ذبحني التفكير حامل وعقدني السونار مساعدة ولو بدعوة

السلام عليكم ورحمة الله وبركاته

أخواتي ابي منكم مساعدة ولو بدعوة

ابي حل

والله عقلي بنفجر من التفكير والوسواس

قصتي طوووووووووووووووووووووووووووووووويلة حيل

اتمنى ما تتعبون وانتو تقروها بس الله يخليكم اقروها وعطوني رأيكم لأني خلاص مخي

ربي يعلم بحالي

قصتي

أخر دورة كانت 3/4/2009

عملت تحليل حمل بتاريخ 27/4/2009 وطلعت حامل ونسبه الهرمون كانت تتضاعف كل يومين

طبعا نسيت لا اقول اني قبل يوم من التحليل نزل معي افراز بني نقط ومع ذلك عملت تحليل الحمل وبان الحمل

المهم ذهبت للطبيب وقال مبروك نتيجة التحليل انج حامل وقلت له على الافرازات البنية قال اعطيج دفستون وفولك اسيد

ضليت اسبوعين رحت له في 11/5/2009 قال لازم سونار داخلي لأن الافرازات تأتيني يومين وتهون وترد بعدها

المهم شاف بالسونار كيس الحمل وعمره 5 اسابيع و6 ايام وما كان في جنين قال عادي راح ننطر اسبوعين

وطبعا ياتني النساة من لوعة وحالة حالة

توفت جدتي بالاسبوعين الي قال نطري فيهم وتعبت نفسيا وكانت أيام عزا

بعد اسبوعين 27/5/2009 رحت له وسوا لي سونار داخلي وشاف كيس الحمل كبر وشاف جنين عمره 6 اسابيع ويومين
بس ما فيه نبض وقال ما شاء الله الكيس يكبر . وقالي خل ننطر بعد اسبوعين يمكن يبين النبض

انا طلعت من العيادة وساكة فيني الدنيا لإن هذا أول حمل لي بعد 3 سنوات زواج وما حملت ولا مرة

بعد يومين زوجي قال اوديج حق مستشفى ثاني

سمعو الي صار

رحت المواساة شافتني طبيبة هندية قالت حامل قلت لها اي واخر دورة 3/4 قالت ما ابي اسوي سونار لآنه ما راح يبين معاي شي توج لازم تنطرين الى 1/7/2009 قلت لها لا ابي اسوي سونار وما قلت لها اني سويت داخلي وبين جنين

المهم سوت لي سونار خارجي وشافت بس جيس بدون جنين ولا نبض

وقالت نطري نفس ما قلت لج لأول شهر سبعة وطلعت من عندها

بعدها بنفس اليوم ( ادري اني هببت بنفسي )
رحت حق دار الشفا وشافتني طبيية هندية وقلت لها اني حامل قالت بسوي لج سونار خارجي شافت بس جيس بدون نبض ولا جنين وقالت يمكن يبين بالسونار الداخلي

رحت تحت حق السونار الداخلي وسوا لي سونار داخلي قال ماكو شي بس كيس وما في جنين وضل يدور ومو لاقي شي

طلعت بس خلاص مو عارفة شنو اسوي عقدت نفسي أكثر وأكثر وما نطرت اسبوعين الي قال عنهم طبيبي الأول

طبعا ضليت وفوضت امري لله وصبرت

بعدها وقف معاي كل شي بين ان فيني نساة فقط اللوعة

يوم 1/6/2009 ياني عوار مو طبيعي ونزل علي افراز وردي قليل جدا اول مرة ينزل من حملت وماكو سيدة رحت حق عيادة الطبيب الي اعالج عنده وما كان موجود شافني طبيب ثاني وقال بسوي لج سونار خارجي وشاف بس الكيس والجنين نقطة
( لاحظو ان الاسبوعين الي قبل كان بس جيس خالي وذلك في سونار خارجي بالمواساة ودار الشفا )

المهم قال مافي نبض والجنين نقطة واذا نزل عليج دم تعالي نسوي لج تنظيفات وقالي استمري على الدفستون

طبعا بعد هذا اليوم ما نزل مني اي شي ووقف النزف البني الي كان يجيني على الاقل بالاسبوع يومين

سويت تحليل حمل هرموني طلع في تاريخ 29/5/2009 وكانت النسبة 81.600
سويت تحليل حمل هرموني يوم 31/5/2009 وكانت النسبة 61.605

المهم بعد اسبوعين رحت حق طبيبي الأول ( الي يوسي سونار داخلي ) في 13/6/2009

فحصني سونار داخلي وشاف الكيس والجنين عمره 6 اسابيع ويومين يعني نفس أخر زيارة وهي 27/5/2009

وقالي خلاص الحمل شكله حمل فاسد وانا ما راح اسوي لج شي وخليه بروحه ينزل وعطاني الى نص شهر سبعه بعدها يسوي لي تنظيفات

ضليت اسبوع وبس ياني الوسواس الخناس شلون ما في نزيف والدم مو راضي ينزل والنساة مو موجودة والحمل للحين موجود

قالت اروح حق عيادة مو قادرة اصبر الى شهر 7

واليوم رحت حق عيادة د ناهدة وسوتلي سونار خارجي وشافت الكيس وشافت الجنين وما في نبض

الي بشيب راسي

شلون شافت الجنين بالسونار الخارجي بس صغير لاكن أكبر من الي شافه الطبيب في 1/6/2009

وقبل اسبوعين ما كان يبين بس كيس خالي

الخلاصة

دورة 3/4/2009
حمل 27/4/2009
سونار داخلي في 11/5 بس كيس
سونار داخلي 27/5 كيس + جنين 6 اسابيع بدون نبض
سونار خارجي كيس بدون جنين ولا نبض بالمواساة
سونار خارجي وداخلي كيس بدون جنين ولا نبض بدار الشفا
سونار خارجي 1/6/2009 كيس والجنين نقطة ( يعني بدا يبين ) بدون نبض
سونار داخلي 13/6/2009 كيس وجنين 6 اسابيع بدون نبض وهذا حمل فاسد نطري الى شهر 7
سونار خارجي ( سبحان الله كبر الجنين وصار يبين بالسونار الخارجي ) والي قبله كان بس جيس خالي لاكن بدون نبض

ادري فريت راسكم

يا الأجهزة فيها شي

يا رحمي فيه شي يطلع الجنين متى ما حب

طبعا شربت اليوم دارسين ومرامية وريلي قال شيلي شي ثجيل على الاقل خل ينزل دم

لانهم ما راح يسون لي تنظيفات الا بنزل ولو قليل من الدم

شورو علي شسوي

وعذروني على الاطالة

الله يعوض عليج ان شاء الله

حبيبتي اللي اعرفه انه النبض مايبين مبجر يعني عالاسبوع الثامن او التاسع
و حبيبتي الخيره فيما يختاره الله
الله يرزقج بالذريه الصالحه عاجل غير اجل

وايد سويتي سونار داخلي موزين كثرته لعبتي بنفسج

انا اقول امشي على كلام دكتور واحد بسسسسسسسسسس

انصحج خليج مع ناهده واهي تقولج شنو المفرووض تسويين

وان شاءالله ماعليج الا العافيه

انتي على حسبه الدوره 10 اسابيع الحين
المفروض مبين اصلا
ومرات على حسب الاجهزه
يكون السونار واضح من غير داخلي
يعني لا تستغربين انه بين بالسونار الخارجي
انتي نطري اسبوعين زياده للاطمئنان

صراحه دودهتي عمرج حيييييييييييل لو ناطره الموعد المحدد وخليتي روحج على طبيب واحد ابرك
انا تدودهت شلون انتي الله يعيييينج والله :/
عموما النبض مايبين الا الاسبوع التاسع واذا الاسبوع التاسع ومرات الجنين مايبين على حسب المثانه اذا متروسه ولا لا

الله يعوضج يااااااااااااااااااارب

والله ماأدري شقوللج بس لو ناطرة شوي لي شهر 7 قبل ماتحوسين على كل هالدكاترة جان أحسن بس هم ماألومج لأن الوحدة فينا لي بغت الحمال تنسى شي اسمه صبر …………. الله يثبته لج اذا كان حمل سليم ويعوضج خير اذا العكس

ياعمري لاتحاتين اللي كاتبه الله بيصير ولاتلعبين بنفسج وتروحين مني ومني جذي بتتعبين خلج على دكتورج ونطري موعدج احسن ماتدرين يمكن بهالفترة يبين نبض ان شاءالله

الله يرزقج بالذريه الصالحه

سونار ناهده يديد عشان جذي بين بالخارجي ..

خليج على طبيب واحد واخذي برايه لا تشتتين نفسج

الله يعوضج ان شالله

بس نصيحه اختي مايصير تسوين هالكثر سونار وخاصه الداخلي

خبري مره وحده يسوونه مو كل مره

بس دام ماشافو الجنين بالجيس مثل ماقالج حمل فاسد والله يعوضج

والحين على الحسبه 10 اسابيع مفروض تسمعين النبض وتشوفين الجنين

مشكورة حبيبتي ربي يوفقج والله الأخوان نعمة ودعوة الأخ أو الأخت بظهر الغيب مستجابة

عزيزتي هذا الي عرفته منكم ومن الطبيب ان النبض يبين على الاسبوع الثامن او التاسع وانا رحت

في تاريخ 27 /5 وكنت بالاسبوع الثامن والطبيب شاف الجنين وما في نبض وأملني انطر اسبوعين يعني على العاشر