تخيلوا انكم بالقبر تضايقت حدي

السلام عليكم ..
شلونكم بنات؟

ادري ان هالموضوع يضايق .. لكني من فتره ما كنت اصلي ..يعني اصلي واقطع صلاتي فتره وارد لها .. واقطع وارد .. وهذي حالتي .. مع العلم اني مو محجبه .. الله يهديني ..

المهم .. في الفتره اللي انا فيها ما اصلي .. حلمت حلم ..
أني اصلي وعلى يميني الرسول عليه افضل الصلاة والسلام .. ويمين الرسول اخوي الكبير .. ونصلي بصفه وحده مع الرسول .. لكني اثناء صلاتي ارجع شوي وارد مره ثانيه جدام بنفس المستوى مع الرسول .. وارد تلقائيا ورا شوي بس يعني خطوه قصيره حيل .. وارد اجدم جدام بنفس خط الرسول .. مع العلم ان اخوي نفس صفه الرسول ..وما يصير له نفسي ..

من بعد هالحلم .. استانست لاني اعرف ان اللي يشوف الرسول شي حلو له .. مع اني ما شفت ويهه لانه كان خاشع بصلاته وانا بعد عشاني كنت اصلي ..

المهم .. صادف اني كنت احس بتعب و دوخه ورحت المستشفى اراجع والا اطيح عليهم .. ونمت عندهم ساعه كامله .. بروحي .. بسرير وممنوع احد يدخل علي نهائيا .. ماعدا المرضى اللي بنفس الجناج معاي ويفصل بيننا ستاير .. ساعتها .. تخيلت نفسي بالقبر .. ما اكلم احد .. ولا اشوف احد .. وان اللي احبهم يخافون علي .. واني مشتاقه لكل اللي يحبني ..
هنييييي… صكت فيني الدنيا وصرت ابجي بدموع بس .. وتضايقت حدي .. عيل باجر بالقبر شيصير فيني؟؟

بعدها بنص ساعه خليتهم يشيلون المغذي مني .. عشان اطلع لاني انغمت .. ورديت البيت وصليت .. والحمدلله للحين انا اصلي وانشالله ما اقطعها نهائيا .. لكن الفتره اللي كنت اصلي فيها .. صرت اتخيل الرسول عليه افضل الصلاة والسلام واحس بحرج كبير اني ما صليت على طول من بعد ما حلمت الحلم .. لدرجه اني ابجي بصلاتي واشوف قبري جدامي .. واستمر هالشي معاي ليما صرت احس بألم في صدري .. هالالم غريب .. الصراحه خفت حيل .. ولما رحت المستشفى .. تطمنت لاني سويت سونار .. وطلع التهاب يروح انشالله بالمضاد .. حبوب بس .

من بعد هالموقف .. صرت احمد الله اكثر .. مع اني من انا صغيره وانا على طول بلساني كلمه الحمدلله واستغفر الله ياربي .. على طول .. وانا اكل وانا اشرب وانا العب وانا اطالع تلفزيون .. هالكلمه بقلبي او بلساني ..

الحين .. يدتي تعبانه وبالمستشفى .. فيها القلب .. وبالعنايه المركزه .. اشوفها تنادي وتقول .. قعدوا معاي .. لا تروحون .. واحس انها نفسيا متحطمه تبينا عندها .. والدكتور مو راضي الا بنةاعيد معينه .. هني تحطم قلبي .. لاني مريت بهالموقف ..

بناااااااااات .. احس اني لاهيه احيانا .. وايد مو احيانا .. وعلى طول ادعي ربي انه يغفر لي ويهديني ..

مادري ليش كتبت هالموضوع لكني حبيت اكتبه واعذروني اذا ضايقتكم.

حبيبتي الغاااااالية lolly
ماشاء الله تبارك الرحمن والله يا أختي إني فرحت لج واااايد ..
والله يثبتج يالغالية .. واستمري على طريج الخير والطاعة فوالله راح تلقين سعادة عمرج ماحسيتي فيها ..
اسإليني أنا .. أنا مجربة الحياتين حياة التقرب إلى الله وحياة الإبتعاد عن الله سبحانه ..
والله ياحبيبة قلبي إني أحس كل ما أتقرب إلى الله براحة عجيبة حتى لدرجة بعض المرات أيي حق أمي أقولها يما أحس إني مستانسه مادري ليش .. فكانت تقولي أميمتي هذا السعادة والراحة الحقيقية .. إلي الناس كلهم يدورنها بالحرام واللعب واللهو في هالدنيا واهي موجودة عندهم لكن سبحان الله مو الكل الله يعطيه هالنعمه ( واهي السعادة الحقيقية ) لأن الله سبحانه قال في كتابه (( إنك لاتهدي من أحببت ولكن الله يهدي من يشاء ))
فافرحي يالحبيبة ويالغالية إن الله اختصج من عباده إلي كتب لهم الهداية .. فالحلم إلي شفتيه بشارة خير إن شاء الله والشعور إلي ياج وحسيتي إنج مقصرة بحق الله والله إن هالشعور كثير من البنات فاقدينه والله ما عطاهم هالشعور .. لكن انتي عشان الله يحبج عطاج هالشي .. فاحمدي الله يالغالية قول وفعل .. ويالله تحجبي وصدقيني راح أفرح لج وااااااااايد ..

الله يوفقج يالغالية ويثبتج على طريج الطاعة والطريج إلي يحبه رب العالمين .. اللهم آمــــــــــين

امين الداعيه .. ومشكوره وايد ومادري ليش تأثرت من كلامج .. وانشالله مشروع حجاب بالطريج بس شوي شوي لاني حيل مو متعوده عليه .

شوفي

انا دايم اخاف من القبر

ودايم اتخيل اني راح اموت واكون بروحي

واتخيل اشلون راح يكون قبري

وهناك راح اكون في كل الاجواء يعني صيف بالحر والا بالبرد والشتاء والجو يطق مطر والمطر يوصل لي جسمي
بدون ملابسي الغالية او حتى تحمي جسمي وجلدي بدون كريمات او مشط امشط شعري

ونيسي راح يكون الدود وتخيلو الدود ياكل من جسمج ويوصل لي حلجج وبلاعيمج

اسفة بنات بس انا دايم افكر بهالشغلات خصوصا لما امر صوب شارع المقبرة ( اللي صوب الظهر )

فهل من متعض ؟؟؟؟

الله يهديج ويثبتج
ان شاء الله ويهدي جميع المسلمين والمسلمات

الله يزيدج أكثر ويثبتج على دينه يارب وان شاء الله تبشرينا بالحجاب (الخطوه الثانيه)
والله ياأختي الدنيا ماتسوا لاهين فيها لي متى جنه هذي بس حياتنا نسينا الحياة الاخره الواحد مو ملحق على مشاغل الدنيا مع ان في الاصل احنا مخلوقين للعباده لكن الحين صارت أولوياتنا الدنيا والدين ثانيا
الله يهدينا بس ويثبتنا على دينه

أن شاء الله ربي يحبج ويبي ينبهج لشئ أنتي كنت غافله عنه
يا رب أسأـلك الثبات لج ولي ولجميع المسلمين والمسلمات

اختي الله يوفقك وتذكري التائب من الذنب كمن لا ذنب لة فالله جل وعلا غفور رحيم يفرح بتوبت عبدة وفقك الله لما يحبة ويرضاة وجمعنا واياكي في جنة النعيم قولي امين

الله يشافي جدتج , ويثبتج ويقوي ايمانج , ادعي اختي في الله ( اللهم يامقلب القلوب ثبت قلبي على دينك ) .