|
|
السالفة الي راح اقولها لكم صارت حق رفيجتي.. توها ما صارله يومين..
بقولكم السالفه من البداية…
رفيجتي مليانه اشوي.. وفيها جم شغله بجسمها حابه انها تضعفها..
ما خلت رجيم وما سوته.. لكن ما اقتنعت بشي.. واسمعت عن ابر التخسيس الي هابين فيها الحين.. صار عليها دعايات مو طبيعية.. تلاقين بكل القنوات يتحجون عليها.. وانها مضمونة 100% وما في لها أي اثار جانبية.. واكيد الكل سمع عنها.. وفيكم الي جربتها والي حابه اتجربها…
المهم راحت حق دار الشفاء عشان تاخذ الابر… اخذت اول مره .. في ايدينها.. و ثاني مره راحت.. سوت في اريولها.. وللحين كل شي سليم.. بس الي صار لها عوار وورم لمدة يومين.. وعقبها ترد عادي…
لكن ثالث مره.. راحت عشان بطنها… واهني صارت المصيبه.. عقب الابر .. طبعا بطنها انتفخت .. انا للامانه ما شفت شكلها ..بس اهي تقول صار شكلها جنها حامل.. تقول مو قادره البس ولا اسكر شي على بطني.. وعلى بالها الموضوع انه ورم ويوم يومين ويعدي.. ولكن عقب الابر بيومين صار فيها حساسيه.. وجسمها وويهها قب كله احمر وبقع وحكه..
ينت وراحت ثاني مره لدار الشفا.. شافت دكتوره اهناك سوت لها تحاليل شامله .. وما فيها اي شي.. بس قالت لها.. انا دكتوره واعرف وتحاليلج سليمه 100% ومافيج شي.. بس هالحساسيه الي فيج من الابر الي اخذتيهم..والي اخذتيه في الابر ما يطلع بالتحليل.
قالت لها بس انا مو اول مره.. قالت هاذي نفس الانسولين.. ما يبين من اول مره ويبين من ثاني مره.. وقالت لها .. بس هاذي ثالث مره.. قالت انتي في ملفج مو كاتب لج الدكتور انج مسويه ثلاث مرات.. كاتب بس مرتين.. ( لو تلاحون انه الدكتور ما يكتب كل شي بالملف .. وهذا الشي غلط.. المفروض كل شي يسويه المريض من علاج ينكتب بالملف ). ((وعلى فكره الابره الوحده سعرها 30 دينار)).
المهم قالت انا بسال الستسر شنو حاطين لج بالابره.. فقالت لها الستسر.. انها حاطه من مادة التخسيس مع فيتامينات مع كلاجين.. مع ((( مخدر )) .. حاطين لها مخدر ما ادري حق شنو..
قالت لها الدكتوره.. شوفي ..الكوكتيل الي مسوينه لج اهو الي سبب لج الحساسيه.. ومادة التخسيس كانت اول تستورد من بره.. بس الحين صارت صناعة محليه.. واهم سووا كل هذا .. عشان المريض ايي مره ومرتين وثلاث.. وعشان ما يخسرون كميه كبيره من دوا التخسيس..
قالت لها: انزين بس اول مره ليش ما صار فيني جذي..
قالت: لانه اول مره مو حاط لج المادة المحليه .. حاط الماده المستورد.. مو مسوي كوكتيل…
قالت لها رفيجتي: بس اشلون جذي.. انا سمعت عن هالابر وانها زينه ..الخ
تقول انها اضحكت ضحكه بخباثة .. وقالت: انتي شفتي منها نتيجه.. قالت: اي حسيت انه ايديني اشوي تغيروا…
قالت لها: انا اليوم حاقنه 16 وحده.. من هالابر…
وعطتها مرهم حق الحساسيه ..والحمدالله ياب نتيجه من اول استعمال..
وثاني يوم .. صار حقران مو طبيعي في معدتها.. تقول حتى الماي ما اقدر اشربه… وهم راحت دار الشفا.. وتقول لا في دكتور طوارىء وظلوا ينقلون فيني من دكتور الي دكتور.. وطبعا كل دكتور بحسابه.. هذا 10 .. وهذا 20.. وحطوا لي 6 دربات.. كل واحد سعره خمسين..وتمت عندهم 6 ساعات واهم مو عارفين شنو فيني.. واطلعت وراحت الاميري وهم حطوا لها ادربات.. وعطوها جم ابره.. والحين اهي زينه.. بس فيها حراره..
الي أبي انقله لكم من سالفه رفيجتي.. انكم اديرون بالكم من الابر.. الي صارت حتى طبيبه الاطفال اتسوويها.. وهالابر مو محتاجه احد متخصص. الكل قاعد يسويها..
بس الطمع والجشع الي صار من الاقبال الكبير عليها..وغلات سعر مادة التخسيس.. خلتهم يغشون فيها .. ويحطون بلاوي بالابر..
صج اني طولت الموضوع.. بس انا حبيت انقل لكم السالفه كلها…
ودمتــــــــــــــــــــوا على حب..
تقبلوا تحياتي
بنت السلطان
وبطنه مبقع نقط ابر وايد وغاليه بعد عالفاضي ومايابت له نتيجه
خل اقوله الله يحميه ويحرسه انشالله من الامراض
مشكوره اختي على النصيحه يعطيج الف عافيه ماقصرتي
ومشكورة لعرض تجربة رفيجتج تحياتي لج
مشكوره على التحذير
خو بعد البنت دافعه دافعه لهم فلوووس .. ليش هالخباثه والتعذيب الي راووها اياااه … اتمنى من ربي كل انسان بدون ضمير جذي الله يراويه نواياه وخباثته بعياله وبعمره لانه هذا الشي الي يحرق قلبه ويخليه يخاف ربه ويذكره
ويزاج الله الف خير حبيبتي على هالافاده والتحذير وربي يشافي رفيجتج من كل شر ويشافي كل مريض .. آمين
يعني بأمريكا ادقين على نقابة دكاترة التجميل والجراحين يعطونك ملف كل دكتور عندهم وعدد الشكاوي عليهم والمصايب كلها ..يعني شلون في الكويت ماكو احد .؟؟ ما يصير اللحين وين ندري شنو هل عيادات يستخدمون ؟؟؟
انا سامعة انهم يسوون الكوكتيل من نفسهم علشان يخففون المواد باشياء ثانية بس ما توقعت دار الشفا يسوونها ؟؟؟
المفروض يسوون نقابة او مكتب الواحد يرجعله ؟؟