حدود العلاقة بين المعلمة والطالبة

السلام عليكم ابلات ,…

اشلونكم يا حلوات؟؟؟؟

صار لي فترة يا بنات في موضوع يشغل بالي….

وهو حدود العلاقة بين الطالبة والمعلمة

اقول لكم كم موقف صار معاي شخصيا علشان تعرفون قصدي

احنا قسمنا في اربع مدرسات رئيسة قسمنا من النوع اللي مالها شغل بشي ابدا بس تدخل حصتها وباقي اليوم نايمة

والمسكينة كلمة توديها وكلمة تجيبها هي حيل حبوبة وعلى نياتها بس من النوع اللي يخاف , يعني ما توقف معاج اذا ما كنت تهددين وتصارخين.

المهم الابلات اللي معاي ضاربينها صحبة مع البنات , وخصوصا احنا ندرس ثانوي , كل وحدة فيهم مسويه لها شلة معجبات وحبيبات.

انا مالي شغل فيهم , بكيفهم يسوون اللي يبونه بس المهم هالشي ما يأثر علي

انا من النوع اللي ما احب اطيح هيبتي قدام البنات يعني وقت الحصة جد وبرا الحصة اعاملهم باحترام اسولف معاهم عادي بس ما اسمح لاي وحدة تتعدى على حدودي.

والحمدلله الكل يشهد بشخصيتي وادارتي الفعالة للصف واحترام طالباتي لي.

حتى الموجهة طلبت منى اسوي درس نموذجي عن ادارة الصف

لكن في شي يضايقني خصوصا هالسنة

الموقف الأول

انا مشتركة مع باقي الابلات في صفوف عاشر ( عدد صفوف عاشر وايد فأنا ماخذة مرحلة عاشر وثاني عشر ) , أول السنة وحدة من الابلات اللي بقسمي وقالتلي ابلة ريهام الله يخليج ابي ادرس صف 10-4 عطيني هالصف , وانا اعطيج صف بداله , قلتلها ليش تقول لا مالي خلق اعطي الحصص الاخيرة وقلتلها وانا بعد ما احب اعطي الحصص الاخيرة , راحت وجتني ثاني يوم وطلبت مني نفس الطلب وهالمرة حنت علي بزيادة قلتلها ليش شنو السبب قالت بالصف اللي تدرسينه في بنت (أحبها وتحبني) انا استغربت انا عارفة هالصف في بنات من شلتها ولما كنت ادرسهم يتعمدون يخربون الحصة بس على مين ( عطيتهم طراق عدل) بس مو لهدرجة , لما شفت الابلة نزلت مستواها لهذا الحد تنازلت عن الصف وبدلته مع صف ثاني.

الموقف الثاني

نفس الابلة اذا كانت فاضية يجون لها البنات ويقعدون عندها ( يعني يهربون من الحصة ويقعدون عندها ) وهي عادي سوالف وضحك , ولما اجي آخذ شغلة من المختبر تتعمد تحرجني قدام البنات , يعني شوفوني شخصيتي قوية , ريهام ترا انا غيرت بورقة العمل اللي سويتيها لان فيها غلط , ترا الموجهة دقت علي وقالت راح تجي الاسبوع الجاي , وطبعا الموجهة ما دقت عليها ولا شي , ريهام منين شريتي الاكسسوار اللي بإيدج مو شي لا يكون من كليرز … بس هاذي سوالفها مع الطالبات وطبعا انا ما ارد عليها ابد واطنشها , وطبعا كل اسبوع طلعات ومطاعم والدرجات اللي تعطيهم بالهبل لشلتها

الابلة الثانية

اعرف اخبارها من طالباتها , يعني اختها ملجت ( ما تقولي بس قالت لحبيباتها الطالبات) تبي تغيب رفيجاتها يقولون ويعلمون قسمنا . نفس الشي طلعات وروحات ودرجات لشلتها

طبعا هذا غير البلاك بيري والايفون والمسجات اللي بينهم (وقت الدوام) عادي ولا كأن ممنوع استخدام التلفونات في المدرسة فما بالج بين المدرسات والطالبات.

تدرون شنو مشكلتي خصوصا اول السنة ان البنات ما كانوا يتفاعلون معاي بالشكل المطلوب كانوا ماخذين فكرة عني اني شديدة ومغرورة مو مثل ابلة فلانة وفلانة اللي يعطون الدرجات لمعجباتهم. طبعا الحين الوضع احسن بوايد والبنات اعرفوا طبعي واحترموني.

في مشكلة ثانية , البنات يتحجون عن الابلات من ورا ظهرهم , يعني مثلا انا مرة كنت ماشية وابلة من هالابلات ماسكة ايد رفيجتها وتتمشى بالممر , تدرون اشقالوا البنات ( قالو الابلة هاذي الظاهر ريلها ما يلمسها علشان جذي تتلزق بالبنات) انا سويت روحي ما سمعت لكن هالكلمة اثرت فيني حيل.

مرة كنت قاعدة مع رئيسة القسم والا تدش علينا ابلة من قسم ثاني , وتقول انتم قسمكم مسخرة والبنات مطلعين عليكم سمعة انكم ليديات , انا عصبت قلت منو قصدج قالت مو انتي انتي عارفة قصدي شنو ( عيل في ابلة تقفل عليها باب المختبر وهي قاعدة مع طالبة)

عطوني حل اشلون اتعامل مع هالنوع من الابلات

مرة كلمت ابلة وعصبت وازعلت وقالت انا طبعي جذي اجتماعية مو مثلج

منو الصح أنا والا هم

واذا هم غلط اشلون انبههم

والله يا ريهام هالنوع ما يتغير..

وحده ترتضي لنفسها هالشي وهالمكانه؟

شوفي لا تقولين الابله ماتدري ان البنات يقولون عنهم ليديات.. لا اكيد يدرون ما دام رفيجاتهم من الطالبات ‏​بِــ̯͡سّ يسولفون.. اكيد قالوا لهم هالسالفة..

نصيحة اخت تحبج في الله اتركيهم عنج .. ادري انج حابه لهم الخير ‏​بِــ̯͡سّ هالنوع من الناس يضر يعني يمكن تسولف لطالبات عنج وتفتري عليج بعدها هالافتراء بينتشر بالمدرسة واحتمال تتعبين نفسياوتكرهين المدرسة وماتقدرين تعطين وتأدين واجبج ..

اتركيهم عشان ما تجيج بلبله من وراهم..

أحسن شي تسوينه انج تخلين نفسج على موقفج وما تتغيرين
الحمدلله انتي شايفة وعارفة الوضع جدامج شلون. الأبلة الأولى طنشي طنشي قد ماتقدرين
وخل تولي لي قالت شي ماعليج منها، التهي بدفتر التحضير او مكتبج أو اي شي ثاني.
اما الابلة الي ماتوجب بالطقاق لا يكون انتي ميتة عليها. احسن وزين سوت خل تولي ماعليج منها ولاتحرين نفسج عليها..
موفقة يارب

اكيد الابلة تدري وعارفة هالشي …..

وعاجبها الوضع … مع اني استغرب شلون ترضى على نفسها ….

والغريب انها متزوجة وعندها عيال …. وتشوفينها بالايام اللي ما فيها دوام طالبات مبهذلة ومو مغسلة ويهها واذا دوام عادي تكشخ وتلبس ما تخلي مكياج ما تلطخ فيه وجهها … مو مشكلة اكشخي بس لا تبينين ان كشختج للبنات

المشكلة ان هذول مراهقات … كلمة توديهم وكلمة تييبهم … انا ما عند مشكلة مع طالبات الثاني عشر لانهم كبار فاهمين وعارفين الصح والغلط

لكن طالبات عاشر للحين ياهال

اول السنة كل يوم والثاني ( شلة الحبيبات والمعجبات) رايحيين لرئيسة القسم (ابلة ريهام مغرورة وعصبية وما تضحك وتسولف معانا ما نبيها نبي ابلة فلانة ) لاحظي انهم ما اشتكوا على شرحي ولا على ادارتي للصف , اشتكوا اني ما اعطيهم ويه بالحصة وما احب لعب اليهال . هالكلام اول السنة بس الحين لا الوضع تغير والحمدلله افهموني وافهموا طبعي , واصلا الابلات الثانيات مو ذاك الزود بالشرح بس بالسوالف شاطرات

مشكورة حبيبتي على ردج

عاد تدرين منال اني ناطرة ردج

لاني حاسة انج قريبة من شخصيتي , تحبين شغلج وتحبين طالباتج وما تحبين الدلع والمسخرة

احاول اطنش بس الوضع يفشل

تخيلي ان سمعة قسمنا واصلة للمنطقة التعليمية ولما اقولهم اني من المدرسة الفلانية والقسم الفلاني يببتسمون ويطالعوني بنظرات غريبة ( احنا مدرستنا معروفة بهالسوالف خصوصا قسمنا وقسم الاجتماعيات ) واللي يحر ان كلنا كويتيات

لو رئيسة القسم قوية شوي كانت وقفتهم عند حدهم

بس الشكوى لله

شكرا على نصيحتج

اكييييييييد انتي الصح

خلج على ما انتي لا تتغيرين وصدقيني البنات الي بيقولون عنج هالحجي بعديين لو يذكرونج بيقولون الله يذكر ابله ريهام بالخير كانت خوش ابله ومحترمه

اذكر بالمتوسطه ابله توها متوظفه صغيره ولبس وميك اب وانصدمت ان البنات يطلعون معاها وبينهم فون والله طااحت من عيني

الحين شنو فرقت عن البنات ؟؟؟ ماكو حدود جنها وحده من رفيجاتهم غشمره وضحك حتى من كثر مو طايحه الميانه ما يحترمونها

وكانت عندنا ابله بالثانويه عندها هييبه الكل يخاف منها بعدين مادري شصار لها في بنت وايد تتقرب منها والابله تصدها وشوي

شوي صارو 24 ساعة مع بعض و قام يطلع عليهم حجي بالمدرسه وكل اخبار هالابله عند البنات – البنت تسولف حق رفيجاتها

ورفيجاتها مايقصرون ينشرون بالمدرسة

قالو ان ريلها درا وخذا عياله وبيطلقها حجي ياااكثره الله يستر عليها

المهم ماتسوى عليها هالابله هدمت حياتها المهنية والزوجية بسبب طالبة مراهقه

ادري قرقت وايد بس حبيت ابين انج على حق وشنو المشاكل الي شفتها بعيني صارت بسبب هالشي

والصراحة الله يعينج ويعطيج العافية فوق انج معلمة ومو اي معلمة … معلمة ثانوية الله يعطيج الف عافيه

ونصيحتي لج اول شي اتمين مثل ما انتي واذا في بنات صج تحبينهم مثل خواتج وحابة تتواصلين معاهم لا تسوين جذي الا عقب تخرجهم انا ابلتي سوت معاي جذي والله كانت احسن ابله بحياتي اول مره شفتها كنت احسها تكرهني وحييل شديده

صج شدت علي وكانت تزفنا بس اخر السنة لما بنتخرج من الثانويه قالت لنا انا ورفيجتي اعتبركم مثل بناتي وانتو اكثر بنتين احبهم

وليلحين نتواصل معاها بس طبعا بأدب واحترام مهما صار ما انسى انها ابلتي وليلحين اناديها ابله :$

وبالنسبة حق الي معاج بالقسم شفتي السوالف الي فوق الي كتبتها والي سمعتيها من البنات >> الي تتلزق

قوليها حق الابلات وانتي تسولفين بطريقة غير مباشرة بس يعني قولي انج سامعة من وحده تصير لج طالبة تقول جذي عن الابلات الي يرافجون البنات

والي على راسه بطحه اكييد بيفهم

والسموحة طولت عليج

هذول ابلات كفو يكوونون مربيات اجيال …

شنو هالمسخره احسهم يهال بعدهم ما انضجوا ..

يسلموا حبوبة

انا للحين مو فاهمة هالنوعية من الابلات ؟؟

انا قبل ما كنت اسمع عن ابلة جذي ابد

اصلا نستغرب لما الابلة تسلم على الطالبة

مصخرة صج

ويع هذول ابلات ولا مراهقات؟؟؟؟

حبيبتي لا تتغيرين انتي صح الله يعينج ع القسم البايخ

قسمنا صج بايخ

بس انا مرتاحة بالمدرسة

الادارة والوكيلة والناظرة ذهب ما ودي اغيرهم

الابلات اللي معاي الله يهديهم

برايي حدود العلاقه بين الطالبه والمعلمه تكوون باطار. المادةالعلميه فقط لاغير*
خصووصا مرحلة المتوسطه والله الكورس اللي فات كنت ميداني شفت العجب العجاب واول نصيحه انصحتها لي رئيسة القسم تراج صغيره والبنات يحسون انج قريبه من اعمارهم فلاتعطينهم وجه شوف عيني مدرسات كانوا يمسكونها طالباتها من خصرها جنهم رفيجاتها والله فشله عيب وين هيبة المعلم
عاد انا احاتي انهم يحطوني بالتعيين ثانوي مااااااابي 

واي واي استغفر الله لا طيح علينا السما قطييييييييييييييييييييييييييييييعه شهالابلات الهبلات شهالمستوى السافل الي عايشين فيه

المشكله انهم يعممون على القسم كله انه مصخره ان شاء الله ايونج ابلات سنعات و تتعدل سمعت قسمكم

اب اب اب اب