|
|
السلام عليكم، بغيت اسأل الأمهات العاملات شكثر اجازة خذوا لتربية الطفل.. انا دوامي حده 4 اشهر يعطيني من الولادة، هل راح اقدر اوفر للطفل رضاعة طبيعية و اهتمام مع العلم اني ضد الخدامة وساكنة بروحي مع زوجي بشقة.. شكثر يبيلة الطفل على ما تقل عدد الرضعات وشكثر ينام؟
بالنسبة للرضاعه من بعد شهرين تقل الرضعات وتزيد الكمية وكذلك بعد الاربع شهور
وبالنسبة للنوم يتغير من طفل لاخر انا ولدي من 3 شهور ماشاء الله عليه ينام الليل كله ويقوم الصبح ياخذ رضعته ويرجع ينام
في ياهل يكمل السنه وما يعرف ينام الليل كله
وعن الرضاعات حسب شهية الياهل
بالنسبة لي 6 شهور
أولا اهنيج من كل قلبي على الشجاعة والطموح في تربية عيالج
واقولج استمري للأمام وبخطى ثابته وسكري اذونج عن المحبطات وترىاهم وايد وكوني على ثقة ان اسلوبج في تربية عيالج دون تدخل خادمة في تربيتهم هو الأساس
أكرر سكري اذونج عن المثبطين
انا تعبت وايد من حجيهم ولكني لازلت مستمرة على هذا النهج
خادمتي تنظف وتغسل ولا لها شغل بعيالي واذا احتجتها تساعدني في عيال فتكون جدام عيني
تجربتي كالتالي حبيت افيدج فيها
انا كنت ارضع بدون لا اعطيه حليب صناعي
كنت بليل اشفطله او قبل الدوام مبجر اشفط له واحسن شفاطة للحليب اهيا شفاطة مدلا عن تجربة جربت وايد شفاطات اغلبهم يعورون وهذي ما تعور اسمه (مدلا ) اتلاقينها بالصيدليات سعرها 22 تقريبا الالكترونية واليدوية ارخص طبعا الالكترونية فظيعة وماتعورولا تاخذينها من مذر كير سعرها 28(وللعلم الحليب عادي يقعد في الثلاجة ثلاثة ايام بس قبل لاتعطينه شمي ريحته بس عشان تتاكدين )
وكنت مثل حالتج ما عندي خدامه
أهم شي حبيبتي نصيحتي وعن تجربة
اذا انتي مو بعازة المعاش ولدج اولى وربي صدقيني بعوضج واحتسبيها لله وتذكري استثمارنا باولادنا وصدقيني كله بتلاقينه باجر في عيالج مشبعين عاطفيا ونفسيا وكلها دراسات تثبت ذلك من حيث الرضاعة الطبيعية والتفرغ للطفل وتاثيرة على الابناء
انا ولدي الثاني خذيت اجازة 6 شهور وفوقهم شهرين بدون راتب (اجازة رعاية الاسرة مدتها اربع سنوات فقط )انا خذيت منها هالشهرين ويوم داومت خذيت ساعة رضاعة
الياهل يبدي ياكل من اربع شهور والافضل حق اللي يرضعون طبيعي ياكلون بعد 6شهور افضل لصحتهم فتقدرين اتصبرينه على ماترجعين من الدوام ومن يبدي ياكل تخف عدد رضاعته تدريجيا ولدي الحين عمرة 10 شهور يرضع من 3رضعات الى 2 فقط وانا وايد مرتاحه الحين لأنه بدا ياكل وارضعه الصبح واذا بغى ينام الظهر وبليل واحيانا يقوم نص الليل ارضعه ومايطول بسرعة يخدر وينام )
حبيبتي
مسكي ورقه وقلم
وكتبي مشكلتج وكتب الحلول
وحطي حلول مقترحة لحل مشكلتج مثال
1-الحل اللأول : صباحا اوديه عند امي او اختي او خالتواكون شافطتله و(افيدج انا ساعات اسويلة تمر في الممية يشربه هذا غير الحليب اللي اشفطه له اصبره على ما ارجع)
2- الحل الثاني : اخذ اجازة لين تتحسن الظروف ويشتد عوده
الحل الثالث : ادخله حضانه قريبه من دوامي او داخل الدوام (في حال توفر ذلك)
4- الحل الرابع : اخذ اجازة من غير راتب (تخصم من اجازة رعاية الاسرة ومدتها اربع سنوات انتي كيفج اشكثر تبين شهر شهرين او اكثر واهيا شروطها ان لازم ما تاخذين اقل من ستة شهور لكن تقدرين تقطعينها وترجعين حق دوامج حتى لو بس شهرين وماتكملين ستة شهور)
وبعدين سوي جدول من خانتين وكتبي
كتبي بالاولى سلبيات كل الحلول التي كتبتيها والخانة الثانية الايجابيات
وشوفي اللي يناسبج والله يوفقج ويسهل امرج
وانا اايدج
ان الياهل ما يكون عند الخادمة
واخيرا لقيت انسانه مثلي ترفض ان يكون للخادمة الدور الأكبر في حياة اعيالها
الخادمة فقط اذا احتجتوها يا امهاتنا فقط خلوها تنظف وتغسل وخلوا ربى عيالكم على ايدكم وربي ما يضيع التعب
والتجارة الرابحة اهما عيالنا
واذا احتجتي اي شي في الخدمة
وانا اشجعج عالرضاعة الطبيعية
واي معلومات عن الرضاعة حاضرين
يعني وثقت بخدامتي واعتمدت عليها يأشياء وايد لها علاقه بولدي
بس لما ارد من الدوام خلاص يصير عندي واهيا مالها شغل فيه
الله يقدرني واطبق كل الي قلتيه
و الحين حامل بالثاني و الحمدلله…. و علشان ارتاح و اريح العيال و ابوهم راح استقيل… عيالي ابرك لي… صج زوجي مسكين راح يتنتف مسكين بس شنو نسوي؟ انا ماحب الخدم و لا راح اخليهم بمسكون عيالي…. انا اربيهم احسن….
الشيخة… ماشاءالله عليج كلامج عين العقل….
انا اخذ شهرين وضع + 4 أمومه
يعني اداوم يكون البيبي عمره 6 شهور
ووقت الدوام اوديه عند امي مع خدامته لما يشد حيله ويدش حضانة
وكل الاسباب ترجع الى نقص العاطفه والحنان داخل البيت
وللعلم شخصية الانسان تتكون من عمر الانسان يوم الى عمر سبع سنين تتكون شخصيته للعمر كله سواء كانت شخصية قوية او ضعيفة
ليش نستخسر اقتطاع اوقاتنا لعيالنا
احتسبوها لله وتكوين جيل صالح يخدم دينه وكله بميزان حسناتكم
وتذكروا ربي ما يضيع التعب
واستمتعوا بتربية عيالكم وخلوها مدخل سعادة لكم في حياتكم
حسافة على الأم كلمة أم لاخلت عيالها دايما بيد الخدامه مهمتها بس تسال الخدامه اكل ولا ما اكل نام ولا قعد
والفشلة لا راحت ودت ولدها الطبيب كل ما سألها الطبيب سؤال توهقت واسالت الخدامه
ولسان حال هاليهال المساكين (يمه امانه لا تخلينا عند الخدامه)
حبيباتي الامهات المسألة مسألة وقت ويكبرون عيالكم واللي ظروفها ما تسمح انها تاخذ اجازة تصبر نفسها لين يدخل ولدها الحضانة عالأقل وصدقوني المسألة مسألة وقت وصبر
أكررررررر(صبر)
حتى مسألة الرضاعة مسألة وقت وصبر والله راح تعدي واتحسون فيها
وحتى التعب راح تلاقين له لذة وطعم وللأجر حلاوة راح تحسين فيها وفي بركتها في عيالج
أحبكم في الله أمهاتنا المخلصات
و بخاطري أستقيل عشان أقعد أجابل هاليهال و لمن يدشون المدرسة أرد أشتغل …..
أنا سمعت مره خبير بتربية الأطفال يقول أن الطفل يحتاج أن أمه تتفرغ له السنه الأولى من حياته تكون عنده …
و أنا مع( الشيخه ) بكلامها فعلا اليهال و تربيتهم أهم من أي شي ثاني