وتقعد بين
الحريم بس ما اطول لانها تكون تعبانه وعقب تصور مع زوجها بشقتها

شكرا عالتوضيح حبيبتي

حاظرييييييييييييييييييين للطيبين

هلا حبيبتي

الصباحيه اذكر اول يوم كنت صغيره لازم يسوونها غدا وحتى الاكل يكون جريش وهريش وورق عنب وملفوف غير غير العيش وقبل الغدا يعطونهم الحلوه والهرش وما ادري شنو بعد بس هذا اللي اذكره

وبعدين انقطعت هالعاده مده واللحين صارلها اكثر من ثلاث سنين ردت بقوه بس بدال الغدا تصير عشا احسن

واللحين الاغلبيه يلزمون على الصباحيه . . .

انا بدويه بس ما ادري اذا الحضر يسوونها ولا لأ

مشكوره على هالمعلومات حبيبتي

احنا مانسوي جذي .. لانه اللي اشوفه مثل ماقلت انه العروس بعد العرس يا تسافر .. او تروح فندق مع ريلها او شاليه 3 او 4 ايام و بعدها تسافر او على حسب يعني ..

و سالفة الاهل انه يقعدون مع البنيه وجذي .. هذي تصير بعد الملجه يسون شي اسمه حفلة تعارف ..

اهل العروس واهل المعرس يتيمعون و يسون نفس عشا و يقعدون بع بعض و يتعرفون على بعض..

بس قبل العرس هالشي

واكيد كل اهل لهم شغله غير يسونها بخصوص هالموضوع .. بس بشكل عام جذي تكون

وااااااااي حسيت وناسه ترى انا احب سوالف العادات والتقاليد وماحب لمن الشي يطور بزيادة عن اللزوم ويتغير كليا مثل ماصار بالقرقيعان (شوفوا موضوعي بالاشغال اليدويه )

وبالنسبه للاخت cherry كاتبة الموضوع سبحان الله قلبج على قلبي انا كنت ناويه اكتب هالسؤال وبالضبببببط نفس تساؤلاتي لاني ماشوف سالفة الصباحيه هذي الا بالمنتدى وقلت اكيد انا بعد العرس بقعد جم يوم بالاوتيل متى بتصير الصباحيه ولايكون يطبون علي اهلي او اهل المعرس فجأه ترى ماااالي خلق عقب حوسة العرس بنااااام لييييييييي العصر ههههههه