تكفون ساعدوني البامبرز مأزمني .

شلونكم بنات شخباركم

من زمان ما كتبت موضوع في المنتدى
انا وحدة ما اكتب الا لما تكون عندي مشكلة عويصة
وادري ان خواتي بالمنتدى مايقصرون معاي
خل ادخل بالموضوع على طول

الله يسلمكم انا بنتي عمرها 3 سنين ونص وقطعت عنها البامبرز من كان عمرها 2 ونص يعني صار لها سنة
بس المشكلة ليلحين مو عارفة اشيل عنها البامبرز باليل ماشالله عليها لما تقوم من النوم يكون البامبرز متروس
ودايما اكلمها واعلمها ان الكبار ما يلبسون لما ينامون ماكو فايدة جربت طريقة ان لما تنام اشيلها واوديها الحمام تقعد تبجي ابي انام وما تخليني تكرمون ابولها من العسارة اللي فيها خصوصا لما تدوخ تكون عيزانه مالها خلق الحمام كله تقول مافيني شي وتسويها على روحها احس الحين ان بنتي كبرت المفروض انها تفهم بس ماكو فايدة
انا حدي ضايق خلقي احس كأني مو قد المسئولية كل النام بهالعمر قطعوا البامبرز نهائيا عن اعيالهم إلا انا
تكفون بنات شنو الحل ساعدون ابي ارتاح من هالبلشة.

يا معودة اعرف وحدة ولدها بيدش الروضة وتقول راح يفضخها ربوحه ؟؟؟ شلون مادري
المهم انتي قطعي عنها السوائل من الساعة 6 المغرب ودخليها الحمام قبل لا تدش تنام وحاولي ا تخلين غرفتها باردة وبس تقعدة الصبح دخليها الحمام بسرعة
ومرة على مرة ان شاء الله تتعلم

واذا شفتي انها ليلحين تسويها على عمرها راجعي عيادة التبول اللاارادي يمكن عندها ضعف الله لا يقول

مشكورة ام دعيج انا بنتي ادمان ماي كلة ميتة من العطش حتى الحضانة اللي مدخلتها فيها تقول ابلتها اكثر وحدة بالحضانة تروح الحمام بدرجة اذا شربت حليب او عصير تقول عطوني ماي وراه

حاولى تخففين عنها السوائل بلليل ودخليها الحمام قبل لا تنام

قاعدة احاول كل يوم اويها الحمام وافرش اسنانها قبل النوم بس المشكلة وهي نايمة وايد تدمر روحها مو شوية لدرجة مرة نومتها بدون بامبرز بعد ساعة رحت لها الا اهي رطبة كلها واصل ليما ظهرها كلة قعدها من النوم وسبحتها ورجعت حطيت بامبرز ونامت والمشكلة تمشي وتقول حق الأودم انا نمت ووصخت هدومي حدها مستانسة

بنتي ماشاء كبيرة وتفهم .. حاولي معاها بنظام الجوائز …
يعني مثلا بليل قبل لا تنام وديها الحمام تكرمين وبوليها … وحطيلها جدول في غرفتها او علقي على الباب قوليلها كل يوم تقعدين من النوم بدون ماتكونين مسويتها على نفسج راح احطلج ستيكرز وبس يصيرون 10 ستيكرزات راح اعطيج هدية وكلما جمعتي ستيكرز اكثر هديتج راح تكون اكبر … اغريها باشياء تحبها بخاطرها … وغلط تقول حق الناس انا دمرت روحي بليل ويقعدون يضحكون عليها .. اهي جذي عبالها قاعدة تسوي شي صح … فانتي وصي اهلج قوليلهم اذا قالتلكم جذي زعلوا منها ولا تحاجونها ولا تضحكون … راح يحز بخاطرها وتتضايق وان شالله تغير … بس يبيله صبر ومثابرة ..

حلوة الطريقة

ماشالله عليج رجاوي طريقتج واااايد حلوة

مشكورة رجاوي على النصيحة وبحاول بهالطريقة عاد انا شويها اول ما قطعت عنها البامبرز ونفعت معاي انشالله تنفع بعد حق اليل