تكفوووون بنات ابي مساعدتكم

السلام عليكم
بنات انا بدخل بالموضوع ع طول انا الحمدالله من عايله محافظه وعندي اخوي اصغر مني انا اللي مربيته يعني معتبرني امه يشكي لي

ولا يشكي لامي يطلبني ولا يطلب امي يعني معتبرني امه واليوم جا وصدمني بموضوع وانا مااحب اجرحه صدمني يقول انا احب وحده وابيج تكلمينها قلتله شلون تعرفت عليها قال تعرفت عليها بحديقه وقلتله طيب يمكن مثل ماتعرفك تعرف غيرك قال لا هي حيل خلوقه ومؤدبه حتى اول شي مارضت تاخذ رقمي واول شي كل ماادق عليها تسفل فيني والحين انا احبها وهي تحبني وصار لنا سنه تقريباً وابيج تكلمينها وتتأكدين منها والمشكله يااخواتي انه اخوي للحينه يدرس هذي اخر سنه له بالثانويه وحنا ناس ع قد حالنا ولا جان خطبتها له بس مانقدر حالياً لان ابوي حيل ظروفه صعبه وحتى بيت ماعنده وابي منكم تشورون علي يااخواتي مالي بعد الله غيركم ودي اني ابين له ان هالشي غلط وبنفس الوقت ماابي اجرحه لانه حيل حساس وهو قايل للبنت انه ناوي يخطبها بس بعد مايخلص دراسه ويتوظف يعني مو اقل من خمس سنوات وهي قايله عادي مستعده تنطر بس تخاف اهلها يغصبونها ع احد ادري طولت عليكم بس صدقوني مالي بعد الله غيركم ودي تنصحوني شسوي وشلون اتصرف والله يوفق كل وحده ترد يارب

حبيبتي الزواج موعيب بالعكس ستر له ولها لكن يبقى الاختيار الصح او الخطأ
لازم تتأكدون من البنت اللي خذت قلب اخوج قدها ولا لا

الله يوفقكم يارب

ويكتب لكم الخير

معنى حديث الرسول عليه وسلم ان تزوجوهم والا يكونوا فتنه في الارض
واحاديث اخرى على المتحابين بس حب عذري برئ الله يستر عليهم

حبيبتي فديت الريم تفكير اخوج سليم الحمدالله بالعكس اخوج راح يستر على هالبنت بس بنفس الوقت لازم ما يتسرع و يكمل دراسته لان الشهادة تعطي الانسان قيمة ..اما بالنسبة للبنت فلازم يتاكد من صدق مشاعرها .. تقبلي مروري

الله يجزاكم خير يااخواتي اللي رديتوا انا ادري ان الحل الامثل هو الزواج بس المشكله ان ظروف ابوي صعبه حيل ومو متيسر ان يزوجه الحين واحنا ناطرين ليما اهو يكون نفسه يعني يخلص دراسه ويتوظف هني نقدر نزوجه واهو يعتمد ع روحه يعني يبيله مو اقل من خمس سنين بس انا خايفه عليه بهالفتره لانها مثل ماتعرفون موشويه والله محتاره شسوي معاه وبعد مثل ماقالت الاخت اخاف البنت موزينه مو عارفه شلون اتأكد من هالشي

حبيبتي حاولي تفهمين اخوج هالشي و خلي يفكر بالواقع عشان بالاخير ما ينصدم و الله يكتب اللي فيه الخير انشالله

الله يجزاكم خير يارب وينولكم مناكم وان شالله بحاول افهمه والله يكتب اللي فيه خير للجميع
مشكورييييين فديتكم يااحلى كويتيات