رحله البحث عن خدود

يا طيبات الفال

اليوم رحت حق عياده البروفيسور فلان الفلانى ( استاذ واستشارى جراحه التجميل ) هذا مسماه اللى مكتوب على كرته مو من جيبى كاتبته

دخلت العماره فاضيه

وصلت العياده تصـــــــــــــــفر فاضيه مافى غير السكرتاريه سالتنى فى موعد قلت لا احجزيلى باجر اجى ( على بالى لازم بمواعيد ) قالتلى والله الدكتور اليوم عنده اجتماع ( اجتماع بعيادته اشلون ) بس علشان انتى جيتى مو مشكله تدخلين ماتهونين على تطلعين قلتلها اوك

فتحت ملف ودفعت عشرين ( الله يعوضنا )

دخلت عليه الاخصائيه الفلبينيه اللى عنده وقعدت خمس دقايق ونادتنى

قبل لا ادش قالتلى حطى تلفونج صامت الدكتور ما يرضى قتلها ليش قاعدين بمحاضره

دخلت قلتله ابى اتفخ خدود

واسوى بوتكس

اول شى قالى انتى مو محتاجه بوتكس قلتله اوك مو مشكله قالى محتاجه بس ترطيب بهالمنطقه

نمشى على الكريمات

نطيت وقلت انا عندى كريم ممتاز وشاريته وقاعده امشى عليه من اكثر من شهر وما ابى كريمات

هنى قالى لا انتى منتفخه تحت عيونك ومحتاجه عمليه لازاله كيس دهن ( انا هنى سكت لان ماعندى كيس دهن بالجفن السفلى الحمد لله من وين طلع كيس الدهن )

صج عندى هالات بس هذا انا عارفه من الارهاق والدراسه والتعب

قلتله هل هذا بعمليه قالى اى اول ما قال عمليه انا قلت لا مابى مابى ( لا يحوشك )

قالى علشان الانتفاخ قلت اى شى عمليه مابى لو سمحت قال اوك

المهم بالنسبه للخدود

قالى انتى محتاجه 6 سم ( سم اشلون ماادرى انا اللى سمعته بالميلى مو بالسنتى)

قالى 1.5 عند عظمه الخد

1.5 بزاويه الخد القريبه من الاذن

نفس الصوره المرفقه

يعنى كل خد 3 سم

قلتله انا ابى شى بسيط مابى شى اوفر قالى لا انتى هالقد محتاجه وانا ما ابى تجين بعدين تقولينى مايبين انى مسويه نفخ قلتله انا مابى يبين ابى خفيف وطبيعى

قالى هذا اللى انتى محتاجته

قلتله اوك

المهم قلت له شنو الماده اللى بتستخدمها قال face natural ???

قال انها المانيه وممتازه وتستمر من 6 الى 9 اشهر

وانه ما يستخدم الا المواد الممتازه ولا يستخدم الاشياء الصينيه

قلتله شى حلو منك

وصلنا عاد للفلوس وسالته جم ؟؟؟

قالى الابره الاولى 120 دينار

وباقى الابر ب90

يعنى الحسبه ل4 ابر بيكون 570 دينار ؟؟؟؟ المفروض 390 دينار ؟؟؟

انا هنى بلعت العافيه على باله ما اعرف احسب ( احلامى بالخدود طارت بالهوا )

قلتله وايد

قالى انتى اصلا تدفعين قيمه الماده صافيه واللى احنا لنا بس 30 اللى اهو قيمه الابره ( ابره ب30 دينار شنو ذهب )

قلتله لو ابى بس عند الخدين قالى 120 الابره الاولى والباقى 180 يعنى 300

انا استغربت اشلون يعنى المفروض انهم 3 سم 1.5 كل خد يعنى 120 +90 دينار = 210 دينار ؟؟؟

اهنى بس قلت صراحه دكتور انا مو حاسبه حسابى على هالمبلغ وفى اماكن اكثر ارخص منك انت وايد غالى ( حسيت وده يطقنى )

قالى انا بستخدم مواد غاليه وما اعرف ايش وانا اها اوك اها اوك

حاول يقنعنى اسوى اثنين الحين وبعد شهر الاثنين الثانين وقالى اوعدج انك اذا جيتى مره ثانيه ما احسب لك اول ابره ب120 احسبها ب90

اانا قلت معلش دكتور ميزانيتى ما تسمح و طلعت

بس قبل لا اطلع سالته عن عمليه كيس الدهن اشلون تصير ( يمكن احد فيكم يبى يعرف )

قالى من عند خط الجفن السفلى عند العين بابره يسحبون الدهن وعقب ما يسحبونه لازم يشدونه علشان الجلد بيكون مترهل ومتجعد قلتله كم تكلف قال 1200 دينار ؟؟؟

انطباعى

ما ارتحت حسيت انه بس يبى فلوس

هذى اول رحله لاول طبيب ولنا عوده مره اخرى مع دكتور ثانى وانطباع اخر