|
|
مرحبا
شلونكم جميعا انشاء الله بخير
اولا انا مااحب اكتب وايد بالمنتدى على الرغم من ان انا متابعه قديمه بالمنتدى بس حبيت انقل لكم تجربتي مع انفلونزا الخنازير انا وعيالي عشان اطمنكم
اول شي عندي ولدي اللي اهو اكثر واحد كنت خايفه عليه من الانفلونزا لان اهو مسوي زراعه نخاع العظم فكنت مااطلعه كلش والسنه هذي كنسلت فكره السفره مع انه كنا حاجزين التذاكر وكل شي بس قلت اهم شي العافيه ولاطلعت عيالي اي مكان عام حتى الطبيب اذا بالغصب كمامات ومعقمات بس لمى بلش الدوام المدرسي قلت اتوكل على الله واوديه المدرسه طبعا كان يلبس الكمام ومعاه المعقم على طول وكنت اعطيه الصبح عسل بالعكبر وماي زمزم وبالليل عسل الحبه السوده
ومدرسته مدرسه خاصه وماخذين كل الاحتياطات وزود بس قدر الله وماشاء فعل والحمدالله جاته حراره اول يوم ودوخه وحس بعوار بحنجرته وصداع شديد طبعا انا تاكدت انها انفلونزا الخنازير وديته طبيب خاص قال لا مو اعراضها وديته حكومه هم نفس الحجي بس مااقتنعت المهم استمر ت الحراره 3 ايام بعدين كحه المهم لمى حسيته تحسن جان يطيح عندنا كذى حاله بانفلونزا الخنازير من المصنفين بحالات الحرجه ويدشون الطبيب بعد التحاليل قالوا الانفلونزا
طبعا ولدي اهو اللي معاديهم لان كان مختلط فيهم فرحت وديته الامراض الساريه قالوا بعد التحليل انه فيه وعطوه التاميفلو بس كان الحمدالله مافي الا كحه بس طبعا بطوا جبدي المستشفى لان مرتين طردوني قالوا مافي شي ماادري موصينهم والا شنو
المهم بعدها بيومين حسيت بنفس الاعراض وانا حامل حاليا بالشهر الرابع بس الحمدلله يومين وصرت زينه وقالوا لا تاخذين التاميفلو الا اذا تعبتي حيل
والحين انا الحمدالله بخير بس شوي لوعه
طبعا وزعوا على البيت التاميفلو بس انا ما اعطيت اي احد الا اللي جتهم حراره واعراض المرض اما وقائي ما احس منه فايده لان اللي بيتعادون جان جاهم من زمان وسمعت انه يقلل فاعليته عند الاصابه
يعني بالمختصر يمكن اسم المرض يخوف والضجه بس اعتقد انه نفس اي نزله برد حتى بالنسبه للحالات الحرجه اللي اهي ولدي وانا وكذا شخص من عيلتنا بس الحمدلله عدت على خير واللي بيمرض بيمرض لو شنو ياخذ احتياطات يعني انا ماخليت شي وحدي اوسوس بس الحمدلله
وبالختام اتمنى للجميع السلامه
بس اتوقع ان الله حفظ ولد عشااانج اهتميتي فيه وقويتي مناااعته بالعسل وحبة البركه وماااي زمزم …
وهذا الشي اللي خلاه ولله الحمد تمر عليه خفيفه الله يحفظ ويفرحج فيه يااارب …
ويزاااج الله خير
وماتشوفون شرر
صج خرعونا وللحين متوترين
ويحفظ الجميع
واشكرج على شجاعتج بطرح موضوعج عشان البنات يستفيدون =)
الله يسلمج حبيبتي ويبعد الشر عنكم ومشكوره على دعواتج
والله اهو ماكانت حالته خفيفه بالعكس الحراره حيل تعبته ما كانت تنزل والصداع بس الحمدلله انها عدت ومادريت انها انفلونزا الخنازير الا بعد ما طاب والا كان ذبحتني الوساوس