تعبت من التفكير بهالموضوع

مرحبا بنات
انا كتبت مشكلتي قبل عن خطيبي وبخله كلمت خالي وقالي الرجال احسن من غيره
بس الجديد الحين والي حابه اقوله لكم وتشورو علي فيه هو..
اني احس ان خطيبي مو رومانسي ابدا ابدا وما احس معاه بشي لا لمسة يده ولا حضنه احس اني امثل وبس.. ودايما افكر اني افسخ الخطبه
والي محيرني ومخليني دايم افكر هو اني توقعت ربي يرزقني بشخص افضل من هذا يعني شخص ارتاح معه وارتاح له توقعت ربي بيعوضني بدل اليتم وبدل امي الي توفقت وبدل اني وحيده وماعندي اخوان وخوات توقعت شخص يصيرلي عيله.. خطيبي احس ماعرف اسولف معاه ودايما نتزاعل واحس انه مايرعرف يراضيني وحتى لمن يراضيني اتنرفز وحتى كلامه ما يعجبني مدري ما احس اني مو فرحانه مثل باقي البنات.. حتى لمن اتصل وحاطه ببالي اسولف معه اسلوبه بارد.. انا جالسه افكر افسخ الخطوبه بس كلام امي الله يرحمها مخوفني كانت تقولي انو البنت الي حظها حلو في الزواج ينعرف من اول زواج لها ادا توفقت فيه حظها حلو والي تتطلق مرا تعرف انها حظها بيخترب على طول (امي مطلقه خمس مرات) خايفه افك واصير مثل امي وخايفه اكمل معه وما ارتاح.. مدري كيف اتصرف وعلى اي اساس اقرر.. انا كتبت لكم الي بخاطري بدون تنسيق وترتيب لكلامي حابه تشورو علي او تدعون لي ان ربي يهديني للقرار الصحيح

معقوله ولا حتى دعوه منكم تجبر خاطري

ماحبيت اطلع بدون رد حبيبتي الله يرحم امج و جعل مثواها الجنه
فكري عدل و استشيري حد كبير من اهلك خالتج عمتج و الافضل و الاهم استخيري دام انج عل بر فكري عددددل لاتستعجلين بالزواج و قعدي معه خطيبك و قوليله كل الي قلتي و شوفي شنو ردة فعله لاتخافين و لا تستحين باجر بتقولين ياريت و ياريت و الله يكتبلك الي في الخير و تعيشين حياتك مستقره و مرتاحه

حبيبتي الله يرحم والدتج وجعل مثواها الجنه

اول شي غلط سويتيه انج حاطه حالة امج الله يرحمها جدامج بكل شي .. هالشي بيصعب عليج حياتج اذا هي تطلقت 5 مرات وطبعآ هالشي مو عيب بس هذا نصيبها

انتي قام تخوفين نفسج لما تقولين انا ممكن اصير نفس امي وان شاءالله حظج حلو تفائلي دايمآ بالخير وان ربج يجعل حياتج سهالات ولا تحطين شي في بالج ينفرج او يخوفج لانه جد انعكاسه سلبي جدآ على حالتج الصحيه والنفسيه

بالنسبه لخطيبج استخيري .. ولازم لازم لازم تكلمينه بصراحه يمكن هو من نوع الي يستحي يعبر عن مشاعره او هو مو حاس بتصرفاته

ترى هذا مو زواج يوم ولا شهر هذا عمر بحاله ! اذا ما تكلمتي من الحين باجر تندمين لازم توعينه تقوليله يا فلان انا محتاجه احس بحبك برومانسيتك وودي اسولف معاك بس انا مو لاقيه منك قبول واحس في برود منك تجاهي يمكن يحس على نفسه فتحيله قلبحج عشان بالتالي هو يفتحلج قلبه ويتحجى ويقولج اذا في سبب مقنع

اما بتمين ساكته ولا تسوين شي بتندمين بعدين وهو بيتم على حاله ولا بيتغير لانه شايفج ساكته
وترى في رياييل جذي ما يحسون انهم يضايقون الي جدامهم وحسبالهمانه حريمهم مرتاحين على هالوضع بسبب ان الحريم ساكتين وهالشي غلط

وان شاءالله الله يكتب لج الي فيه الخير

أستغفرا لله العلي العظيم يااخيتي ماايجووووز تقولين توقعت ربي يعوضني توقعت ربي وظنك سيء برب العالمين

بهالطريقه !!! ( وتذكري إن الله إذاا أحب عبدااً إبتلااااه)

أحسني الظن برب العباااد وهو مقسم الأرزااق

الشيء الثاني لاتحطين عبارتك أمك تكسير وتحبيط لك يمكن معاناتهاا مع الطلاق خلاهاا تكون هالفكره

وتجاار ب الغير ماتنطبق علينااا

وإذاا مو مرتاحه معااه إفسخي وأنتِ ع البر أفضضضل لأن البخل دماااار وإلا الرومانسية أمرهاا أهووون

والله يجبر كسر قليبك .’,

كأن تتكلمين عني !!!

اوووووول مانخطبت كنت مثلج احسه بخيل و احسه مايعرف الرومنسيه ..

بس ملجناا و قرب العرس و عرفت انه انسان ثاااني طيب كريييم عطووف لما طاحت الميانه عرفت شخصيته عدل و كل توقعاتي خططططأ

مسكين ماكان بخيل بس كان مضغووط و كله يجمع للمهر للعرس للبيت يعني عنده مصاريف تشييب الراس .. بس لما خلصنا كل شي عرفت انه كريم مايقصرر ولله…. يمكن خطيبج حاليا مضغوط التمسي له العذر ماشقولون..

و الرومنسيه كان يستحي ههههه ماطلعت عليه يمكن خطيبج يستحي او مايعرف يعبررررر

مع الوقت ان شاء الله بتعرفينه عددل

انتي ماتحبينه ليلحين
ماارتحتيلة ! ماتشتاقين له ولما تشوفينه تستانسين
اذا لاء طولي فترة الخطبة ليما تفهمينه واذا نفس الوضع نصيحتي ترى الزواج قبول ومودة لاتغصبين روحج

أختي

بناء على موضوعج القديم واليديد انتوا مو متوافقين مع بعض ولا حتى متقبلين بعض

وصار لكم فترة زينة مخطوبين وللحين ما توالمتي عليه وللحين اشية وايد زاعجتج منه

نصيحتي استخيري وإذا استمر الحال انتي للحين على البر ، كلام امج على العين والراس بس مو منطقي !! مليون وحدة وواحد تطلقوا وعقبها الله وفقهم في احد غير وعاشوا مرتاحين

نصيبج من عند الله بييج لمكانج

أنا اللي اعرفه ان الحب الحقيقي والمشاعره المتبادله بينكم راح اتبين بعد الزواج ان شاءالله لما تكونون عايشين في بيت واحد وقريبين من بعض ولاتستعجلين بقرارج ،،موفقه حبيبتي

اولا لا تتوقعين الريال بيفهمج من اول شهر او شهرين

بعد 3 سنين من الزواج يبدي الزوجين يفهمون بعض عدل

والعيوب بالريال مو تستدعي الطلاق

عندك مشكله بشخصيتك وليست بالمحيطين بك

واجب تراجعين نفسك

وتصرفاتك

فوفو

اذا مو مرتاحه معاه "نفسيا" وتحسين ماتقدرين تتحملين عيوبه .. فلي !

بس ماراح تحصلين احد كامل .. كل واحد وله عيبه ..

ولا تشوفين حال البنات وتقارنين روحج فيهم .. ترى محد يشكي حاله لأحد .. وايد ناس تدعي السعادة !

اتفق معاها
لأنه ماكو شيء يكون واضح إلا بعد مايدخل عليج ، ألتمسي العذر ، واستخري ..

الله ييسر امرج ويرح بالج ….نصيحتي هي:

1- أحسني الظن بالله
2- استخيري استخيري استخيري
3-شاوري حد من خالاتج او عماتج الثقه
4- تأكدي من صفة( البخل ) اختبريه أو خلي حد يسأل عنه عدل …ان تأكدتي من هالصفه بالذات ..نصيحه فلي وأنقذي نفسج
ترا البخل اساس كل خلق سيء..بخيل المال دائما بخيل العاطفه.

ربي ييسر امرج ويسعدج