تجمع للمقبولات في الجامعة العربية

بسم الله الرحمن الرحيم

طبعا أنا قدمت على الجامعة وبصراحة ماتوقعت اني مقبولة لأنه كنت مقدمة الفصل الي طاف وما قبلوني .. فانصدمت يوم قالي الموظف اني انقبلت لدرجة قتله … تتغشمر ..

عقب ماشاب ودوه الكتاب

المهم بنات في اختبار راح يكون بس مادري صراحة ما سألت للحين شلون طريقة الاختبار ؟؟ ولا درست ولا شي هههه

انا قدمت على لغة انجليزية وااااااااااي مولايق بس عشان يقبلوني شسوي وبعدين بحول بإذن الله تخصص

تربية لغة عربية .

اتمنى ألقه تجاوب من المقبولات الجدد والقدم بعد عشان نستفيد من تجاربهم .

تحياتي .

لوووول انا نفسج بالضبط

قدمت السنه اللي طافت وماقبلوني

وقدمت هالسنه انجليزي وانصدمت يوم قبلوني

وخاايفه من امتحان القدرات

ابي كل البنات اللي بالجامعه العربيه المفتوحه يقولون شلون طريقه الامتحان وجم سؤال وجم المده ولي عافيكم

والامتحان بس قوااعد ولا شي ثاني ؟؟

بنات انا معاكم
امتحاني 18/8 تخصص ادارة اعمال
شوفي لازم تتدربين على القواعد الانجلس لانه في اربع مستويات لازم على الاقل تعدين اثنين لانه لو ما عديتي راح ثاخذين معاج تمهيدي وبجذي تضيعين على نفسج وقت وفلوس لانهم ما ينحسبون ضمن الدرجات
الامتحان راح يكون 100 سؤال فيه اختياري وقطعه وعليها اسئلة مدته ساعه على الكمبيوتر ونفس الوقت تبين نتيجتج وبعدها ياخذج المرشد وتروحين تمتحنين عربي الحلو بالعربي بس مستوين حتى لو سقطي فيهم وخذيتهم معاج ما يأثر نفس الانجلش ولما تخلصين العربي يبين نتيجه معاج رسوم الامتحان جنه 10 دنانير وبطاقة جامعية للطالب 3 دنانير وماا ادري شنو بعد بس هم شي له رسوم اتأكدلج منه
ولما تطلع نتيجتج نفس الوفت تدفعيين المبلغ يمكن 50% منه وبعدها تاخذين جدولج وكتبج واهما يقولون كل شي اهناك

وهذا كلام بعض المنتديات

عند قبولك في الجامعة العربية المفتوحة … سيكون هناك اختبار تحديد المستوى عليك تقديمه ، وفي حالة عدم تقديمه من الطالب المقبول ،، سيكون الأمر سيء عليه وهو ادخاله في مستوى التمهيدي الاول

وبالنسبة لتقييمك في اختبار تحديد المستوى للغة العربية بعد تقديمه سيكون أحد المستويين الأول أو الثاني
1- المستوى الأول ar111 ( درجة الاختبار أق لمن 60 درجة)
2- المستوى الثاني ar112 (درجة الاختبار من 60- 89 درجة)
ويعفى من مقرر اللغة العربية في حالة درجة الاختبار فوق 90 درجة

ولكن المشكله تكمن في اللغة الانجليزية فبناء على درجتك في اختبار القدرات ستدخل أحد المستويات التالية:
1- مستوى تمهيدي أول el098 ( لمن درجاتهم من 1 الى 24 درجة)
2- مستوى تمهيدي ثاني el099 ( لمن درجاتهم من 25 الى 49 درجة)

3- مستوى انجليزي أول el111 ( لمن درجاتهم من 50 الى 64 درجة)
4- مستوى انجليزي ثاني el112 ( لمن درجاتهم من 65 الى 79 درجة)

ويعفى من المقرر في حالة درجة الاختبار فوق 80 درجة

وهنا المشكلة في اللغة الانجليزية أنك اذا حصلت على درجة متدنية في امتحان المستوى الانجليزي ستضطر لدخول الاربع مستويات في 4 كورسات يعني سنتين .. لتبدأ بعدها أخذ مواد التخصص في بداية السنة الثالثة؟
الا اذا تداركت الامر في تسجيل الصيفي لينخفض التأخر إلى سنة ونصف أيضاً أربع كورسات من ضمنهم الصيفي

والمشكلة الأخرى أن مستوى التمهيدي الاول والثاني لايدخلان في حساب الوحدات المنجزة … وهذا يعني أنها لا تضاف لمعدلك ولا لاجتيازك تلك المواد ومصاريفها 200 دينار للمستوى المتهيدي الاول وكذلك 200 دينار للمستوى التمهيدي الثاني

لذلك عليك اتباع الموضوع التالي لتقوية نفسك باللغة الانجليزية

علماً بأن الطالب الحاصل على اختبار الـ tofll سابق .. فوق 500 نقطه يعفى من التمهيدي

وفي شي بعد لازن تدربين على الامتحانات اللي على الكمبيوتر وتطلع نتيجتج نفس الوقت
اتمنى اكون افدتكم بنات

عشان اتعرفين متى اختبارج دشي على هالينك وكتبي رقمج المدني ويبن معااج لانه لو طافج موعد الاختبار راح تاخذين كل المواد التمهيدية من الصفر عربي وانجليزي
https://www.aou.edu.kw/onlineregistration/accc.aspx

انزين حبيبتي حتى الانجليزي لهم امتحان عربي ولا بس انجليزي

لان توني ادري

اختي برنسيسة

جزاج الله خير على المعلومات ماقصرتي

انا بروح ألحين أسجل بالمنتدى وشوف اذا في شي عن الاختبار … لانه انا تخصص انجليزي ومادري امتحن بعد عربي ولا لا ؟؟